Te Kaitioka ma Kakawakin te Tamnei

E katuturua te Uea kakawakiia mwaane ke aine, kairake ke ataei ngke E taku:

“Kakawakin taian tamnei e korakora i matan te Atua. …

Ao ngkana arona bwa ko na mwakuri rawawata ni kabane am bong n tang n rairannano nakoia aomata aika, ao n uota temanna nakoiu, te kimwareirei tera iroum ma ngaia ngkanne n abanuean Tamau!

Ao ngkai, ngkana e na korakora kimwareireim ma te tamnei ae ti teuana are ko a tia n uotia nakoiu nakon abanuean Tamau, a na korakorara riki kimwareireira ngkana ti uoti tamnei aika mwaiti Nakoina! (tara D&C 18:10, 15–16).

Uringa bwa ko bwaibwai n Ana kakabwaia Tamara n te makuri aio. E aki weteiko nakon te nakoa ae kakannato aio n nakonako n ti ngkoe, n akea kairiirakim, ma te onimaki bwa tera ngke ko tekeraoi iai. Ni kaaitaraan anne, E ataa am konabwai, E ataa nanom ae korakora Irouna, ao E na biti kabwakam nakon taian korakora aika kinaaki. E a tia ni berita: E berita bwa E na rimoara n taai nako, bwa E na mena n angataira ao n angamaingira, ao Tamneina E na memena i nanora, ao Ana anera a na katobibira, man tararuaira (tara D&C 84:88).

Taani kairiiri n te Moanrinan, kam ataiia ataei aika kam reireiniia? Taan Kairiiri irouia Ataeinaine, kam ataiia ami ataeinaine? Taan Kairiiri n te Nakoanibonga ae te Aaron, kam kinaiia ataeinimwaane? Taani Kairiiri n te Bootaki n Aine ao n te Nakoanibonga ae te Aaron, kam kinaiia aine ao mwaane ake kam a tia ni mwiokoaki bwa kam na tararuaiia? Kam atai aia kaangaanga ma rawawataia, kainnanoia, te bwai ae a tangiria, ao aia kaantaninga? Ko ataia bwa ai abwakira ngkai kawaia, kaangaanga ake a kaaitara ma ngaai, te rawawata ae a uouotia, te nanokawaki ae a tia ni karekea?

I kaungai ngkami bwa kam na nakoiia ake kam beku ibukiia ao ni kaota ami tangira nakoiia. Ngkana ko tangiriia ni koaua naake ko beku ibukiia, a na bon aki reke n te aekaki ni “Kaangaanga anne”— a na akea te raraoma irouia, a na aki kona n aki karekei ibuobuoki aika kainnanoaki. Tiaki te bwai ae ko na kakatonga iai ni kauki kawai n rin n taian kaawa ke mataroan bwareti, ma te kukurei ni koaua ao te kimwareirei ae akea tokina e na reke iroum ao nakoiia ake ko beku ibukiia ngkana ko kawariia ao ni katamaroai maiuia.

Ngkana e bwara nanom n am waki, uringnga bwa n tabetai Ana tai te Uea e aki manenanti taina ma ara tai. Ngke I bitiobi n ririki aika mwaiti n nako, temanna te tia kairiiri irouia ataeinaine, Jessie Cox, e kawarai ao e taku, “Bitiobi, I aki tau!” Ngke I tuangnga bwa bukin tera, e taku, “I a tia n aki kona ni karekeia kaain au Botaki n Ataeinaine ni mare n te tembora, ngke arona bwa e raoiroi au reirei ao a na tia n rin n te tembora. I a tia ni kataa au kabanea n tamaroa n nakoau, ma tao au kabanea n raoiroi anne e bon aki nakoraoi naba.”

I kataia ni karaua nanon Jessie n tuangnga ae Ngai, ae ana bitiobi, I ataia ae e a tia ni kabanea ana kona. Ao ngke I tarataraiia ataeinaine akekei i nanon ririki, I kunea bwa ngaiia n tatabemaniia a tia ni kabaeaki n te tembora. Ngkana e koreaki te reirei n te nano, e aki bua.

I a tia n reiakinna ngke I tarataraiia tooro aika kakaonimaki n aron Jessie Cox bwa ni kabane taan kairiiri a kona n riki bwa Taan Kawakin Tiibu ni koaua, ni kona ni kairiia ao n tangiriia ao n tararuaiia naake a ongo Bwanaana (nora Ioane 10:2–4).

N na tibwaa te rongorongo riki teuana ae I karekea ngke te bitiobi ngai. I kunea n ingabongin te Tabati teuana bwa Richard, temanna mai buakoia ara ibonga ae tuai man roroko, e a manga aki roko naba n aia bootaki kaain te nakoanibonga. I kitana te botaki ni katuka te mwioko iroun temanna ae ata te bwai are e riki ma ni kawara ana auti Richard. E taku tinana bwa e mwakuri n te tabo ni karao ka. I buti nakon te tabo ni karao ka ni kakaaea iai Richard ao n nako n tarataraia n taabo ni kabane ma e aki reke. Ngkekei naba, ao I karekea te kaotioti bwa N na kakaaea i nanon te tabo ibukin kiritinakin te ka ae mena i rarikin te auti. I nanon te rotongitong I kona n nori raneanean mata aika uoua. I ongo bwanaan Richard ae e kangai, “I a reke iroum, Bitiobi! N na tamwarake.” Ngke ti marooro Ngai ma Richard, I tuangnga bwa ti rang uriuringnga ao ni kainnanoia. I kabaea bwa e na iri ana botaki.

E rikirake n tamaroa aron ana waki. Ngaia ma ana utu a manga mwaing nakon te tabo teuana, ma uoua te ririki i mwina I karekea te kakao bwa N na taetae n ana uoote Richard i mwaain ae e na nako ni mitinare. N ana taeka n te tai anne, e taekinna Richard bwa te bitaki ni maiuna e riki ngke e kuneaki iroun ana Bitiobi ni karabaa i nanon te tabo ni kiritinakin ka ao ni buokia ni kaokia nakon te aro.

Tariu ao mwaaneu, bon tabera, ara mwakuri ni koaua, bwa ti na karoko irouia aomata ni kabane ake ti beku ibukiia bwa ti na kawariia. Tabera bwa ti na kairiia nakon abanuean te Atua ae te Tiretio. Ti na uringnga n taainako bwa weteakiia taan kairiiri tiaki ti te bwai are e na uota te rau, ma bon tabera ae ti kabaeaki nako iai. Ti na nako nakoiia naake a tangira ara ibuobuoki ao ara tangira.

Ngkana ti tokanikai, ngkana ti uotiia aine ke mwaane, ataeinaine ke ataeinmwaane nakon te aro, ti na bon kaekai ana tataro te buaine ke te titita ke te tina, ni buokia ni kakokoroa nanon te bumwaane ke tarina ke tamana. Ti na bon karinea ana taeka te Tama ao n ira ana katooto te nati te mwaane ae ongotaeka (nora Ioane 12:26; D&C 59:5). Ao a na karineaki arara n aki toki irouia aomata ake ti a tia ni karoko irouia.

Ti tataro ma nanora ni kabane bwa e na kairi kawaira Tamara are i Karawa n ara tai ni kataia ni beku ao ni kamaiuia Natina.