Aitalafu Faalelalolagi, Aitalafu Faalelagi

E ui i aoaoga a le Ekaelsia mai i lona amataga e oo mai i nei aso, e i ai lava taimi e maileia ai tagata o le Ekalesia i le faaaluina ma le le faautauta ma le faavalevalea o le tele o tupe. O nisi o loo faaauau pea ona faaalu, ma mafaufau faapea, e i ai lava le auala e maua ai tupe. E i ai lava le auala e ola ai.

E tele taimi, e le maua ai tupe sa faamoemoe e maua.

Ia manatua le mea lenei: o le aitalafu o se ituaiga nofo pologa. O se manu ninii faalafua lea o mea tautupe. A tatou faia ni faatauga faaaitalafu, latou te aumaia ia i tatou na o ni mafaufauga faivavale o le tamaoaiga. Tatou te manatu ua tatou pulea ia mea, ae o le mea moni, o mea ia ua pulea i tatou.

O nisi aitalafu—e pei o se fale manaia, tupe faaalu aogā mo aoga, atonu mo se taavale muamua o loo manaomia—atonu e talafeagai. Ae e le tatau ona tatou oo atu i le pologa i mea tautupe e ala i le faia o aitalafu e totogi auaua’i e aunoa ma le iloiloina toto’a o le tau.

E masani ona tatou faalogo o faapea, o tupe tului o se auauna lelei ae o se matai e le alofa. Na faamatalaina faapenei e Peresitene J. Reuben Clark: “O tupe tului e lē moe pe ma’i pe oti foi. E lē alu lava i le falemai; e faigaluega i Aso Sa ma aso malolo; e le avea ni ona aso malolo… . O le taimi lava e te aitalafu ai, e fai ai le tupe tului ma au soa i minute uma i le ao ma le po, e le mafai ona e aveesea pe sola ese mai ai; e le mafai ona e faate’aesea; e lē gauai atu i ni aioiga, poloaiga, po o ni faatonuga; ma o le taimi lava e te faasalavei ai pe uia lona ala, pe e te lē faamalieina ona manao, na te olopalaina oe.”²

O loo manino lapataiga a isi perofeta musuia i o tatou taimi e uiga i lenei mea, ma o le mea na sa’o i le 50 po o le 150 tausaga ua mavae, e sa’o foi i aso nei.

Na saunoa mai Peresitene Heber J. Grant, “Mai lo’u uluai manatuaina o mea na i ai i aso ua mavae, mai aso o Polika Iaga e oo mai i aso nei, sa ou faalogo ai i alii o tutu i le pulelaa … ma faatauanau atu i tagata ina ia aua nei ola aitalafu; ma ou te talitonu o o tatou faafitauli uma lava i aso nei e mafua ona o le lē usita’ia o lena fautuaga.”³

Na saunoa mai Peresitene Ezra Taft Benson: “Aua nei e tuua oe lava po o lou aiga e aunoa ma se puipuiga mai afa fulifao o mea tautupe… . Teu faaputuputu tupe.”⁴

Na aoao mai Peresitene Harold B. Lee, “E le gata ina tatau ona tatou aoaoina tagata e o ese mai le nofo aitalafu, ae ia faapena foi ona tatou aoao i latou e aua le faia aitalafu.”⁵

Na faailoa mai e Peresitene Gordon B. Hinckley: “Ua toatele naua o tatou tagata e faaaoga uma a latou tupe maua e ola ai. O le mea moni, o nisi o loo ola i tupe nono… .

“ … Ou te uunaia outou e faautauta ia outou tupe faaalu; ia pulea lelei outou i le mea e gata mai ai pe a faia a outou faatauga, ina ia aloese mai le aitalafu. Ia totogi uma aitalafu i se taimi vave e te mafaia, ma faasaoloto oe mai le nofo pologa.”⁶

O’u uso e ma tuafafine, e toatele ua latou usita’ia lenei fautuaga faaperofeta. Ua latou ola e tusa ma mea ua latou maua, latou te totogiina aitalafu ua latou faia, latou te taumafai foi e tuuitiitia le avega o loo nofo aitalafu ai i isi. Matou te faamalo atu ia i latou o loo faia faapea. Aua e oo mai le aso o le a latou selesele ai i faamanuiaga o a latou taumafaiga ma malamalama ai i le taua o lenei fautuaga musuia.

