Tibwauaan te Tai

E na Matoatoa ara Utu

Iroun Cheryl Esplin

“Ao e na aki reke te nano ni kani kaikoaka temanna, ma ti te kani maeka inanon te rau” (Motiaea 4:13).

Te roobu e karaoaki man taiani karai aika bootaki ao a biraki ni kakooaki. Ngkana e moti ke koreaki teuana te karai e na karika te mamaara nakon te roobu.

Am utu e na kona ni kabotauaki ma te roobu. Kaain te utu n tatabemaniia a kona n riki bwa te karai. Ngkana kam bane ni mwakuri ibukin te raoiroi, te utu ae bwanin e na marurung. Ni kabane kaain te utu iai katabeaia imarenaia bwa ana ibuobuoki ni kakorakoraia.

Iangoa aron Nibwaai ao arona ni kakorakoraa ana utu. N aia tai ni mwamwananga inanon te rereua, ao ana kai ni katebe Nibwaai e mwaoto. E aki kona n reke kanaia, ao a bane n taonaki n te kua ao te baki. A mwaiti kaain te utu aika un iroun Nibwaai,ao a ngurengure nakon te Uea.

Nibwaai e aki ngure ke nuun. E karaoa nnen karain ana kai ni katebe riki teuana man te kai ao te kai ni katebe man te kai ae eti. E titirakina tamana, Riai, te tabo ae na nako iai ni karekea kanaia. E a kona ngkanne Nibwaai ni karekea te amwrake ibukiia kaain ana utu. A kukurei, ao a karinanoia man anga aia karabwarabwa nakon te Uea. (Tara 1 Nibwaai 16:18–32.)

Ngke ma kaain am utu kam kona ni uaia ni buokingkami bwa kam na korakora ngkana kam bootaki n tataro, kam ibuobuoki imarenami, kam kaota te akoi ma te tangira, kam bootaki ni wareki booki aika tabu, kam kakukurei ngkami ni bootaki n takakaro, ao kam karaoa te bootaki n utu n te tairiki.

Te Waaki ae na Karaoaki

Kanakoa te iteraniba R5 man te maekatiin, ao kanimmwa iaon te beebwa ae matenten riki. N tain te bootaki n utu ibukin te tairiki, maroro iaoni bwaai aika ana kakorakora te utu. Korei iango aikai iaon te tiata. Iai uoua iango aika a kaman rineaki. Katinea te tiata n te tabo ae na kai noraki iai irouia kaain te utu ao okiria n taai nako ibukin kairan ami waaki.

E na Korakora Ara Utu

1. E kona ni bootaki n tataro ara Utu

2. A kona ni bootaki ni kabanea aia tai irouia kaain ara utu.

Iango ibukin Tibwauaan te Tai

Te tataro n te utu e kakorakora au utu. Ngkai e tabe ni wareka 3 Nibwaai 18:12 ataein te kirati ae te kabanea ni ikawai ni kanenea bwanaana, tuangia ataei ake tabeman bwa ana kakauongo nakon ana kaetieti Iesu Kristo nakoira bwa ti na karaoia (tataro inanon ara utu). Karekei kaeka. Rineia onoman ataei ao tuangiia bwa ana tei i moa. Kanimwa te taeka iaoia n aki ira etin te koroboki: te tataro, n te utu, e, na, kakorakora, au utu. Tuangia ataei bwa ana buoka kaetaia bwa e na eti raoi nnen te koroboki. Bootaki ni warekia. Kaota te Gospel Art Kit 606 (Te Tataro n te Utu), ao kabwarabwara bwa ti kaungaaki bwa ti na karaoa te tataro n te utu ni katoa tairiki ao ni katoa ingabong. Anganiia ataei bwa ana iangoi bwaai aika a kona ni karaoi ni buoka aia tataro n te utu. Korei aia iango iaon te burakibooti. Tuangiia ataei bwa ana kaini mataia mani iangoa aia utu aika a katorobubua n tataro, ngkai ko anenea te kuna ke anenen te Aro ibukin te tataro. Angania ataei te bentira ao te beebwa ae koreaki iaona “te tataro n te utu e na kakorakora au utu.” Tuangiia ataei bwa ana koroi tamneia kaain aia utu ngke a katorobubua n tataro. Kaungaia bwa ana uoti aia tamnei nakoni mweengaia mani katinea n te tabo ae na kauringiia aia utu bwa ana karaoa aia tataro n te utu.
Warekan te koroboki ae tabu e kakorakora au utu. Kaokoroa te Bwaibwara, Ana Boki Moomon, Doctrine ao Covenants, ao te Pearl of Great Price. Karaoa te takakaro ae ana iangoia bwa te boki ra ae ko nanonna ngkana ko kaota rongorongona ae kimototo. Te katoto: “Te boki aei a taekina karakin Iotebwa Timiti ngkoa, ao iai inanona te Article of Faith” (Pearl of Great Price). Ngkana e reke te boki are taekinaki, tuangia ataei bwa ana bane n taekina arana n te tai ae ti teuana. Reirei bwa booki aika tabu bon ana taeka te Atua. A reirei taekan Iesu Kristo ma Ana euangkerio. Booki aika tabu a kona ni kakorakorai ara utu ngkana e aki bwaka ara wareware iai. Tibwa teuana maibuakon taiani bwai ni kakoaua ibukin booki aika tabu aikai ni katoaia taiani kiraati: Te Otinako 20:12; Ioane 13:34; I-Ebeto 4:32; 1 Nibwaai 3:7; 3 Nibwaai 18:21; Doctrine ao Covenants 59:7. Katoai baia ataei n te beebwa ae akea korobokiana ao te bentira.Tuangia ataei bwa ana kakauongo raoi ngkana e wareka te boki ae tabu te tia reirei. Imwina, ana bane ni kakaea te bwai teuana ae taekinaki n te boki ae tabu ae na buoka ana utu bwa e na korakora ao e na kukurei.Tuangia ataei bwa ana koreia n te beebwa ao imwina ana tibwauaia ma raoia n reirei. Kaoa te kiraati teuana imwiin teuana bwa ana wareka are a koreia nakoia ataein te Moanrinan. Taekina ae ko a tia n ataia bwa te koroboki ae tabu e a tia ni kakorakora am utu. Kaungaia ataei bwa ana wareki booki aika tabu irouia n ti ngaia ao ma aia utu.

Kabwarabwaraaki n te Korotamnei iroun Dilleen Marsh