Mai Inano nakon are Ieta

Ngkana iai am tarena, a taku nakoim aomata n tabetai bwa e na uotiko nako ieta. Ma n aron taekan Joselen Cabrera, ana tarena e uotia iaoni kawaina ni kabane rikaaki nakon tokin te aonaaba—Antarctica. Ao iaon kawaina e reiakinna bwa kouru aika tamaroa a bon manena karekeaia, ao ni kouru akanne a na boni iai aomata aika a na ibuobuoki ngkana a kainnanoaki.

Ngke 14, e tokanikai Joselen n te kauaba ni koro-tamnei ae mwanenaki n te Asociacion Civil Antarkos iaon abana, Uruguay. Te kanuanga: bon te mwananga nako Antarctica ibukina ao ana tia reirei, ma tabeman ataein te reirei n teuana te kurubu ao taan reirei. Tamana ao te aine are e reireinna te koro-banna e buoka kaotakin aron Joselen bwa e kanga ni katia te tamnei are e a tia ni kakatautaua.

Ana mwananga bon te mwananga ae kakukurei ae teniua mwakorona; te moan, te kiba n te wanikiba ae baon kaako ibukia tautia mai Montevideo, Uruguay, nako Punta Arenas, Chile, imwina te kiba iaon te ran nakon te tabo n tiku ae ana bwai te aba ae Chile i Antarctica, n rimwiaki n te mwananga iaon te aba nakon aia tabo kaain Uruguay, Artigas Antarctica Scientific Base, tabeua 3,000 te kiromiita mai Montevideo. Kaain aaba tabeua iai aia tabo ibukin rabwakau aika raka n ibetutu iaon King George Island n raroa ma mataniwiin Antarctica.

Ana tamnei ao karakin ana mwananga Joselen a riki bwa rongorongo n ana maekatin te aba, Uruguay Natural.

Antarctica bon tiaki raoi te kawai are e iangoia, e taekinna Joselen, ni ngarengare. Ana tamnei e kaoti benkuin ao te aiti. Bon tain te kabuebue ngke e roko ikekei—te tino n rabwuna aontano ae akea kaina ao tabeman benkuin. Ma e anganna te tai n tarai tabeua riki bwaai aika a kan nooraki. E rangi ni kukurei n rianna rirarikin mataniwiin te aba, are e norii iai Collins Glacier, te Drake Passage, ao Lake Uruguay, are e karekea maiai te ran ae menai n ana tabo i abana. E reke naba ana tai ni kawarii taabo ake tabeua.

Te mwananga bon kakoroan bukin te mii ibukin Joselen, ae ai 19 ao kaain te Mwaanga ae te Colonia Suiza, te Mwakoro ae Colonia Uruguay. Man imwin te mwananga, e a tia ni kakoroi bukin mii ake tabeua naba. Teuana maibuakon akanne bon katabwaninan ana mwakuri ibukin Rikiraken Temanna ao ni karekea ana Young Womanhood Recognition. E baina ana maenroroa, e taku, bwa e aonga n uringa are e a tia ni karekea ao are e na kona n riki iai bwa natin te Atua te aine. Ngkai e a tia ni kabanea ana reirei n te kauarinna Joselen, e baireia bwa e na reirei ni koro tamneiakin tein te kateitei n rinanin te reirei ae bubura.

Nakon ngkai, e tuai bati ana tai n tibwaua ana kakoaua n te reirei. Ngkai a karinea ana onimaki, a tuai bati n tataeakina taekan te aro. E bon aki kakarongoa Joselen ma e tuai mani maaku n taetae ibukin te eeti. E riki anne n te taina ngke temanna ataein te reirei e tuangia tabeman n te reirei bwa Aika Itiaki ni Boong aika Kaitira a imanonoaki ni kabwaka te kabwianibwai. Tiaki, bon tiaki kawaina anne, e kaetia. “Ti angaa ni kukurein nanora,” e taku, ni kabwarabwara bwa te kabwianibwai bon te anganano n angabwai nakon te Atua.

E rikirake inanon te Ekaretia, ma e karekea ana kakoaua iboni irouna ngke e a kan ni koro 12 ao e ataia bwa e aki kona ni katan n tai nako n rabwakuia ana karo. E taekinna bwa karekean te kakoaua “bon tiaki teuana te tai ni ‘Kakubanako!’ ae karina. Ma I ataia bwa te euangkerio e uota nakoiu te kimwareirei.”

E iria titita aika mitinare n taai nako n tain ana motirawa n tain te kabuebue. N tabetai, iai taai ni kaoti kakoaua nakoia aomata ae e ataia. N te bong teuana aia reirei mitinare e a riki bwa kaitiboana ma raoraona ae moan te tatangiria man te reirei. “I tuangnga n te koaua aron ae I namakinna,” e taku Joselen. E rangi ni kakatonga Joselen ngkai e kona n tibwaua ana kakoaua ma raoraona

“I tangira karakin Iotebwa Timiti, ngke e kaitara te tai ae kanganga n te Buakonikai ae Tabu ao e bon waaki nako ma ana tataro,” e taku (tara Iotebwa Timiti—Rongorongona 1:15–17). “I rangi n nano n ana ninikoria.” E karinea aron te burabeti ae kairake n tiku ni koaua nakon te bwai ae e ataia, e ngae ngke tabeman a bwainingareia.

Nibwaai bon temanna maibuakon ana ninikoria. “I rangi n rotaki n ana ninikoria Nibwaai ngke e aki kariaia bwa e na tukaki irouia tarina,” e taku (tara 1 Nibwaai 3:14–21; 4:1–4).

Iai te mii teuana ae e mwakuria ngkai iaona, ao e irekereke ma teuana n ana kakabotu ae moan te tatangiria: te katangitang. Joselen ao tarina, Ileana, a tibwa kabanea aia beebwa ni kakoaua bwa taan anga reirei n te aokan. E tangira katangan te katangitang Joselen—anene man te Moanrinan ao katangitang man te karao birim—ao e tangiria n ongora nakon te katangitang, riki nakon te Mormon Tabernacle Choir.

“Ngkana iai au kanganga, te kuna n taromauri e roko n au iango,” e taku. Kuuna n taromauri a buokai ni kakai taian kaeka.” E ira te tieminari ni katoa bongin te reirei n te auti n taromauri n te mwaanga n aki raroa man mwengana. “N taai tabetai I moantai n nako ao n tekateka n te biano ao ni katangi kuna n taromauri,” e taku.

Ngkana iai ana katanoata te maungatabu ni kabuta, e moantai n nako bwa e aonga ni kona n tekateka ao n ongora tuoakin te katangitangi n te Tabernacle Choir.

Ngkai e a tia roko Joselén i Antarctica—te tabo ae e na ti tabeman aomata ae a na noria iboni irouia—iai riki te tabo ae onoti ae e tangiria ni kawaria?

“I tangira te nako nakon te maungatabu ni kabuta ao n ongora ana anene te kuaea,” e taku.

Antai ae ataia? Ngkana Joselen e kona ni karoko n tokin te aonaaba, tera ae e tukia man karekean te tokanikai ni bwaai nako are e tangiria ni karaoia.