Reireina Raom

Ira mwanangan te reirei ibukin uoua te bong ma kain te koraki nimaua ao onoua bwa ti na reirei taekan te maiu ngkoa rinanon kamatebwaian taian rii. I mena n teuana ruun te auti ni irua ma raraou aika teniman. Raou temanna e kunea te Bwaibwara n ruun te kabwate ae uarereke i rarikin te kainiwene. E kaukia mani kabuta tabonibaina iaon baana ao imwina e tuangai bwa N na buokia ni warekia. I kuba nako irouna ngkai e aki ata naba karakin teuana te Bwaibwara ae I taku bwa e bane n ataaki irouia aomata. I reireinna tekan te Karikibwai, Atam ma Nei Eva, ao te Mangauti. I tuangnga naba ibukin Iotebwa Timiti. I karakin naba nakoina karaki tabeua are I reireinaki n te Moanrinan.

Imwiina, I namakinna ae ti riai n tataro. I angan raou te tataro bwa e na karaoia. I kairia n te tataro n taekin moa tabeua taeka ao ngaia e ririmwin are I taekinna. I namakina te abue inanou ao raou e taku bwa e namakina te kukurei inanona.

I aki kantaninga anne bwa e na riki n te mwananga ni kamatebwai i tinanikun te tabo n reirei. I rangi ni kukurei bwa ngkana e na reke au tai n riki bwa te mitinare, I a tauraoi ao I aki maaku n tibwaua au koaua.