Kainibaire: E Tau Irouia ni Kabane

Sarah Edwards, Emily Bowles, ao Eleanor McKee a kan bobobwai, ao ngke a roko n te titoa ni kunnikai i Northampton, England, aine ni kairake Aika Itiaki aikai a uaia ni uota te mwane ao te aekaki ni boki ae uarereke. Te boki naba anne e kairiia aia karo ngkana a na kabooi kunnikai ke ni kakaai tamnei ake a na noori.

Inanon te Northampton England Titeiki, ikawai ao aroia naba ake tebwi tabun a kabongana Ibukin Kakorakoraia Kairake ma nanoia ni koaua. E a tia ni buokia kaaro n tuoi ma n rinei tamnei ao burokuraem n TV ake a matakuakin ao waaki ni kakukurei ake a iri. E a tia ni buokia tabeman ni maiuakina te Taabati n arona raoi mani kukurei ma aia utu. Ni koauana, ikawain te titeiki a moanna n aranna “Ibukin Kakorakoram Ngkoe” ibukina bwa e kaineti nakoia n akea te okoro

Beretitenti Clive Joliffe, are e kamotirawaaki man te beretitenti n te titeiki n te ririki ae nako, e taku, “Ti maroroakina ao ma n tataro ibukin buokaia utu bwa a na waakirake inanon te euangkerio ao ni buokia ara ataei nakon te mition ao te mare n te tembora, ao ti bon kairaki iroun te tamnei ni kabongana Ibukin Kakorakoraia Kairake te boki ae uarereke. Ti tangiria kaain te utu ae bwanin ni mataata raoi n te kainibaire ake a na karekea te kukurei ao te kimwareirei nakoia kaain te utu

A tia n ataia kairake n te titeiki—ao ni kariaia—te kaokoro ae riki inanon aia utu ni kamatoan raoi karaoan aei. “E bon kakawaki tauan raoi taian kainibaire, ao kairake a na ira aia waaki ikawai, ngaia are Ibukin Kakorakoraia Kairake e kauringia n te kainibaire ake ti riai ni maiuakin,” e taku Eleanor McKee, 19. “E raoiroi bwa ti na bane ni kauringaki ibukin te bwai ae kantaningaki mairoura ao ni kakoaua raoi bwa a na akea kakaokoron taian kainibaire.”

E reitia Daniel Kitsell man te Huntingdon Ward ae tebwi ma itiua ana ririki, “I tangira Ibukin Kakorakoraia Kairake ibukina bwa bon tiaki ti ibukia kairake, bwa I ataia ae au karo a ongo naba iai, ao e buokia ni kawakin taian kainibaire

Teuana te utu ae a tia n namakina mwin irakin taeka n reirei bon Bitiobi Richard Auger man te Banbury Uoote; buuna, Gill; ao natia uoman aine, Hannah ao Charlotte, a uaia n tiba mareaki inanon te London England Tembora. Bitiobi Auger, te bureitiman ma te Thames Valley Police, e rangi n ataa buakakan taian kainibaire n te aonaaba ao mwina nakon anuaia kairake. “Gill ao Ngai ti kabongana Ibukin Kakorakoraia Kairake n reirei taekan te nakoa ni karo bwa ti na kona ni boraoi ao ni boboto iaon koroboki aika tabu,” e taku.

Inanon maiuia n kairake ataeinaine, ti kabongana bwa te bwai ni kairi ae tauraoi inanon kawai aika kakaokoro. Ngkana a kan bobwai ataeinaine ibukin oin kunnikaia, bon te kararaoma nakoira, ngaia are ti kanakoia ma te boki ae Ibukin Kakorakoraia Kairake ae uarereke bwa a na kona ni warekia ngkana a karaoi aia rinerine.”

E taku, Hannah, 21, “Ti kawakina te boki ae uarereke inanon ara bwauti ni mwane ngkai e taekinna raoi ae raoiroi ao ae aki riai.” A reireinaki taian titita bwa a na kona ni karaoi tabeua kunnikai aika tara raoi n te aro ma ituakina teutana ke kanimwan bwain katamaroana. E reitia, Charlotte, 19, “Hannah ao Ngai ti aki kona ni karekea te namakin bwa ara karo a karaoi babaire ibukira. Ti ataia bwa ara karo a ira te burabeti ao te Tia Kamaiu, ao ngaia are man irakia ara karo, ti na kona n taai nako ni maiuakina ana reirei te Tia Kamaiu.”