Ae peitai, e tauivi pea isi pe a oo i mea tautupe. O nisi ua aafia i faigata ma mea e le i fuafuaina lea ua faatamaia ai i latou i tulaga tautupe. O isi o loo i ai i noataga tautupe ona latou te lei iloa ona pulea i latou lava ma faatautaia lo latou naunau e soona faaalu. O le mea lea, ua latou faia ai ni faaiuga lē lelei i tulaga tautupe.

Sei ou avatu atu ni laasaga taua se lima e tau atu i le saolotoga i tulaga tautupe, tou te manatunatu i ai.

Muamua, totogi lau sefuluai. Tou te mananao ia to mai pupuni o le lagi ia te outou? Tou te mananao e sasaa mai le manuia mo outou, seia silisili ona tele?⁷ Totogi lau sefuluai e le aunoa, ona tuu lea o le taunuuga i aao o le Alii.

O le usiusitai i poloaiga a le Atua, o le faavae lea o se olaga fiafia. E moni lava, o le a faamanuiaina i tatou i meaalofa o le lagi ona o lo tatou usiusitai. O le le totogia o le sefuluai e i latou ua iloa le mataupu faavae e mafai ona oo atu ai i le loto tiga i lenei olaga ma atonu foi ma le faanoanoa i le olaga a sau.

Lua, faaitiitia tupe faaalu nai lo tupe maua. O se fautuaga faigofie lenei ae o se mea lilo mamana mo le fiafia i tulaga tautupe. E masani lava, o tupe faaalu a se aiga e sili atu ona pulea e o latou mana’o, nai lo tupe maua. Ua latou talitonu, e sili atu o latou olaga pe a tele a latou mea. Na pau le mea e masani ona latou feagai, o le le mautonu ma le popole semanu e mafai ona foia.

O i latou e ola saogalemu i mea ua latou maua, latou te iloa a latou tupe maua i masina taitasi, ma e ui ina faigata, ae latou te pulea lava i latou ina ia itiiti tupe faaalu nai lo lena aofaiga.

E faigofie tele ona aitalafu. O le mea moni, toetoe lava e faamalosi mai i o tatou luga. O i latou e faaaogaina kata faifaatau (credit cards) e soona faaalu valea ai, e tatau ona mafaufau e aveese. E sili atu le fano o le kata faifaatau palasitika, nai lo le tuuitiitia ma fano se aiga i le nofo aitalafu.

Tolu, aoao e faaputu. Manatua le lesona ia Iosefa i Aikupito. I taimi o le mau, ia faaputu mo se aso e manaomia ai.⁸

E masani ona faapea tagata, e le taitai ona latou manunu’a, mama’i, leai ni galuega, pe vave maui atu a latou teugatupe. O le mea e sili ona leaga ai, ua masani tagata ona fai ni faatauga i le asō e faavae i ni matematega o le a lelei mea uma i mea ua faamoemoe o le a tutupu a taeao.

O le tagata poto e malamalama i le taua o le teu i le asō mo aso leaga a taeao. E lava a latou inisiua o le a tausia ai i latou i taimi o ma’i po o le oti. A mafai, latou te teuina se sapalai o meaai mo le tausaga, o vai, ma isi mea autu e manaomia. Latou te tuuese se tupe teu ma teugatupe faavaitaimi. Latou te galulue ma le maelega e tuuitiitia aitalafu o latou nofo aitalafu ai i isi ma taumafai e saoloto mai le nofo aitalafu.

Uso e ma tuafafine, o au tapenapenaga e te faia i le asō, e i ai se aso e pei ai o meaai na teuina e tagata Aikupito ma le aiga o le tama o Iosefa.

Fa, faamamalu i au matafaioi tautupe. Mai lea taimi i lea taimi, tatou te faalogo ai i tala o le matape’ape’a ma le manatu faapito lea e afua ai ona tatou mafatia. Tatou te faalogo i le taufaasese, lē totogia nonoga tupe ma le taufaavalea i mea tautupe, ma le gau o pisinisi.

