Pe Na E Mauaina le Savali Sao?

O’u uso e ma tuafafine pele ma uo, ou te ofo alofa atu ia te outou i le agaga o le faaaumea ma le alofa. O loo tatou ola i se augatupulaga ofoofogia o le feaveaiina o faamatalaga. O le aofaiga o faamatalaga e auina atu i le i-meli, fesi, telefoni feaveai, ma isi auala e matuai maoae lava. O le mea moni lava, ua tele naua ia savali. O le aofaiga ua matuai anoanoai lava lea e matuai faigofie ai lava ona misi se savali taua, ma o le misia o savali e mafai ona matuai ogaoga ia taunuuga.

Mo se faataitaiga, i le taimi o le taua, o savali e misia i le va o taitai ma fitafita o loo i le muaau na oo atu ai i se matuai fenumiai ma le matautia o le ola maimau. I le Taua Muamua o le Lalolagi na faatonuina ai le Vaegaau lona 308 ina ia muamua i luma i se taumafaiga popole ina ia ave ma taofia se vaega o le Vaomatua o Argonne i soo se tau e mafai ai. Sa matuai vevela le taua lea na mafua ai ona solomuli se tasi vaegaau lagolago sa i le itu taumatau ma le itu tauagavale, ma sa siomia ma tuua ai na o le vaegaau. Talu ai ona sa le toe maua ni fesootaiga a le ofisa tutotonu ma i latou, o lea na lauiloa ai o le Vaegaau Leiloa.

Sa fesootai le vaegaau ma le ofisa tutotonu e ala i lupe lea e felelei mai le nofoaga o loo i ai le vaegaau e agai atu i le laumua ma ni savali. Ae peitai, o le taimi lava e faafelelei atu ai nei lupe, o le taimi foi lena e tafana ai i lalo e au tetee. E tafana atu e le Vaegaau Leiloa, lea e le o iloa po o fea o latou i ai, a latou fana lapopoa ma mafua ai le tele o tagata maliliu. Sa tau leai ni meaai, ma ni vai a le vaegaau, ae sa tumau pea lo latou nofoaga ma e lei siilima atu foi e ui lava i le tele o le maliu ma le oti. Mulimuli ane, e ui lava sa fanaina se tasi o lupe avefeau e igoa ia Cher Ami, ae na oo atu lava i le ofisa tutotonu e avatu le savali e faailoa ai le nofoaga o loo i ai le vaegaau. Na faasaoina i latou na feola o le vaegaau ona o lena savali taua e tasi na oo atu.¹

E ogaoga ia taunuuga pe afai tatou te misia ia savali taua, aemaise lava pe afai o nei savali e mai le Atua. I le talafaasolopito atoa o le lalolagi sa auina mai ai e le Atua ia savali i ni auala eseese. Sa leoleo Mose i mamoe a le tama o lona toalua i le toafa lea na ia tau atu ai i se “afi mumu i totonu o le laau talatala.”² Sa ia fia malamalama ma manao e iloa pe faapefea ona mu le laau talatala.³ A o faliu atu Mose e vaai, “Ona valaau mai lea o le Atua ia te ia nai totonu o le laau talatala, ua fetalai mai, Mose, Mose. Ona fai atu lea o ia, O a’u lenei.”⁴ Na fetalai atu le Atua ia te ia, “Ina to ese ia ou seevae, aua ua sa lava le eleele o loo e tu ai nei.”⁵ Na filifili le Atua e talanoa ma Mose mai se lau talatala mumu. Na Ia ta’u atu ia Mose o loo i ai Sana galuega mo ia na te faia—aemaise lava le aumaia lea o le fanauga a Isaraelu mai Aikupito “i se nuu e tafe ai le suasusu ma le meli.”⁶

O le afioga a le Alii sa na o le faatasi ona oo mai e ala i se laau talatala lea na mumu ae lei mu ai. E ese foi se aafiaga na oo i ai le perofeta o Elia. Sa ia faatalitali “ao afio ane Ieova, o le matagi tetele foi ma le malosi ua lepetia ai mauga, ma momomo ai papa i luma o Ieova; e lei i ai Ieova i le matagi: ua mulimuli i le matagi o le mafuie; e lei i ai Ieova i le mafuie: e mulimuli i le mafuie o le afi; e lei i ai Ieova i le afi; e mulimuli i le afi o le leo filemu ma le itiiti.”⁷

E masani lava ona faaali mai ia savali i le leo filemu ma le itiiti, lea e tautala mai ia i tatou uma e ala mai i tusitusiga paia, o perofeta o aso nei, ma faaaliga faaletagata.

