Ua Tafa Ata o se Aso Matagofie

Pe le o le tuluiga ea lena o le matagofie? Faafetai Liriel Domiciano ma le aufaipese. Oka se tautinoga tele o le faatuatua—“Ua Ou Iloa o Loo Soifua Lo’u Faaola.” Toe faafetai atu mo lena musika faamomoiloto ma le matagofie.

Se’i ou mua’i fai atu lava i tagata uma o le Ekalesia, ma isi, faafetai atu i lo outou agalelei tele ia Sister Hinckley ma a’u. Ua matua tele naua lo outou alolofa ma le agalelei. E matua tuia lava o ma’ua loto i mea uma tou te faia mo i ma’ua. Afai e faatino i le lalolagi uma mea o loo fai mo ma’ua, semanu ai se ese o le lalolagi o le a i ai. O le a tatou fetausia’i i le Agaga o le Matai, o lē aapa mai e faamafanafana ma faamalolo.

O lea, o’u uso e ma tuafafine, ua saunoa atu Peresitene Packer ia te outou e pei o se tamamatua. Ou te fia sosooina se pitofilo mai le ie lino sa ia lalagaina. O a’u foi ia, ua toeaina, e matua atu nai lo ia, pe a mafai ona outou manatu i ai. Ua umi ona ou ola, ua atulasi a’u faigamalaga, ma ua ou vaai i le tele o le lalolagi. A oo i taimi ou te mafaufau filemu ai, ona ou manatunatu lea pe aisea lava e tele ai faalavelave ma mafatiaga i soo se mea. Ua tumu lo tatou vaitau i mea matautia. E tele taimi tatou te faalogo ai i upu a Paulo na fai ia Timoteo: “A ia e iloa e oe lenei mea, o ona aso e gata ai e oo mai ai aso faigata” (2 Timoteo 3:1). Ona ia faamatalaina lea o tulaga o le a manumalo. Ou te manatu ua iloa gofie, e sa’o lava o aso nei e gata ai o taimi faigata ua fetaui lelei lava ma tulaga sa faamatala e Paulo (tagai 2 Timoteo 3:2–7).

Ae o le faigata, e le o se tulaga fou i le aiga. O loo ta’u mai i faaaliga “sa tau le taua i le lagi: o Mekaeli ma ana agelu ua latou tau ma le tarako; ua ‘au foi le tarako ma ana agelu,

“A ua latou le manumalo; e le toe maua foi i le lagi se mea e nonofo ai.

“Ua lafo foi le tarako tele o le gata tuai lea, ua igoa i le Tiapolo, i le ma Satani, o lē faasese i le lalolagi uma: ua lafo foi ana agelu faatasi ma ia” (Faaaliga 12:7–9).

Ai se matautia o lena taimi. O le Silisili Ese lava Ia ua faafesaga’i i se fetauiga ma le atalii o le taeao. Sa tatou i ai iina i le taimi sa tupu ai lena mea. Ai se matua faigata o lena tauiviga, ma se manumalo tele a’ia’i.

Sa fetalai le Alii ia Iopu mai le afā e faatatau i lena taimi matautia, ma faapea mai:

“O ifea sa e i ai ina o ou faavaeina le lalolagi? …

“Ina o pepese faatasi fetu o le taeao, ma alalaga fiafia atalii uma o le Atua?” (Iopu 38:4, 7).

Aisea sa tatou fiafia ai i lena taimi? Masalo, ai ona ua manumalo le lelei i le leaga, ma sa i ai uma le aiga o le tagata i le itu o le Alii. Tatou te fulitua i le fili, ma tatou tutu faatasi ma ‘au a le Atua, ona manumalo ai lea.

Ae ina ua uma ona faia lena faaiuga, e tatau la i se a ona tatou toe faia ma saga faia ina ua tatou fananau mai i le olaga nei?

Ou te le malamalama pe aisea ua matua toatele ai i latou ua lafoai i le olaga, le faaiuga sa latou faia ina ua tula’i mai le taua tele lea i le lagi.

Ae o loo molimauina le taua i le va o le lelei ma le leaga, lea na amata i lena taua, e le i uma lava. Sa fai ai pea, ma o loo faia pea lava i le taimi nei.

Ou te manatu, ai o tutulu lo tatou Tama ona o le toatele naua o Lana fanau, i le tele o augatupulaga, ua latou faaaogaina lo latou saolotoga na Ia tuuina atu ia te i latou, ma ua filifili ai e savavali i le ala o le amio leaga nai lo le lelei.