Ua tatou faalogo i tamā ua le manatu mamafa i matafaioi tautupe i o latou aiga. Matou te faapea atu i alii ma tamaitai i soo se mea lava, afai ua outou aumaia ni fanau i le lalolagi, o lau tautinoga faamaoni le faia o mea uma e oo i ai lou malosi e tausia ai i latou. E le tatau ona ta’ua se alii o se tamatane, pe afai e tele ana taavale, o vaa, ma isi meatotino ae le amanaia ana matafaioi paia i tulaga tautupe mo lana ava ma le fanau.

O i tatou o ni tagata faamaoni. Tatou te talitonu i le totogiina o a tatou aitalafu ma faamaoni i mea tatou te fai i o tatou uso a tagata.

Sei ou faamatala atu le tala i se tasi alii na faia se ositaulaga tele e faatumauina ai lona faamaoni ma le totogiina o mea tautupe.

O le vaitaimi o le 1930, na amataina ai e Feleti Sinoupeka lana lava fale talavai i matu i sasae o Oregon. O lana miti sa i ai, ia amataina sana pisinisi, peitai, e le’i tau lau o le faamoemoe ona o le tulaga na i ai le tamaoaiga. O le valu masina mulimuli ane, na tapunia ai e Feleti faitotoa o lona fale talavai mo le taimi mulimuli.

E ui lava ina sa le manuia lana pisinisi, ae sa naunau lava Feleti e toe totogi le nonogatupe. Sa le iloa e nisi pe aisea na manao ai o ia e totogi pea le aitalafu. Aisea na lē faapea ai ua gau ona faamagalo ai lea faaletulafono le aitalafu?

Ae, e le i faalogo i ai Feleti. Sa fai mai o ia e na te toe totogia lava le nonogatupe, ma sa naunau e tausi lana upu. Sa tasu’i e lona aiga le tele o o latou lavalava, totoina le tele o a latou meaai, ma faaaoga mea uma na latou maua seia oo ina matuai le aoga pe uma foi. E savali Feleti i le galuega i aso uma, tusa pe timu pe la. Ma o masina uma, e totogi ai e Feleti se mea na te mafaia o le nonogatupe.

Ua mavae atu tausaga ma na iu lava ina ua mai le aso matagofie na totogi ai e Feleti le vaega tupe mulimuli. Sa alu lava o ia e ave. Sa tagi le alii na nonoina atu ia te ia le tupe, ma faatasi ai ma loimata na tafe ifo i ona foliga, sa ia faapea atu ai, “e le gata ina ua e totogiina mai sene uma, ae ua e aoao mai ia te au se ituaiga tagata tamalii ma le faamaoni.”

E oo mai i le asō, toeitiiti 70 tausaga na sainia ai le suafa o Feleti i lena nonogatupe, o loo faamatalaina pea ma le mitamita e i latou o e tupuga mai ia Feleti ma Ema Sinoupeka lenei tala. O lenei amioga o le mamalu ma le tamalii o loo i ai pea i le tele o tausaga, o se faataitaiga matagofie o le faamaoni o se aiga.

Lima, aoao lau fanau ina ia mulimuli i au faataitaiga. Ua toatele naua o tatou tupulaga talavou ua i ai faafitauli tautupe ona latou te lei aoaoina lava ia mataupu faavae sa’o i le fuafuaina o mea tautupe i le aiga. Aoao lau fanau a o laiti. Aoao i latou e le mafai ona latou maua se mea i le na ona mananao i ai. Aoao i latou i mataupu faavae o le galue, ola manafanafa, ma le faaputuputu.

Afai e te manatu e le o lava lou silafia e aoao atu ai i latou, ona tatau lea ona e amata suesue. E tele punaoa o loo maua—mai vasega, i tusi, e oo lava i isi punaoa.

E i ai nisi o i tatou ua matuai lava ma totoe mea ua faamanuiaina ai. E finagalo lo tatou Tama Faalelagi tatou te faia ni mea e sili atu i lo tatou tamaoaiga, nai lo le na ona fausia o ni fale tetele e teu ai. Pe mafai ona outou mafaufau po o a ni mea e sili e mafai ona fausia ai le malo o le Atua? Pe mafai ona outou mafaufau po o a ni mea e sili tou te faia, ia manuia ai olaga o isi, ma aumaia ai le malamalama ma le faamoemoega i o latou olaga?”

