Ae Peitai, A Le o Lea …

A o ou talavou, sa ou fo’i mai i le fale mai se tauvaga o taaloga pasiketipolo a le tausaga valu, ma lo’u le fiafia, toilalo ma le fenumiai. Sa ou sa’i atu i lo’u tina, “Ou te le iloa pe aisea na matou faiaina ai—sa ou faatuatua matou te malo!”

O lea ua ou iloa nei, ou te le i iloa i lena taimi le uiga o le faatuatua.

O le faatuatua, e le o se lototoa e na ona mafaufau i ai, e le na o se moomooga, e le na o se faamoemoe. O le faatuatua moni o le faatuatua i le Alii o Iesu Keriso—talitonu ma le faalagolago ia Iesu Keriso e taitai atu ai se tagata e mulimuli ia te Ia.¹

I le tele o seneturi ua mavae, sa faafuasei ona aveesea mai Tanielu ma ana uo mai le malupuipuia o o latou aiga, i le lalolagi—o se lalolagi ese ma le taufaamatau. Ina ua mumusu Satarako, Mesako ma Apeteniko e ifo ma tapuai i le tupua auro sa faia e le tupu, sa poloai atu Nepukanesa ma le ita tele ia te i latou afai latou te le tapuai e pei ona faatonuina ai, o le a lafoina loa lava i le ogaumu aasa. “Ma o ai foi se Atua e laveaiina outou ai la’u pule?”²

Sa vave ona tali atu ma le mautinoa ia taulelea e toatolu, “Afai o lea, [e te lafoina i matou i le ogaumu aasa], ua mafai lo matou Atua, matou te auauna i ai, ona laveai mai ia te i matou ai le ogaumu aasa, na te laveaiina mai lava i matou ai lau pule le tupu.” E pei lava o lo’u ituaiga faatuatua sa i ai i le tausaga valu. Ae peitai, sa latou faaalia lava lo latou malamalama atoatoa i le uiga o le faatuatua. Sa latou toe faapea atu, “Ae peitai, a le o lea, … matou te le auauna i ou atua, o le tupua auro foi ua e faatuina, matou te le ifo i ai.”³ O se faaupuga lena o le faatuatua moni.

Sa latou iloaina e mafai ona latou faatuatuaina le Atua—e tusa lava pe le taulau lo latou faamoemoe.⁴ Sa latou iloa o le faatuatua, e le na o se ioe i ai o le mafaufau, e tele atu i le na o le iloa o loo soifua le Atua. O le faatuatua o le faalagolago atoatoa ia te Ia.

O le faatuatua o le talitonu lea, e ui lava ina tatou te le talitonu i mea uma, [ae] e malamalama o Ia. O le faatuatua ia Iesu Keriso, e aofia ai le faalagolago atoatoa ia te Ia.

Sa iloa e Satarako, Mesako, ma Apeteniko e mafai ona latou faalagolago ia te Ia e le aunoa, aua sa latou iloaina Lana fuafuaga, ma sa latou iloaina e le suia o Ia.⁵ Sa latou iloa, e pei foi ona tatou iloa, o le olaga faitino, e le o se mea faafuasei. O se vaega itiiti o le fuafuaga sili⁶ a lo tatou Tama oi le Lagi ina ia mafai ai e i tatou o Ona atalii ma afafine, ona maua faamanuiaga o loo sapi ai o Ia, pe afai tatou te mananao i ai.

Sa latou iloa, e pei foi ona tatou iloa, i le tatou muai olaga, sa aoaoina ai i tatou e Ia e uiga i le faamoemoega o le olaga nei: “O le a tatou faia se lalolagi e nonofo ai i latou nei; Ma o le a tatou faataitai ai i latou, ia iloa ai, pe latou te faia mea uma e poloaiina ai i latou e le Alii lo latou Atua.”⁷

Ua ia te i tatou le faamaoniga—o se suega. O le lalolagi, o se nofoaga o suega mo alii ma tamaitai soifua. A tatou malamalama o nei mea uma, o se suega e faia e lo tatou Tama Faalelagi, o lē o loo finagalo ina ia tatou faatuatuaina o Ia ma faataga o Ia e fesoasoani mai ia te i tatou, ona mafai lea ona manino lelei le tatou vaai i mea uma.

