E Kona ni Kabebetei Raraomau te Kabwianibwai?

Inanon aia tai natiu ake a ikawai riki ni mena n te reirei ao ake a uarereke ni matu, I a katangainai beebwa n taarau ibukin te auti iaon te taibora n te umwanikuuka. I moana te mwakuri ae kakamaaku aei ni katoa namakaina n tataro ibukin te wanawana ao te konabwai ni kabongana raoi ara karekemwane ae uarereke. Te tieke ibukin te kabwianibwai, n taai nako, e na moan koreaki.

Ngke I kaaina Ana Ekaretia Iesu Kristo ibukia Aomata aika Itiaki ni Boong aika Kaitira bwa te buu te aine ae kairake ao te tina, I a tia ni motinnano ni kabwaka te kabwianibwai. I bon tuai mani birinako man te berita arei. I bon rangi ni karawawataaki, ma e ngae n anne, man aki taun te mwane ni kabwaka teuana riki te namakaina ibukin waakin te mweenga, taarau, ao kabomwi.

Ngkai bon te tina n akea buuna ao onoman ataei. I aki toki n namakina te taonaki n rawawatan te mwakuri, raraoma n te mwane, ao karaoan babaire ae aki toki ni karaoan tabeu ae te tina ao te tama ma akean au koraki ake a na anganai te kabebeteaki ke te boutoka.

Inanon au tai n tekateka ni bubutia te Uea ibukin Ana ibuobuoki ao nanoanga, e kauka au taratara ae tamaroa te Tamnei ae Raoiroi ao e kaotaki te raunnano man ana tangira te Tia Kamaiu. I a kona n noora te mwane are e riki bwa e taarau iai te auti n te kabanemwane ma te taratara ae boou n ai aron moanibwaian waaki aika tabu ibukin te maiu a uotaki bwa N na uringi. I ataia bwa Tamau are i Karawa e tangirai ni karekei kakabwaia ake kanoan berita nakoia naake a kakaonimaki ni kabwakai aia kabwianibwai ao angabwai. I ataia naba bwa kabwakan kabwianibwai e riai bwa te mwakuri n tangira ae kakukurei, ni kabua te maaku ao te raraoma.

N aron ae I onrake n Tamnein te Uea, I a tia ni kunea kaotan au koaua ibukin te onimaki ae I a kaman karekea ma n tabu. Takaruau e a karongoaea te umwanikuuka ngke I a taekinna bwa I kariaia ae na bua kawain te ran nakon au auti nakon riki ae na bua te ran ni kamaiu ae anga te Tia Kamaiu. I kariaia ae a na akea te amwarake iaon au taibora nakon ae a na akea te Bwerena ni Kamaiu. I kariaia riki ni kekeiaki inanon te roo ao ni mweebuaka ibukin akean te iti nakon riki kakeean Ootan Kristo inanon maiu. I kariaia ae N na tiku ma natiu inanon te umwanrianna nakon ae N na kabua reken au tai ibukin te rinnako n ana auti te Uea.

Rawawatan te raraoma e waekoa n tabekaki. Au tangira ibukin te Uea e tokanikai iaon te mamaara ae riki man te maaku. Tamara are i Karawa bon ara tia kamaiu, au tia boutoka, ao au tia kamanoai. E bon karekei ni kabane ara kainnano. Ana berita a koaua ma n aki bwaka. E tuangira bwa ti na kabwakai ara kabwianibwai iaon ara raka bwa e na urakin kakabwaia mai karawa—n ikotaki ma te raunnano, inaomata ma bwain aon te aonaaba ao raraoma ni bwaai nako, ma n onimakina Arana ae tabu.

Man te bong arei ni waerake I a tia ni warekia bwa te kakukurei kabwakaan au kabwaianibwai, ma n aki maaku, Nakoina ao Ibukina are ngaia ae moan tangirai.