Te Rao nakon te Rao
Te Tataro ao te Anene nakon Tamara are i Karawa
“Aia anene aika raraoi bon te tataro nakoiu, ao e na kaekaaki n te kakabwaia nako aon atuia” (D&C 25:12).
Ngke I uarereke, I aki toki ni kabuai bwaai. I ukeuke n taabo nako ma I aki kona ni kunei. Imwiin manga kiberan nanon te auti uoua ke teniua te tai n aki naba kunei, I a tataro naba nakon Tamara are i Karawa bwa e na buokai. Ngkana I a manga wakina au kakaea, I kona ni kunea are I a tia ni kabua. Anne te bwai ae riki nakoiu ngke te tei ngai. Taai akanne aika a buokai n au onimaki iroun Tamara are i Karawa bwa e bon ongo ao e kaekai au tataro.
Ngke I a ikawai riki, au koaua e a matoa riki bwa Tamara are i Karawa e boni kaekai naba au tataro. E aki kona ni kararoa mairoum Tamara are i Karawa. E taku te Boki ae tabu, “Kam na bubuti, ao ane kam na anganaki; kam na ukeuke, ao ane e na reke iroumi; kam na karebwerebwe, ao e na kaukaki nakoimi” (Mataio 7:7). I ataia bwa ngkana ko tataro ni ma nanom ni koaua, e na anganiko kaekan am tataro Tamara are i Karawa.
Ngke I uarereke, I tatangiri kunan te Moanrinan. I kan anenei, e ngae ngke I aki oota n taekaia ni kabane. Ngke I a ikawai riki, I uring taian anene, ao a buokai ni karaoi bwaai aika a raoiroi. I bon tatangiria naba ngkai n anenei anene akanne. I uringa “ara kara n te Moanrinan bon teuana, uoua, teniua—uraura, baabobo, ao buru. Iai te rongorongo ae a tei ibukina ae onoti nakoia n tatabeua ae ibukim ao ibukiu. N tatabeua ao boni kanikina aika koaua!”1 I uringnga naba “Ngkana ko kuba ni kaitibo ma kakuikuian te ari, tai kariaia bwa e na tiku. Waetata karanganakoa ao ngaare ni kanakoa kakuikuian te ari anne.”2 Te kuna ibukin te aomata ae wanawana ao te aomata ae nanobaba bon teuana naba ae mamate nanou iai.3
I ataia bwa anenen te Moanrinan a tia n riki bwa aan te korakora ibukiu. Ngkai e kukurei nanou n nooraia ataei ngkana a reirei anenen te Moanrinan. I ataia bwa anene aikai ana boni buokiko naba n aron ae a buokai
Te tataro ao te anene n aia anene ataein te Moanrinan n au tai n ataei e buokai bwa N na ata Tamara are i Karawa. I ataia ae Ngai natin te Atua. I a boni kaman ataia. Ngkana I karaoa ae bure, e teimatoa ana tangira ao ana angabwai nakoiu. I a tia n ataia bwa ngkana ko karaoa ae eti, n te bwai ae uarereke ae mangori, E a kabwaroi naba ana kakabwaia iaom. Akea te nanououa iai. E kinai. E tangirai. Ngai natina.
N aekakiu, ngkoe bon natin Tamara are i Karawa. Tai tabe bwa tera ae riki, e ngae ngkana raom a tannako mairoum, Tamara are Karawa e aki kona. E na memena irarikim. Etangiriko.