O nisi taimi tatou te le mananao ai e faalogo i savali mai le Atua. Mo se faataitaiga, na oo mai le afioga a le Alii ma valaauina Iona e alu i Nineva ma folafola atu le salamo. Ae na teena e Iona le savali ma solaese i Iopa, lea na ia maua ai se vaa i Tasesa e sola ese ai luma o Ieova. Ae peitai, na tuuina ifo e Ieova le matagi tetele i le vasa. Sa matatau le auvaa, ma o se taumafaiga ina ia faamalie ai Ieova, o lea sa latou lafoina ai loa Iona i le sami. Na foloina Iona e se i’a tele ma na i ai foi o ia i le manava o le i’a i le tolu ao ma le tolu po. Sa tatalo Iona mo le faamagaloga ma le faasaolotoina, ma o lea na luai ai e le i’a o ia i luga o le eleele matutu. O le taimi lona lua na oo mai ai le afioga a Ieova ia Iona, sa ia faalogo ma alu atu ma alagaina le salamo i tagata o Nineva.⁸

O nisi o i tatou atonu e moomia se mea faaofo e pei o se laau talatala mumu e fafagu ai o tatou lagona. I se aafiaga faapena, o le natura moomia lava o se mea—se tagata, se tulaga, po o se mea faitino—e faafuaseia lava ona malamalama i ai. Ua tatou malamalama o lenei mea o se musumusuga. Ina ia mafai ona malamalama e ala i musumusuga i le tulaga masani o mea o le olaga i lo latou uiga moni o se meaalofa faapitoa lea. E toatele tagata e le malamalama i musumusuga aua o le “mana tele o le Atua … e faatauvaa i le manatu o tagata”⁹ pe ona ua amata ona latou “le talitonu i se faailoga po o se vavega mai le lagi.”¹⁰

Na ou aoaoina i lo’u talavou e faapea e mafai ona oo mai musumusuga i soo se isi lava o i tatou. A o o’u i ai i le aoga maualuga sa ou aveina ai se vasega faigata, o le tele lava o mea sa aoaoina ai ou te le malamalama i ai. I se tasi aso na fesili mai ai le faiaoga ia te au. Ou te lei malamalama i le fesili, ma e mautinoa lava lo’u leiloaina o le tali. Na tei lava ua oo mai se tali i lo’u mafaufau, lea sa ou toe tauina atu i le faiaoga. O le tali sao lea, ae na ou iloa e lei sau mai ia te au.

E mafai la faapefea ona tatou iloa ia musumusuga pe a oo mai? Na taua e Enosa, “Ina o faapea ona ou finau i le agaga, faauta, ua toe tulei mai le siufofoga o le Atua ia te au.”¹¹ O le leo o le agaga o faaaliga e le mafai ona lagonaina i taliga, ae tuuina mai ai ia i tatou se faamaoniga faalelagi e ala i o tatou manatu ma lagona. E pei ona tauina mai ia i tatou i le Mataupu Faavae ma Feagaiga, “O le a ou faaali atu ia te oe i lou mafaufau ma lou loto i le Agaga Paia e oo atu ia te oe ma o le a tumau i lou loto.”¹² E tatau ona tatou faamasani o tatou lagona i lena leo faalelagi.

O la’u leitio muamua lava o se ituaiga e alu i le maa crystal. Sa faigata ona ki le nila i se alaleo patino. Ou te olooloina ia nai tamai uaea sa i luga o le leitio ina ia maua tonu ai lava le vaega e tuu ai le nila, e na o sina minoi lava i luga o le maa lea sa maua ai le alaleo. Afai o le uaea lea e maua ai le alaleo e na o sina milimita lava e ese ai mai le tulaga lena o le a ou le mauaina foi le alaleo sao ma o le a na o le gogolo lava e maua. A o mavae atu taimi, faatasi ai ma le onosai ma le tumau mausali, o le lelei o le vaai ma se lima ua masani, sa ou iloa ai ona saili le vaega tonu lava i luga o le leitio e aunoa ma se faafaigata.