Sa alia’e mai le leaga i le popofou o lenei lalolagi, ina ua fasiotia e Kaino ia Apelu. Sa faatetele seia oo lava i ona po o Noa, sa “silafia e Ieova ua leaga tele lava tagata i le lalolagi, o manatu uma ua mafaufau ifo ai i o latou loto, ua na ona leaga i aso uma lava.

“Ua salamo foi Ieova, ina ua faia e ia tagata i le lalolagi, ma ua tiga ai lona finagalo” (Kenese 6:5–6).

Sa ia poloaiina Noa e fau se vaa “na faasaoina ai tagata e toaitiiti, e toavalu (1 Peteru 3:20).

Sa faamamaina le lalolagi. Sa toe matutu le vai. Sa toe amatalia foi le amiotonu. Peitai, e le i umi foi ae toe matua faateleina naua le fanauga a tagata ua toe foi i o latou ala tuai, o le le usitai. O tagata o aai o fanua laugatasi, o Sotoma ma Komoro, o faataitaiga ia o tulaga toilalo ma le faalumaina sa goto ifo i ai tagata. Ma “sa [matua] faaumatia e le Atua o aai o le fanua laugatasi” i se faatafunaga mulimuli (Kenese 19:29).

Sa alagaina e Isaia:

“O a outou amio leaga ua fai ia ma pupuni i le va o outou ma lo outou Atua, o a outou agasala foi ua ‘alo ai ona fofoga ia te outou ua ia le faafofoga mai ai.

“Aua ua leaga o outou lima i le toto, ma o outou tamatamailima ua leaga ia i le amio leaga; ua tala pepelo o outou laugutu, ua tautala o outou laulaufaiva i mea faapiopio” (Isaia 59:2–3).

E faapena foi i isi perofeta o le Feagaiga Tuai. O le mataupu taua lava o la latou savali, o le aoaiga o le amioleaga. Ma o le faigata foi o na taimi, e le o se mea e fou i le Lalolagi Tuai. O loo tusia i le Tusi a Mamona, o le Itu Lalolagi i Sisifo, sa tau ai ‘au a sa Iareto seia oo lava ina fasiotia. Sa tau foi sa Nifae ma sa Lamana seia faitau afe tagata e maliliu, ma fealualua’i solo ai Moronae ina ia faasaoina lona ola (tagai Moronae 1:3). O lana toe olega tele, sa faasino ia i latou i o tatou aso, o se valaau ia amiotonu:

“Ma ou te toe apoapoai atu ia te outou ia outou o mai ia Keriso, ma fetagofi atu i mea alofa lelei uma, a e aua le papa’i atu i le mea alofa leaga, po o le mea ua le mama” (Moronae 10:30).

A o femaliua’i le Faaola i le lalolagi, “sa agalelei”o Ia (Galuega 10:38), ae sa Ia tausalaina foi le pepelo o tusiupu ma faresaio, ma ia faatusaina ai i latou i “tuugamau ua faasinasinaina” (tagai Mataio 23:27). Sa ia tutulia i fafo tagata faatau tupe i totonu o le malumalu, ma faapea atu, “O lo’u fale o le fale tatalo lea; a ua outou faia ma ana o e faomea” (Luka 19:46). O se taimi foi o le mata’utia lena mea. O Palesitina o se vaega o le Malo o Roma, o lona pulega e matua tamau ma ogoogo, e saua, ma tumu i mea leaga.

Sa alaga atu tusi a Paulo ina ia malolosi soo o Keriso, ina nei o latou pauu atu i le ala o e amioleaga. Peitai, na iu lava ina manumalo le agaga o le liliuese.

Sa ufitia le lalolagi i le valea ma le amioleaga, na mafua ai Tausaga o le Pogisa. Sa valoia e Isaia: “E ufitia le lalolagi i le pouliuli, e ufitia foi nuu i le pogisa” (Isaia 60:2). E tele seneturi, sa le ma tineia faama’i ma sa faasauatoa le mativa. Sa faaumatia le 50 miliona e le Oti Uliuli i le seneturi e 14. Pe le o se vaitau ea lenei o faigata matautia? Ou te le i loa pe na faapefea ona ola tagata.