Ua tatou talanoa e uiga i aitalafu faalelalolagi ma lo tatou tiute i le toe totogiina. Ae e i ai foi isi aitalafu—o aitalafu e sili atu ona faavavau nai lo le olaga—e le faigofie tele ona toe totogiina. O le mea moni, o le a le mafai lava ona tatou toe totogiina nisi o ia aitalafu. O aitalafu ia faalelagi.

Ua tuuina mai e o tatou tina ma tama le ola ma aumai i tatou i lenei lalolagi. Ua latou tuu mai le avanoa e maua ai ni tino faaletino ma lagonaina le olioli ma faanoanoaga o lenei lalolagi tamaoaiga. O le tele o tulaga, latou te tuueseina a latou miti ma faanaunauga, mo le manuia o a latou fanau. Ua matuai talafeagai lo tatou ava ia i latou ma faaali atu e ala i le upu ma le amio lo tatou alolofa ma lo tatou agaga faafetai ia i latou.

O loo i ai foi sa tatou aitalafu tele i o tatou augatama o e na muamua atu ia i tatou, ma o loo faatalitali mai i tua o le veli mo na sauniga, e mafai ai ona faaauau lo latou alualu i luma e faavavau. O le mea e sili ai, e mafai ona tatou totogia se vaega o lea aitalafu.

O se aitalafu tele ua tatou nofo aitalafu ai i le Alii mo le toefuataiina o Lana Ekalesia paia ma le talalelei moni i nei aso e gata ai e ala mai i le Perofeta o Iosefa Samita. Mai lava i lona talavou seia oo i lona Maturoina, sa ia faaaogaina ona aso i le aumaia i tagata uma o le talalelei a Iesu Keriso, lea sa aveesea. Tatou te aitalafu i lo tatou faafetai tele ia te ia ma alii uma i lenei valaauga paia, o e na tuuina atu i ai le pule e pulefaamalumalu ai i Lana Ekalesia.

E mafai faapefea ona tatou toe totogi le aitalafu ua tatou nofo aitalafu ai i le Faaola? Sa Ia totogiina se aitalafu Na te lei faia, ina ia faasaoloto ai i tatou mai se aitalafu e le mafai ona tatou totogia. Ona o Ia, o le a tatou ola ai e faavavau. Ona o Lana taulaga e le iu, e mafai ai ona faamagaloina a tatou agasala, e mafai ai ona tatou maua le meaalofa sili o meaalofa uma a le Atua: o le ola e faavavau.⁹

Pe mafai ea ona i ai se tau o lena meaalofa? Pe mafai ea ona tatou tauia se meaalofa faapena? Na aoao mai perofeta O Le Tusi a Mamona, le Tupu o Peniamina, “afai tou te avatu le faafetai ma le viiga uma a o outou agaga … [ma] afai tou te auauna atu ia te ia ma o outou agaga atoa, e fai pea outou ma auauna le aoga.”¹⁰

O loo i ai ni a tatou aitalafu faalelalolagi ma aitalafu faalelagi. Ia tatou atamamai i le taulimaina taitasi ma ia manatua fetalaiga a le Faaola. O loo ta’u mai i tusi paia ia i tatou, “Aua tou te toloai oa mo outou i le lalolagi, o i ai le mogamoga ma le ele e faaumatia ai, o i ai foi tagata gaoi e eli atu ma gaoi ai: A ia outou toloai oa mo outou i le lagi.”¹¹ O oa o lenei lalolagi e pei lava o le efuefu e faatusa i oa o loo faatalitali mai mo tagata faamaoni i maota o le Tama. E matuai faavalevalea lava se tagata na te faaaluina ona aso e saili ai mea e pala ma matafi. E matuai atamai lava se tagata na te faaaluina ona aso e saili ai le ola e faavavau.

Ia iloa i o outou loto o loo soifua Iesu le Keriso. Ia filemu, aua a e faalatalata atu ia te Ia, o le a faalatalata mai o Ia ia te oe. Aua le atuatuvale o outou loto ae ia fiafia. Ua toefuataiina mai le talalelei e ala i le Perofeta o Iosefa Samita. E le o punitia le lagi. E pei ona i ai i aso anamua, o loo i ai nei se tagata, o le e mafai ona fesootai ma le Silisiliese. O se perofeta, o Peresitene Gordon B. Hinckley, o loo femaliua’i i le fogaeleele i o tatou aso ma lenei taimi. Ou te molimau atu ai i le suafa o Iesu Keriso, amene.