E faapea foi i musumusuga. E tatau ona tatou fetuunaia o tatou tagata i musumusuga mai le Atua ma aua ne’i o tatou faalogo atu i leo ma aafiaga o le lalolagi. E ao ona tatou galulue i le fetuunaia o i tatou. O le toatele o i tatou e moomia se taimi umi e fetuunai ma faamasani ai. Ina ua faatoa valaauina au o se Pulega Aoao fou, na tauina mai e Peresitene Marion G. Romney, o le sa 70 ona tausaga i lena taimi, ia i matou, “Ua ou iloa le taimi o loo o’u galue ai e tusa ma le Agaga ma le taimi ou te le o galue ai i le Agaga.” O le mafai ona iloa pe o taialaina se tasi e le Agaga o se meaalofa lea mai le Atua.

I tulaga tau fesootaiga, o leitio sa alu i maa cryctal o se amataga fou lea o ni metotia tau fesootaiga. Faatasi ai ma le saoasaoa o le tekinolosi, ua faaaoga ai telefoni feaveai mo le tele o fesootaiga i o tatou vaitaimi. Ae peitai, e i ai lava taimi e le mafai ona maua ai se fesootaiga i se telefoni feaveai. E mafai ona tupu lenei mea pe afai o loo i totonu o se ana po o se vanu ia le tagata o loo faaaogaina le telefoni feaveai, po o le i ai foi o se isi mea o loo faalavelaveina ai.

E faapena foi i fesootaiga faalelagi. O le leo itiiti ma le filemu, e ui lava ina itiiti, ae ese le mamana. E “musumusu atu ma ati i mea uma.”¹³ Ae pei o la’u leitio sa alu i maa, e mafai ona i ai le savali iina ae e le mafai ona tatou mauaina. Atonu e i ai se mea i o tatou olaga o loo taofia ai i tatou mai le faalogo atu i le savali aua “ua le lagona e i tatou.”¹⁴ E masani ona tatou tuuina atu i tatou lava i tulaga faaleagaga tatou te le lagonaina ai le Agaga—o tulaga ma nofoaga lea e taofia ai savali mai le lagi. O nisi o nei nofoaga e le maua ai ia fesootaiga e aofia ai le ita, ponokalafi, solitulafono, manatu faapito, ma isi tulaga ia e faatiga ai i le Agaga.

E oo mai savali ia i tatou taitoatasi ma tuusao mai se punaoa faalelagi ma auala mai i o tatou taitai pulefaamalumalu i le Ekalesia. E faapena foi ona sili ona taua o savali ia e oo mai ia i tatou mai o tatou matua ma matua o matua. O savali faamatua atonu e le moomia. Ae o aafiaga na oo i ai ma le gasologa o taimi ua tatou iloa ai o savali musuia mai lo tatou tama ma tina o ni savali o le alofa. O le mulimuli i fautuaga faamatua o se tasi lea o auala e faataunuuina ai le poloaiga, “Ia e ava i lou tama ma lou tina.”¹⁵

O le tasi savali o loo misia e le toatele i o tatou vaitaimi o le afioga lea a le Alii na poloaiina ai i tatou ina ia “tausia i [tatou] ia mama nai le lalolagi.”¹⁶ Ua tauina mai ia i tatou e faapea e toatele e ua valaauina, “ae toaitiiti e ua filifilia,” ma o le mafuaaga ona ua “manumanu o latou loto i mea o lenei lalolagi.”¹⁷

O le savali maoae a le Faaola i totonu o le Lauga i luga o le Mauga o se laau talatala mumu lona taua ia i tatou uma: “Ae ia outou muai saili e fausia le malo o le Atua, ma faatuina lana amiotonu.”¹⁸ O lenei savali e moomia ona ati i totonu o o tatou loto ma agaga. A o tatou taliaina lenei savali ua tatou fuafua ai po o le a le mea o le a tatou lagolagoina ma puipuia i lenei olaga. O le auai e le aunoa i le malumalu o le a fesoasoani lea ia i tatou e saili pea e fausia le malo o le Atua. O lenei ua 117 malumalu i le lalolagi, e lei i ai se taimi muamua na toatele ai nisi na maua le avanoa e o atu ai i maota paia o le Alii.

