Saunoaga Faaiu

O’u uso e ma tuafafine, toeitiiti uma. A o tatou faaiuina lenei konafesi maoae, ou te manatuaina upu o le “Pese” e ola pea a Rudyard Kipling:

A tatou toe taliu atu i o tatou aiga, ia tatou tauaveina le agaga o lenei konafesi. Ia avea mea sa tatou faalogo ma aoao ai, e fai ma aafiaga tumau o le alofa ma le filemu, o se uiga faaalia o le salamo ma se faaiuga e tutu maualuga atu teisi i le susulu matagofie o le talalelei.

Ia susulu atu mai o tatou olaga ma a tatou tāga, a tatou molimau i mataupu faavae sili o lenei galuega, lea ua toe polesi ma faaiila.

Ia faateleina se agaga o le alofa, filemu, ma le faafetai o le tasi i le isi i totonu o o tatou aiga. Ia tatou tamaoaiga i a tatou galuega, ma ia tupu atili lo tatou lima foai i a tatou fetufaaiga. Ia tatou aapa atu ia i latou o siomia ai i tatou, i le faauo ma le faaaloalo.

Ia avea a tatou tatalo ma ala e faaali atu ai lo tatou faafetai i le Pulefaasoa o mea lelei uma, ma le alofa mo Ia, o lo tatou Togiola.

O lenei, o’u uso e ma tuafafine, ou te tau matamuli lava e fai atu se faamatalaga e patino mo sina minute. Atonu ua matauina e nisi o outou le le auai mai o Sister Hinckley. O le taimi muamua lea i le 46 tausaga, talu ona avea a’u ma se Pulega Aoao, ua le auai mai o ia i se konafesi aoao. O le amataga o le tausaga nei, sa matou malaga ai i Aferika e faapaia le Malumalu o Accra Ghana. Ina ua matou tuua iina, sa matou felelei i Sal, o se motu naumati i le Atelani, ma sa matou feiloai ai ma le au paia o se paranesi i le nuu. Ona matou felelei ai lea i St. Thomas, o se motu o le Atu Karipeane. O iina na matou feiloai ai ma nisi o o tatou uso. Sa matou toe taliu mai, ae matapogia ai o ia ona o le vaivai tele. Talu mai lava lena taimi, o feagai pea o ia ma faigata. Ua 92 nei tausaga o lona soifua, e laitiiti teisi ifo ia te au. Ou te masalo ua amata ona uma le maa o le uati, ae tatou te le iloa pe faapefea ona toe faafoi i tua.

O se taimi faanoanoa tele lenei ia te au. E atoa i le masina nei le 67 tausaga talu ona ma faaipoipo. O ia o le tina o le ma fanau talenia ma le atamamai e toalima, o le tinamatua o fanau a le ma fanau e 25, ma le anoanoai o fanau a a latou fanau. Sa ma savavali faatasi i nei tausaga uma, o se paaga tutusa i taimi o afa ma taimi foi o le laofie. Ua faatele ona ia lauga ma molimau e uiga i lenei galuega i le salafa o le lalolagi, ma faasafua atu le alofa, faamalosiauga, ma le faatuatua i soo se mea lava e alu i ai. Sa tusi mai e tamaitai ni tusi mai i itu eseese o le lalolagi e faafetai mai ai ia te ia. Tatou te faaauau pea ona faamoemoe ma tatalo mo ia, ma e tuuina atu foi mai le ta’ele o o ma’ua loto lo ma agaga faafetai mo i latou uma lava sa fesoasoani ia te ia ma tausia o ia, ma lo outou faatuatua tele ma tatalo mo ia. O le aso, pe a tatou taliu atu i o tatou aiga, ua oo mai le lagona ou te faapea atu:

E tatau i alii uma, o tamaitai, ma tamaiti, o tama ma teine, ona tuua lenei konafesi, ua avea o se tagata ua sili atu nai lo le mea sa i ai i le lua aso talu ai. Ou te tuuina atu la’u faamanuiaga ma lo’u alofa mo outou taitoatasi, i le suafa paia o Iesu Keriso, amene.