A Onrake Nanora n te Akoi

Natiu aine, ake 8 ao 10 aia ririki ni maiu, a tara n ae a rikirake n raroa ao n raroa nako imarenaia. Ngkai tinaia ngai, e maraki nanou n nooran te waaki ni kakauntaeka imarenaia ao te mata ni kairiiribai ae a kaotia imarenaia.

N te tai aei I bon tataro ni koaua nakon te Uea ni buokai ma oin mamaarau. I tataro bwa E na buokai n te bwai ae I riai n reiakinna n taekan te akoi, ao I bon kairaki nakon tabeua ikotan taeka aika tikiraoi ni koroboki aika tabu.

Te tairiki teuana e a roko n tokina te kangaanga ma natiu aine, e a koro uniu ao, imwin takaruau ao uniu nakoia, I a tebururu n otinako ni katoka uniu mani iango. Imwin tabeua te miniti, e a moanna ni marau nanou iroun te Tamnei, e kaungai bwa N na rin ao ni kabwara au bure nakon natiu te aine are te kabanea ni ikawai are moan te rootaki riki n uniu.

Ngke I a rin nakon ana ruu ni matu, I a noora natiu te aine ae 10-ana-ririki ni maiu ni katorobubua, n tang. E taraai ma ranin matana ao e taku, “I aki ataa te bwai ae N na karaoia.” E tuangai bwa e kan tataro mani wareki booki aika tabu bwa e aonga n namakina ae tamaroa riki, ma e aki kona ibukina bwa e namakina ae buakaka.

Ngke e tuangai aron nanokawakina ni bukinaki n ara kauntaeka ao e taku bwa bon tiaki au bure, ao I a bon namakina te mama. Ti taetae teutana ao imwina ti tarai koroboki aika tabu, ike I wareka nakoina taekan te akoi, “ana tangira ae kororaoi Kristo Moronai 7:47 ao n tibwauai tabeua bwaai ake I a tia n reiakin. N te tai arei tarina ae uarereke riki e taraira inanon te ruu, ao ti kaoia n raonira. I mwina I a kabwarabwara, n taeka ake e na mataata iai ae waniua-ana-ririki ni maiu, te bwai are ti a tia ni warekia n taekan te akoi.

Imwina ngke I a bane, a uaia n tarai ataeinaine aikai ma aron mataia ni kaota nanoia ni kan karekean te aekaki n tangira ae taekinaki inanon koroboki aika tabu. Imwina ti katorobubua ao, n aron ana taeka n reirei Moomon, n tataro ma te nanorinano nakon te Tama ni kaonira ma ana tangira (tara Moronai 7:48

N ringaaki n te Tamnei, ti a bon tang. Ti teirake, mani irabwati, mani kaoti ara tangira nakoira n tatabemania nako. N te tai arei I a noora te waaki ni iraorao ao ni itaritari ae akea tokina ni moanna n rikirake imarenaia natiu aine, ao I bon karekea raun nanou.

Aia reitaki e teimatoa n rikirake mai mwin arei. A karekea te nano ni kaeti aroia n aki nako raoi, ni kaotan riki te taotaonaki n nano, ao n tibwauai aia bwai. I kakaitau ibukin nanoia ao korakoraia ni karaoan ae kororaoi.

N na bon kawakina raoi te bwai are e a tia n riki arei n taai nako, ao I tataro bwa a na mwaiti riki n arona ngkai ti teimatoa ni kakorakora te reitaki ibukin te akoi ao te tangira inanon mweengara.