Kataia Karaoia n Taainako

Imwain ae I tuangko uoua karakin maiu, I kan kaota te bwai teuana ae I aki toki n taekinna nakoia au mitinare ngke I beku bwa te beretitenti n te mition. Inanon Tataekina Au Euangkerio Beretitenti Ezra Taft Benson (1899–1994) e bon manga taekinaki ana taeka ni kangai: “I aki toki n taekina ae teuana ae raba mani kakannato ibukin te mwakuri ni mitinare bon te mwakuri! Ngkana e mwakuri te mitinare, e na karekea te Tamnei; ngkana e karekea te Tamnei, e na reirei man te Tamnei; ao ngkana e reirei man te Tamnei, e na rooti nanoia aomata ao e na kukurei. A na akea ururingan te mweenga, akea te raraoma ibukin te utu, ibukin te tai ao taarena ao mamaten te nano ni kabane a boboto iaon te mwakuri ni mitinare. Mwakuri, mwakuri, mwakuri—bon akea onean mwina ae kakukurei, ni kaineti riki inanon te mwakuri ni mitinare.”¹

Inanon te boki n te taetae n Spain ibukin aia Bokinikairi Mitinare, are ti kabongana imwain Tataekina Au Euangkerio te taeka mwkauri e bon rairaki n ai aron karaoia Inanon raonakin ni kataia ni karaoia, ko riai ni kabotoa raoi am tai, taarena, ao mamaten nanom. E riai aei ibukin te tokanikai. Ao ngkana ko kukurei n onea mwin te un ke marakinnano, am mwakuri e na kawari bwaai aika tamaroa.

I reireinaki te ware aei inanon oin maiu. I a tia ni moanna ni mwakuri n te kambwana ni bwaa ae bubura imwin ae I bwabetitoaki. Taian koaua aikai ibukin te mwakuri a roko inanon maiu ao ni karika te waakirake inanon te kambwana.

Iai temanna te manatia n te kambwana ae korakora mwaakana. E bubuti bwa uoman man taabo ni mwakuri a na buokia ni karaoan te warebwai. Ao e taku bwa e na ti riai te aomata n ataa teutana taekan te akaunti.

I a tia ni kamatebwaia n te reirei ni kamwakuri, ao I a tia ni karekea au beebwa man taian kiraati ake iri. E tuangai au mataniwi n au tabo ni mwakuri, “Nako tuangnga ae ko na buokia ni warebwai ao bwa ngkoe bon te akauntanti.” E kan noora ana kaeka te mwaane are temanna ibukina ngkai I rangi ni uarereke.

Ngke I a roko, e titirakinai te manatia bwa tera ae I tangiria. I kaeka, “N na buokiko ni warebwai.” I karaoa aron tuangakiu iroun au mataniwi ao n tuangnga ae bon ngai te akauntanti. E ngare.

Imwina e taku, “E raoiroi, Ten Akauntanti, nakomai tekateka n au kaintekateka. Ana te mitiin ni ikoti aei, ao ikoti bwaai ni kabane iaon te rain ni kabanea baitiim.”

I moanna ma teuana tabonibaiu, ni karaurau. E kanakoai ma te kaintekateka ma n taku, “Akea te bwai ae ko ataia; ko na katuaeaki. Ko na tekateka ikanne imatau inanon uoua te wiiki, n tara aron karaoan te mwakuri.”

I mwaewe nakon te kaintekateka teuana. E taku, “Taraai.” E moanna ni ikotaki n rangi ni baiti, n aki tarai baina. I bon miimi. I taku bwa e bon manikangare n ae N na tataraia ni mwakuri uoua te wiiki, ma e bon aki.

N te moan bong I tekateka ikekei onoua ke itiua te aua. N te tairiki arei I tiku imwin te mwakuri n taninga nakoia ni kabane man te kateitei. Imwina I nakon ana aobiti ma n onea beebwan te mitiin ni ikoti ao mani moana te kataneiai ni ikoti rain n arona ni karaoi. I mwakuri n aua aika mwaiti mani baiti ao ni baiti riki ao ni baiti riki. Ngke I a namakinna karaoan ae baiti ke ni baiti riki nakon are e karaoia, I nako ni matu teuana ke uoua te aua.

Te ingabong are imwina I ti teboka ubuu ao ma n otinako ma a moantaai n uki, imwin rokon te manatia I a nakoina. I karebwerebwe n te mataroa. E taku, “E raoiroi, ko tekateka ikekei ao tara ae N na karaoia.”

Ngke e kamaiua te mitiin ni ikoti, e tara n ae karaurau irou. I a tia ni kataneiai itiua te aua n aki toki. I karaua ni keebutia ao ma n tuangnga n tekateka n au kaintekateka. I a moanna ni ikotaki n rangi ni baiti. E bon miiroaroa.

E taku, “Tera ae ko a tia ni karaoia?” E tauai n te matoa bwa N na tuangnga. E taku, “Ni moa man ngkai, ibukina bwa ko a tia n reireinaki aei, ko na mwakuri ma ngai, ao N nang reireiniko bwaai ni kabane ake I atai.

I bita au tabo ni mwakuri. Imwin tabeua ririki e keerikaki, ao I a kona n onea mwina ibukin ana taeka ni boutoka. I kabongana karaoana ao te aki kabane tai, ao I bon kukurei n te bwai ae I karaoia. I bon aki un ngke e katuaeai n te moan tai.

