Uotai nakon te Tembora
Te Kaonobong teuana ngke I mwakuri inanon te Lima Peru Tembora, te kurubu n ataei tao 20 mwaitia man teuana te titeiki i Lima a roko. Imwin au kamauri ni kukurei nakoia ataei n tatabemania nako, e a taetae nakoia te beretitenti n te tembora n taekan te mwakuri ae tabu n te tembora. E kaatuua riki taekan reitakin te utu ao nanon te ikotaki n taeka “Utu ae akea tokina.”
A karinerine ataei ma n ongora raoi. Temanna mai buakoia taan roko aikai bon te ataeinaine ae nimaua ana ririki, ae arana Rosita. N te tairiki anne e aki mamatu ni karokoa e oki tamana man ana mwakuri, ma n tataningaia imataniwin ana kainiwene.
Ngke e a oki, e bon miimi n noora natina te aine n teimatoa n taratara. E kibanako Rostia man te kainiwene mani biri nakoina. E tabekia rake, ao neiei e rabwata roroana ma n arokia.
“Ao e uara Rosa te uarereke?” e titiraki.
“I marurung, Tamau.”
“Ko a tia n ongotaeka n te bong aei?”
“Eng, Tamau.”
“Iai te bwai teuana ae ko tangirai ni karaoia ibukim?”
E katoua atuuna neiei.
“Terana? Tera ae ko tangiria, matennanou?”
“Tamau” e taku neiei, n toki teutana, “nningai ae ko na uotai nakon te tembora?”
E toki teutana tamana tabeua teekan imwain ae kaeka.
“N na uotiko, Rosa. Ma I bon mwakuri korakora moa ngkai, ao I rangi n tabe. Ma I berita ae N na kairiko”
“Ko rabwa, Tamau,” e taku Rosita, ma n rabwata ao n aroka tamana riki.
“Ngkai nako ao kataia ni matu.”
A mwaiti namakaina imwina, ana utu Rosa a ikotaki inanon teuana te ruu ni kabaebae n te tembora. Taai ni kakukurei a roko imwin te bootaki ni kabaeaki. Taman Rosa, n onrake n te tangira ao te akoi ae korakora, e rabwatia natina n tatabemania nako, ni katokia iroun te kabanea ni uarereke— Rosita.
“Tabeua namakaina n nako te ataeinaine ae uarereke aei e ira te mwananga nakon te tembora ma ataei te Moanrinan ma ara titeiki,” taman Rosita e tuanga te tia kabaebae are ngaia are e karaoa te mwakuri n nebo. “N te tairiki anne e tataninga okiu man au mwakuri ao e titirakinai bwa ningai ae N na kairia iai nakon te tembora. I ataia ae aki ti kan noora tinanikun te tembora, ngaia are I a kaeti nako maiu man anuau ake a buakaka. E bon kabanea te anginnano ae korakora, ma n tokina I tokanikai. Te bong aei bon te kabanea n tamaroa ni bong ae I a tia n rinanona ibukina bwa au utu a tia ni katiteuanaki n ae akea tokina.”