O Lana galuega ma Lona mamalu, sa Ia fetalai mai ai, “o le faataunuuina o le faaofuina o le tagata i le tino ola pea ma le ola e faavavau.”⁸ Ua maea ona maua e ia le tulaga faaleatua. Ma o le taimi nei, na o le pau lava lona faamoemoega o le fesoasoani mai lea ia te i tatou—ina ia mafai ai e i tatou ona toe foi atu ia te Ia ma avea e faapei o Ia, ma ola ai i Lona ituaiga soifua e faavavau.

O le iloaina o nei mea uma, sa le faigata ai i na taulelea Eperu e toatolu ona fai la latou faaiuga. O le a latou mulimuli i le Atua; o le a faaaoga lo latou faatuatua ia te Ia. O le a Ia faasaoina i latou, ae peitai, a le o lea—ua tatou iloa lava le iuga o le ala.

Ua tuuina mai e le Alii ia te i tatou le saolotoga, o le aia tatau ma le tiutetauave e filifili ai.⁹ Na te tofotofoina i tatou i le faatagaina lea o i tatou ina ia luitauina. Na te faamautinoa mai ia te i tatou, Na te le tuuina mai ni tofotofoga e sili atu i lo tatou malosi.¹⁰ Ae e tatau ona tatou malamalama, o luitau tetele e maoae ai le tagata. Tatou te le sailia ni puapuaga, ae afai tatou te tali atu i le faatuatua, e faamalosia i tatou e le Alii. O ae peitai a le o lea [o taimi na te le laveaiina ai i tatou] e mafai ona avea ma faamanuiaga ofoofogia.

Sa aoaoina e le Aposetolo o Paulo lenei lesona matagofie ma ia tautino mai ai, ina ua mavae le tele o tausaga o lana galuega punouai faafaifeautalai, “Na matou mitamita foi i puapuaga … ina ua tatou iloa o le puapuaga e tupu ai le onosai; O le onosai e tupu ai le mautinoa; o le mautinoa e tupu ai le faamoemoe: O le faamoemoe foi e le ma ai,”¹¹

Sa faamautinoa atu ia te Ia e le Faaola, “O lo’u nei alofa tunoa ua lava lea e fesoasoani ai ia te oe: aua o le vaivai e faaatoatoaina ai lo’u mana.”¹²

Sa tali atu Paulo: “O lea ua tele ai lo’u fiafia i le mitamita i mea ua ou vaivai ai; ina ia tumau i o’u luga le mana o Keriso… . ou te fiafia ai i mea e vaivai ai; o le faaleaga mai, o malaia, o le agatele mai, o le atuatuvale ona o Keriso: aua pe a ou vaivai, ona ou malosi ai lea.”¹³ A taulimaina e Paulo ona luitau i le ala a le Alii, e faateleina ai lona faatuatua.

“O le faatuatua, ina ua tofotofoina Aperaamo, sa ia ofo atu ai Isaako.”¹⁴ Ona o le faatuatua tele o Aperaamo, o lea sa folafola atu ai o le a faateleina ana fanau nai lo fetu o le lagi, ma o le a oo mai na fanau e ala mai ia Isaako. Ma sa faataunuuina loa lava e Aperaamo le poloaiga a le Alii. E tausia foi e le Atua Lana folafolaga, e ui ina e le o le mea sa faamoemoe i ai Aperaamo, ae sa ia faatuatuaina atoatoa lava o Ia.

E faataunuuina e tagata mea ofoofogia e ala i le faalagolago i le Alii ma tausi Ana poloaiga—e ala i le faaaogaina o le faatuatua tusa lava pe latou te le iloa le ala o loo fafau ai i latou e le Alii.