Ae peitai, i lena vaitau umi o le pogisa, sa faamumuina se moliga’o. Na aumaia e le vaitau o le Toefaafouga, se fuga sa taufuifui mai ai aoaoga, o faatufugaga, ma le faasaienisi. O iina na oo mai ai se mau a ni alii ma tamaitai lototetele ma le totoa, o i latou ia sa vaavaai a’e i le lagi ma le agaga faafetai i le Atua ma Lona Alo Paia. Tatou te faaigoaina o le Toefotua’i.

Ona mavae lea o le tele o augatupulaga, sa ola ai i le lalolagi—e toatele naua o taua, o le feitaga’i, pogisa ma le amioleaga—ona oo mai ai lea o le aso maoae fou o le Toefuataiga. Sa tatala mai lenei talalelei mamalu i le faaali mai o le Tama ma le Alo i le taulealea o Iosefa. Ua tafa ata o le tisipenisione o le atoaga o taimi, ua alafa’i mai i le lalolagi. Ua toefuata’i mai mea lelei, o mea matagofie, ma le paia o tisipenisione uma ua mavae, i lenei vaitau ofoofogia.

Peitai sa i ai foi le amio leaga. Ma o se tasi o faailoga o lena amio leaga, o sauaga. Sa i ai le inoino. Sa i ai le tutuli ese mai aiga ma savaliga fai faamalosi i le taimi o le taumalulu.

Sa pei lava ona ta’ua e Charles Dickens i laina amata o lana O Se Talafatu i Aai e Lua: “O se vaitaimi pito sili lava lena, o se vaitaimi pito leaga foi lea, … o se vaitaimi o le Malamalama, o se vaitaimi foi o le Pogisa, o se vaitaimi o le totogo ae o le faamoemoe, o le vaitaimi foi o le malulu o le loto vaivai.”

E ui lava i le tele o le amioleaga o nei taimi, ae oka se mamalu o lena vaitau ma le taimi nei foi. Ua oo mai se aso fou i le galuega a le Silisili Ese. Ua tupu ma ola lena galuega ma ua malosi, ma agai atu i le salafa o le lalolagi. Ua pa’i atu nei mo le lelei o le faitau miliona o soifua, ma ua na o se amataga lenei.

O lenei amataga tele, ua to faaua mai ai se poto salalau maoae i le lalolagi.

Manatu i le faateleina o le umi o le soifua. Manatu i le ofoofogia o vailaau faaona po nei. Ou te maofa lava. Manatu i le fuga tele mai o le malamalama. Manatu i le maoae ua i ai femalagaaiga ma fesootaiga. Ua foliga mai e leai se tuaoi o le tomai o le tagata, pe a musuia e le Atua o le lagi ma liligi mai le malamalama ma le poto.

O loo tele pea lava feteenaiga i le lalolagi. O loo mata’utia le mativa, o faama’i, ma le inoino. O loo faatufanua lava le tagata i ana faiga saua i tagata. Ae, o loo mamalu lava lenei tafa mai o ata. O le “La o le amiotonu” ua oso a’e “ma le mea e malolo ai i ona apaau” (Malaki 4:2). Ua faaalia mai e le Atua ma Lona Alo i La’ua lava. Ua tatou iloa i La’ua. Tatou te tapuai ia te i La’ua “i le agaga ma le faamaoni” (Ioane 4:24). Tatou te alolofa ia te i La’ua. Tatou te faamamaluina i La’ua ma saili e faia o La’ua finagalo.

Ua tatalaina mai e ki o le perisitua e faavavau ia mea sa i ai i aso ua mavae ia sa loka.

Taimi faigata? Ioe. O taimi faigata nei. Ae na soifua lava le tagata i faigata mai le taimi a o le’i foafoaina le lalolagi. Tasi o le mea, o taimi pogisa uma lava, e i ai lava si malamalama itiiti ae matagofie. O lea foi ua i ai se sulu faaopoopo, ua malamalama ai le lalolagi. O loo ave atu ai le ata o le fiafia a le Atua, mo Lana fanau. O loo ave atu ai le maoae ma le ofoofogia o le Togiola a le Faaola, e le mafuatiaina e le malamalama.

E maeu lo tatou faafetai i le Atua o le lagi, mo Lana tausiga agalelei i Lana fanau, i le saunia o mea mo i latou, i taufaamata’u uma o le faavavau, o le avanoa o le faaolataga ma le faamanuiaga o le faaeaga i Lona malo, pe afai latou te ola i le amiotonu.