O se isi savali sili ona taua o le moomia lea ona faamalosia ma puipuia o tatou aiga. Ua tele naua aiga ua malepelepe. O lenei suiga faamomoiloto e i ai ona taunuuga se tele e le gata. O le fiafia i le faaipoipoga e amataina lea i le nonofo faatasi o le tane ma le ava i le alofa, agalelei, ma le fefaaaloaloai, savavali ma le amiotonu ma le faamaulalo i luma o le Alii. O le fiafia i le faaipoipoga e faalagolago lea i le faamaoni i tautoga ma feagaiga uma. Afai e malepelepe ia aiga po o le a lava se mafuaaga, e moomia e matua ona matuai taumafai lava e lagolago ma fesoasoani i tagata o le aiga lea e leai se sala.

O se isi savali taua o lo tatou faamaoni lea i le Alii, faamaoni ia i tatou lava, ma le faamoni i isi tagata uma. E moomia ona tatou totogi se sefuluai faamaoni, ola i mea ua tatou maua, ma sefe mo aso leaga. O le aitalafu o se avega aua “e auauna foi [le] no mea [i le] ua au mai ai ana mea.”¹⁹ O nisi aitalafu atonu e talafeagai, e pei o le mauaina ai o se fale po o se aoaoga. O le fautuaga a le Alii “ia totogi le aitalafu … [ma] faasaoloto oe ia te oe lava mai le pologa.”²⁰

E tuuina mai e le Atua ia i tatou ia savali o faatonuga po o le faamalosiauga ina ia mafai ai ona tatou faia Lona finagalo. E masani ona saunia ai i tatou mo se galuega patino. O le tulaga lea sa ia Mose i le savali o le laau talatala mumu. E tatau ona tatou tausia o tatou olaga ina ia faatulagaina ina ia mafai ona tatou tali atu pe a tatou mauaina se ituaiga savali e pei o se laau talatala mumu e tau mai ia i tatou le mea o loo finagalo le Alii tatou te faia. E moomia ona tatou mautinoa o loo tatou i ai i se tulaga e iloa ai ma fai.

I o tatou vaitaimi, ua tatou mauaina le fia selau o savali mai le tele o punaoa, e le gata i le faalelalolagi ae o le faaleagaga. E mafai faapefea ona tatou iloaina ia savali e sili ona taua ia i tatou? Ou te fautua atu faapea e mafai ona tatou vaavaai i le faapogai o savali ma le uunaiga o loo i ai i tua. Ua tuuina mai e le Alii ia i tatou se taiala e auala mai i le perofeta o Alema: “E mai le Atua mea lelei uma, a e mai le tiapolo mea leaga uma.”²¹ E tatau ona tatou tauivi ia agavaa ina ia aua nei o tatou misia ia savali taua lea e mai le Atua. I le faaiuga lava, o nei savali o loo aofia ai le tuu aofaiga atoa o le talalelei a Iesu Keriso.

O se faamanuiaga sili ia te au le feiloai ma masani ma le sili atu ma le afa o peresitene o le Ekalesia talu mai le Perofeta o Iosefa. Sa ou feiloai ia Peresitene Heber J. Grant a o avea au ma se ositaulaga i le Perisitua Arona. Sa ou lagonaina se alofa mo ia, e pei foi ona ou lagonaina i isi peresitene uma talu mai o ia. Sa ou manao ou te ola e tusa ai ma a latou fautuaga.

I le iva tausaga talu ona avea ai Peresitene Thomas S. Monson ma au o ni fesoasoani ia Peresitene Gordon B. Hinckley, ua ou iloa ma lagonaina ai ma le mautinoa e aunoa ma se masalosalo o Peresitene Hinckley o le Peresitene musuia ma o le perofeta mo o tatou taimi. Ou te molimau atu ua ia iloa ma mauaina ma o le a faaauau pea ona mauaina ia mafaufauga ma le finagalo o le Alii mo nei tagata ma le lalolagi atoa. E tatau pea lava ona tatou saili atu ma faalogo atu i savali faaperofetaga lea e sau mai lo tatou Peresitene o i ai nei o le Ekalesia. Ia faapea ona tatou faia, ou te ole atu ai i le suafa o Iesu Keriso, amene.