“O le faatuatua, na le mafai ai e Mose … ona ia ta’ua o ia o le tama a le afafine o Farao;

“Ua filifili e ia ia agaleagaina faatasi o ia ma tagata o le Atua, ae aua le ia te ia le fiafia i le agasala e vave mavae;

“Ua manatu o ia i le upu faifai ona o Keriso o le oa lea e sili i faaputugaoa o Aikupito… .

“O le faatuatua na tuuina ai e ia Aikupito, ua le fefe i le ita o le tupu… .

“O le faatuatua ua latou ui ai i le sami Ulaula pei o le eleele matutu. …

“O le faatuatua na solo ai pa o Ieriko.”¹⁵

O isi, “o le faatuatua na faatoilaloina ai malo, … ma maua ai mea na folafolaina, na pupuni ai gutu o leona, na tinei ai le malosi o le afi, na sao ai mai le mata o le pelu, na faamalosia ai i latou sa vaivai, na avea ai ma fitafita i taua.”¹⁶

Peitai, i le totonugalemu o na mea matagofie e faamoemoe ma faatalitali i ai i latou e faatinoina, sa i ai lava le ae afai na te le laveaiina i tatou:

“Na tofotofoina isi i tauemuga ma sasaina, … o noanoataga ma tuuina i falepuipui:

“Na fetogia i latou i maa, na vaevaeesea i ‘ili, na tofotofoina, na oti i latou na fasia i le pelu: na feoai solo … o mativa i latou, ma puapuagatia, ma faasaunoaina; …¹⁷

“Na saunia e le Atua nisi o mea e sili ona lelei mo i latou e ala i o latou mafatiaga, aua a aunoa ma mafatiaga e le mafai ona faaatoatoaina i latou.”¹⁸

Ua tutumu a tatou tusitusiga paia ma lo tatou talafaasolopito i tala o alii ma tamaitai maoae o le Atua, o e ua talitonu e laveaiina i latou e Ia, ae peitai a le o lea, sa latou faaalia lava o le a latou faatuatua ma faamaoni.

E ia te ia le mana [e laveaiina ai], ae o le tatou suega.

O le a le mea o faamoemoe le Alii tatou te faia i o tatou luitau? E faamoemoe o ia tatou te faia mea uma tatou te mafaia. Ae o mea o totoe, e faia e Ia. Fai mai Nifae, “Aua ua matou iloa e faaolaina i tatou i le alofa tunoa pe a uma ona faia mea uma tatou te faia.”¹⁹

E tatau ona tatou maua le faatuatua e pei o Sataraka, Mesako, ma Apeteniko.

O le a laveaiina i tatou e le Atua mai tauemuga ma sauaga, peitai, a le o lea… . O lo tatou Atua o le a laveaiina i tatou mai ma’i ma faama’i, peitai, a le o lea… .O le a Ia laveaiina i tatou mai le tuulafoaiina, faanoanoa, po o le atuatuvale, peitai, a le o lea … o lo tatou Atua o le a laveaiina i tatou mai le taufaamata’u, tautuua’iga ma le le malupuipuia, peitai, a le o lea… . O le a Ia laveaiina i tatou mai le oti po o le manu’a o e pele ia i tatou, peitai, a le o lea… . o le a tatou faatuatua i le Alii.

O le a faamautinoa e lo tatou Atua ua tatou maua le faamasinoga tonu ma le sa’o, peitai, a le o lea. … o le a Ia faamautinoaina e alofagia i tatou ma aloaia, peitai, a le o lea … O le a tatou maua se soa e lelei atoatoa ma ni fanau amiotonu ma usiusitai, peitai, a le o lea, … o le a tatou faatuatua lava i le Alii o Iesu Keriso, aua ua tatou iloa afai tatou te faia mea uma tatou te mafaia, o le a laveaiina i tatou ma maua mea uma ua ia te Ia, i Lona lava taimi ma Lana lava ala.²⁰ Ou te molimau atu ai i le suafa o Iesu Keriso, amene.