Ma, ou uso e ma tuafafine, o lea ua i ai i o tatou luga taitoatasi se matafaioi tele ma le lofituina. Sa saunoa Peresitene Uilifoti Uitilafi i le 1894:

“E i ai le Silisili Ese ma lona nuu. O le a tatou maua faaaliga uma tatou te manaomia, pe afai tatou te faia o tatou tiute ma usitai i poloaiga a le Atua … . A o ou … ola, ou te manao e fai lo’u tiute. Ou te manao i le Au Paia o Aso e Gata Ai e fai o latou tiute. Ua i ai iinei le Perisitua Paia… . E tele ma silisili ese lo latou tiutetauave. O loo matau mai i tatou e le silafaga a le Atua ma perofeta paia uma. O le tisipenisione sili lenei sa tautalagia ina ua faatoa faavae le lalolagi. Ua faapotopotoina faatasi i tatou … i le mana ma le poloaiga a le Atua. O loo tatou faia le galuega a le Atua… . Ia tatou faataunuu la tatou misiona.” (in James R. Clark, comp., Messages of the First Presidency of The Church of Jesus Christ of Latter-Day Saints, 6 vols. [1965–75], 3:258).

O la tatou lu’itau tele ma le malosi lenei, uso e ma tuafafine. O le filifiliga lenei e tatau lava ona tatou faia e le aunoa, e pei lava ona filifili ai e augatupulaga sa muamua atu ia te i tatou. E tatau ona tatou fesili ifo ia i tatou lava:

Pe ua tatou malamalama moni ea, pe ua tatou malamalama i le taua tele o mea ua ia i tatou? O le tuluiga lenei o augatupulaga o le tagata, le lautusi faai’u o le vaaiga i aafiaga o le tagata.

Ae le faapea o le a tuu ai i tatou i se tulaga o le faasausili. E leai, e tatau ona faalotomaulalo ai i tatou. E tuu mai ai i o tatou luga, se tiutetauave e le mafaamagaloina, ia aapa atu ai ma le alofa i isi tagata uma, i le Agaga o le Matai, lea sa aoao mai, “Ia e alofa atu i le lua te tuaoi, ia pei o oe lava ia te oe” (Mataio 19:19). E tatau ona tatou lafoa’i i le faafiaamiotonu, ma o ese mai i lou manatu ifo ia te oe lava.

E tatau ona tatou faia mea uma e manaomia, mo le tuleia i luma o le galuega a le Alii i le fausiaina o Lona malo i le fogaeleele. E le mafai lava ona tatou feetuuna’ia le aoaoga faavae, na ala mai i faaaliga, ae e mafai ona tatou ola ma galulue faatasi ma isi, ma faaaloalo i o latou talitonuga ma talisapaia a latou amio solia, galulue faatasi e tetee atu i aoaoga taufaasese, o feupua’iga, o le matau’a—o mea mata’utia na sa i ai i le tagata mai le amataga.

E mafai ona tatou tausi tuaoi, e mafai ona tatou fesoasoani, e mafai ona tatou alolofa ma agalelei, e aunoa ma le lafoa’ia o se elemene o a tatou aoaoga faavae.

O i tatou i lenei augatupulaga, o taunuuga ia o mea uma sa muamua atu. E le lava le na ona iloa o [oe] o se tagata o lenei Ekalesia. Ua i o tatou luga se matafaioi paia. Ia tatou talia ma faataunuuina.

E tatau ona tatou ola o ni soo moni o le Keriso, ma ia alolofa i tagata uma, taui atu le leaga i le lelei, aoao atu ala o le Alii e ala i faataitaiga, ma faataunuuina le galuega tele ua Ia tuu mai mo i tatou.

Ia tatou ola agavaa mo le meaalofa mamalu o le malamalama ma le poto ma le upumoni e faavavau lea ua oo mai ia te i tatou e ala mai i faigata uma o aso ua mavae. I se isi itu, mai ia i latou uma sa soifua i le lalolagi, ua aumaia i tatou i lenei vaitau tulaga ese ma le matagofie. Ia loto faafetai, ae o le sili o na mea uma ia faatuatua. O la’u tatalo lea ma le lotomaulalo, a o ou molimau atu i le moni o lenei galuega, i le suafa paia o Iesu Keriso, amene.