Ara Mwakoro ae Uarereke ibukin Karawa

Imwin bwabetitoakira n 1992, ti a ikotaki ni karaoi bwaai ni kabane n ara utu, ni ikotaki ma kaean bootaki n Taabati, taian maungatabu n te Ekaretia, ao waaki ni kakukurei ake tabeua riki. Ma ni waaki nakon te tai, a bitaki bwaai, ao n tokina ai ti ngai n taromauri—nikiraia au utu a moanna n aki kakaonimaki. Mai imwina anne, ngkana I ongo ana reirei temanna n te taromauri ae taekan te utu ae akea tokina, e maraki nanou ao I a taonaki n te nanokawaki ae korakora.

N 1995 I baireia ni karekea ana kakabwaia te tamanuea n reiakina riki ana kantaninga te Uea ibukiu ao ni karekea te korakora. Aikai berita ake kanoan au kakabwaia: rinanon te aki mamatam, te tataro, ao te bootaki n utu n te tairiki, N na karekea au utu “inanon te euangkerio.” I waekoa n tataro ma n aki mamatam ibukin au utu, ma I aki ira nanon te reirei ni karaoan te bootaki n utu n te tairiki.

N tokina I a kitana mweengau i São Paulo, Brazil, ni beku n te mition. Inanon au tai ni beku, I noori mweenga aika uruaki, ma ngke I wareka raoi au kakabwaia n tamanuea, I kunea katokan kangaanga ibukin taian mweenga akanne: bootaki n utu n te tairiki. N rinanon reireinakia aomata taekan te bootaki n utu n te tairiki, I noori utu ni kakorakoraki, taanga ni kaiokaki, ao naati ni ikotaki. Kauarerekeana, I noori mweenga ni bitaki nakon mwakoron karawa ae uarereke.

“Ngkana e kona n riki aei nakoia utu inanon au mition,” I a iango, “tera bukina ngkai e na aki riki aei nakon au utu?”

Imwin au mition I a iangoia ni karaoa te bootaki n utu n te tairiki ma au utu. N te moantai a bane n iri ma te aki kukurei, ao iai au kangaanga ni kabanea raoi au reirei. Ma I ataia bwa te Uea e na aki tuangai ni karaoan te bwai teuana ae na bon aki kakabwaiai, ma ngaia are e aki bwarananou. N tokina te kakabwaia man ana kakabwaia te tamanuea e a korobukina.

Ngke arona bwa I aki kakaraoa te bootaki n utu n te tairiki, I ongo ngurengure mairouia au utu. A bane n iri kaain te utu ma aia kaoti, iango, ao taeka n reirei, ao a ongora raoi nakon te rongorongo. E ngae ngke tao ti a ikawai riki, ngkana e bo tain te takakaro, ti bane ni karaoia ni kukurei!

Ao imwin aei, kaain au utu a manga moanna ni kawakin tuua ake a tia n tinanikui, ao a rikirake ni kakaonimaki n te Ekaretia.

I kona n taekinna ni koaua bwa e a bitaki mweengau nakon teutana mwakoron karawa ae uarereke, kakaitau nakon te burokuraem ae kaungaaki bwa e riai n riki bwa te katei inanon mweenga ni kabane: bootaki n utu n te tairiki.