I Bon Maiuakina Raoi te Euangkerio?

E na tataninga au kamatebwai ni koroboki aika tabu. A bane ni kautaki natira mwaane ni kateniman{ em}ni moantai riki. Te kabanea ni uarereke, Caden, are 18 namakain ngkoa, e tangi n takarua inanon oona. I a nakon ana ruu ao ni waekoa n nooria ae e aoraki.

Ngaia e moanna te Moanibong ma teuana te kakaewenako imwin teuana. N te tai teuana, imwin onean ana kunnikai Caden ao ni kataia ni kamwarakea, e kabwaka te tiaa ae bubura nakon te burooa, mani kabwaroa nako te tioti n aboro ni kabane ao ni kabwaka te kiraati inanon te umwanikuuka. Inanon au tai ni kaitika te bareka, I a iangoi bwaai ni kabane ake I tuai ni katiai: rongorongon te utu ngkoa, ibuobuoki, kaikoan bwaai n te mweenga, mwakuri ni mitinare.

“N na kanga n te aonaaba aei ni kona ni karaoi bwaai ni kabane ake I atai bwa N na riai ni karaoi ngkana I a ti kona ni karaoi ake oin tabeu n te bong aei? I a miimi. N te moan tairiki, I a bon kua, I a katuka taekan te bwarannano n tain te katairiki, bootaki n utu n te tairiki, ao tebokakia ataeinimwaane ao aia tai ni matu.

N tokina, ngke a matu ataei, I a tekateka ni karaoi bwaai ake I tuai ni karaoi mai moana. I anaa te Meei 2006 Ensign, are e moanaki n ana taetae Beretitenti Henry B. Eyring, ae atuunaki “As a Child.” I a tara te bwariko n taeka are I a kaman mwaakenna: “Ni kawakina te kakabwaia ibukin [bitakin bwaai aika riki] inanora e riai ni iai te nano ae matoatoa, korakora, ao te onimaki. E reirei te Uea Beniamina tabeua bwaai ake a riai ni karekeaki. E taku bwa ni karekean kabwaran ara bure man te bong teuana nakon teuana ti riai ni kamwarakeia aika baki, kunnikaia aika akea karabaia, kawarakiia aoraki, ao ni buokia aomata n te maiu n tamnei ao n rabwata” (Liahona ao Ensign Meei 2006, 17)

I waekoa, n namakinna bwa I aki maiuakina raoi te euangkerio. I miimi, “N na kanga ni kona ni kamwarakeia aika baki, kunnikaia aika akea karabaia, kawariia aoraki, ao ni buokia aomata n te maiu n tamnei ao n rabwata ngkana I a kuri aki kona n tararuaia oin au utu?”

Anne te tai are I a karika te namakin ae korakora ibukin te kariaia mai karawa. E bon rangi ni itiaki, mani mataata, ao ni kona n ringaki bwa I ataia ae I riai ni koreia bwa N naki kona ni mwaninga. I kona n noora tamnein au bong inanon au iango—n onrake ni kamwarakeaia aika baki, ni karaoan kunnikai ni kunnikaia aika akea karabaia (I onea Caden kunnikai Caden ni mwaitin te tai), ni karaua n taraia natira aika aoraki, ni buoka natira ae nimaua-ana-ririki ni katauraoa ana reirei n te botaki n utu n te tairiki iaon te mwakuri ni mitinare, ao imwina ni marorooakina korakoran te banna ni katooto nakoia au utu—n taekinana riki teuana, buokia aomata n te maiu n tamnei ao n rabwata.

E waaki iangoana ma te namakin ae korakora bwa I ataia ae e tuangai te Uea bwa E a tia ni butimwaai au anganano. N tararuakia au utu, I bon kakoroa bukin ana taeka ni kauring te Uea Beniamina ao Beretitenti Eyring.