Ko kona ni karaoa ae tamaroa. Ko na ti riai ni kakorakora karaoakina, ni kabanea iangoakina, mani kukurei.

E kainaki te kambwana are I mwakuri iai. I mwaewe nakon te kaawa ae bubura ae Mexico, ao ibukina ngkai I kani mwakuri, kororeta nakon te mwakuri ae aki teimatoa ma te kambwana ni boreeti ae iai mwaangana ni kabuta te aonaaba. A tangirai bwa N na karaoa te warebwai, ae te bwai ae kanga e rianako rabakau iai. I karaoa te warebwai inanon uoua te wiiki. A anganai te mwakuri ae teimatoa n te boo ae tamaroa, ao I butimwaaia.

I aki taetae ni Imatang n te tai arei. Ara tarekita, te mwaane mai Texas ae aki kona n taetae n Spain, e taku nakon au mataniwi, “Te ataeinimwaane aei e karaoa te mwakuri ae tamaroa. Ngkana e ata te taetae ni Imatang, ti na kona ni kabooa n ae mwaiti riki. Ti na kanakoa nako New York ibukin te kataneiai, ao e na kona n riki bwa te manatia ikai.

Ngke e tuangai au mataniwi anne, I titiraki, “Ti ae N na karaoia reiakinan te taetae ni Imatang?”

I bon mareaki n te tai anne. E bon taetae ni Imatang buu te aine ibukina bwa neiei e bon bungiaki ibuakoia kaain te Ekaretia iaon Mexico. Te moan tai ae I kataia n taekin tabeua taeka ni Imatang, e tuangai temanna bwa N na aki kataia. Bon tiaki tibwangau.

Ngkai I a bon kaungaaki nanou n te iango ibukin katamaroan nakoau n au mwakuri mani karekean au tai ni mwananga nako New York. I a nakon te reirei ibukin te taetae ma n tuangia ae I kan reireinaki te taetae ni Imatang n te aro ae I kona ni waekoa.

A titirakinai, “Mwaitira ae ko ataia?”

I taku, “Akea teuana te taeka. I aki ataa naba ‘Mauri n te ingabong.’”

A taku, “Iai ara kooti ae mwaiti kanoana ibukin uoua te wiiki, 16 te aua n te bongina. Waniua te aua ikai ma taan reirei ao waniua te aua inanon mweengam ma taian teibi. Boona $1,000.”

I taku, “I kona ni karaoa anne. N na bubuti ibukin au motirawa, ao I kona ni kamatebwai 16 te aua ibukin uoua te wiiki.”

I a nakon au mataniwi ma n taku, “N nang reireinaki te taetae ni Imatang inanon uoua te wiiki, ao ko na kabwaka ti $1,000.” E ngare ma n taku, “E aki kona ni karaoaki. I reireinaki inanon uoua te ririki.”

I tuanga au mataniwi, “Bubutia te tarekita n anganai uoua te wiiki ni motirawa ao ni kabwaka boon te kooti. Ngkana imwin uoua te wiiki I aki kona n taetae ni Imatang, ngkanne ko kona n anaa te roo man au bwakabwai.

E anga te kariaia

I a nakon te reirei. Ni katoa 45 miniti ibukin waniua te aua, a bitia taan reirei. A reirei mani kataneiai iaon taeka ma nanoia, kibuntaeka, ao taeka ni marooro.

Imwin waniua te aua n reirei, I a nako ni kakaeia taan neweaba ake a taetae ni Imatang ma n taetae ma ngaia. Imwina I kakauongo waniua te aua n taian teibi.

Ibukin raoi ae I nakon te reirei bon tiaki te reirei te taetae ni Imatang. I rangi n tangiria n riki ni manatia ao n nako New York. Ibukina ma I rangi n unga nanou, e bon aki matoatoa irou te reirei te taetae ni Imatang. I rangi ni kukurei n taai nako iai.

Ngke I a tia ni kabanea te aua ni kamatebwai ae 224 te aua, I a kona n reitaki n te taetae ni Imatang. I ataia bwa tuoau bon te reitaki ma au tarekita. Ngkana I aki kona, N na riai ni kabooa mwin te $1,000. Ngaia are I a karaoa te babaire. N na taetae nakoina n aron baike I a tia n reiakin. Ngke I a rin n ana aobiti, I a taetae ma n taetae inanon 20 te miniti ma n anganna ana tai n taetae. E taku, “E a tau. Kanakoa nako New York.” Ao I bon nako New York!

I kona n tuangko bwa ngkana ko tangiria n tokanikai n te bwai teuana, ko riai ni kabanea raoi am iango iai, ni kabanea raoi te korakora ni karaoia, ao man ti kukurei n te bwai are ko karaoia. Te aekaki ni waaki aei e kona n anganiko bwaai ni kabane. Ko kona n reiakina ae mwaiti mani katiai kouru aika tau. Kukurei n te bwai are ko karaoia, e ngae ngkana e matoatoa. Karaoia iaon am mition ke inanon nako waakin maium. N aron ana taeka Beretitenti Benson, “Mwakuri, mwakuri, mwakuri.”