A mwaiti ikawai ake a taku n ikotaki ma karekean te kainibaire ae tararaoi n te aro ao rinerine man beebwa ni kaongora, a kabwaia man te boki ae uarereke ni buokia ni iri nanon taetae ni burabeti iaon kawakinan te Taabati. Sue Preece, beretitenti n te Bootaki n Aine n te Kettering Uoote, tara Ibukin Kakorakoraia Kairake bwa kanga te “bwai ni mwakuri ibukira ae ti na kabongana ni keiakina karekean te kororaoi. Ti aki kona n toki ni kainnanoi kaetan kawai aikai ngkana ti a roko n 18. A kaungai n tuoai bwa e uara mwin au mwakuri, ao iai tabeua taian bitaki inanon maiu ae na kona ni kaaniai riki nakon Tamau are i Karawa. N aron te katoto, e a tia n riki te Taabati bwa te waaki ni kakukurei nakoiu, man ti bitakin ae uarereke n te aro ae I kawakina iai te bong aei.”

Titita A. J. Hough, man te Kettering Uoote naba, e taekina aron kamatoan karaoan nanon Ibukin Kakorakoraia Kairake n tia ni buokia n riki bwa te karo ae tamaroa riki: “Ngkai iai teniman natira aika kakatebwi tabun aia ririki, I kan kakoaua raoi bwa Ngai, naba, I bon maiuakina raoi te kainibaire. I bon ingainga ni kakaei kawai ake N na kona iai n ‘karieta te kainibaire’ ao ni katei banna ni katooto aika tamaroa. I baireia iaon te mwakoro ae ‘Kawakinan te Bong ae te Taabati’ ao ma n tia ni katea au kouru ae boou ni katamaroan riki te banna ni katooto ibon ibukiu. I kantaningaia bwa I kona n riki n ae tamaroa riki ni kairia naake I rangi n tatangiria riki—au utu. Ngkai ti kabongana te boki ae uarereke inanon tain ara bootaki n utu n te tairiki. Ao ngkana ti kakauiango ma ara waaki ni kakukurei n ara utu ke ni moantaai ni babaire ni kakoroan raoi nanon kawakinan te Taabati, ti kabonganai taian kainibaire ni kairiira.”

Aekaki ni banna ni katooto akanne aki bua nakoia kairake n te titeiki. N aroia ataeinimwaane aika mwaiti, Josh Reynolds man te Kettering Uoote e tatangira te butibooro mani kunea moan kabwaiana ngke e kairake. Ma e reke te kanga buaka ngke e tangiria ni kan takakaro irarikia tabeman raoraona n tiimin aia tabo ake a kakabo n takakaro n te Taabati. “E a tia tinau ni kamataata bukin ao aroia kaain te Ekaretia ae ti riai ni kawakina te bong ae te Taabati n tabuia. I butimwaea aei ao imwina riki teutana I aki un. I rangi ni kakaitau nakoia au karo ni katean te banna ni katooto ae tamaroa nakoiu ao ma n reireinai ni kawakina te bong ae te Taabati n tabuia.”

Aia karo ataei aika niman, Heather Slattery, man te Kettering Uoote, e taku, “N tabetai ngkai karo ao ikawai ti iangoia bwa kainibaire a ti kakawaki nakoia kairake mani mwaninga ae ti bon kai bwaka naba n te kariiri n aroia naba kairake. Ibukin Kakorakoraia Kairake bon te bwai ni kauring ae waekoa are ti riai n taua te kai te biti irarikia ara kairake mani uaia ni mwakuri, ni uaia ni kakorakoraira mani boutokaira n tatabemanira n aroia natin Tamara are i Karawa.”

Bon akea te nanokokoraki bwa taian membwa n te Northampton titeiki a namakina te korakora n tatabemania ao n taian utu man iran taian kainibaire ake inanon Ibukin Kakorakoraia Kairake E taekina ana namakin Beretitenti Joliffe: “Te boki ae uarereke bon uaan ana mwakuri te Tamnei ao e bon koreaki ni kamataataki raoi n te aro ae ngaira n tatabemanira ti na kona n noora Ana iango Tamara are i Karawa n aron are E kantaningaia mairouia Natina. I a tia ni kataia ni maiuakina taian kainibaire bwa aonga natiu ni kaungaaki n ira au banna ni katooto. Iai au koaua ae korakora ae ti a bon kakabwaiaki ni karekea te taeka n reirei ae mataata n arora ni maiu bwa ti aonga n tau ibukin baike e katauraoi te Tama ibukira.”