Te Aki Kona n NoorakiIrua ae

E bukibuki manawan Julia ngke kaninganinga nanon te ru are akea kaaina. Aia umwanreirei kaain te Moanrinan, ma kaintekatekana aika nukumaki ao a baireaki ni katotonga iteran te mronron ao te burakibooti ae barekareka, ti tebo tarana ma ana ru ni mweengana. Biroton Julia e nikobuaka ngke rinnako n te mataroa. A tara n titebo tarakiia, ma Julia e ataia bwa a bon aki. N te bong aei ngaia te irua.

E bwakara te kaintekateka are te kabanea n raroa ma te mataroa ao e tekateka iai. E tangiri bwaai ni kabane ake a riki n rokoia kaain ana utu n neweaba n tain te kabuebue aei nakoia ai tarina ao tibuna, ma tiaki ae na riki bwa te irua n te uoote ae kaokoro. Aneneakin kunaia kaain te Moanrinan ao te reirei taekan te Tia Kamaiu e raoiroi, ma te tekateka n ti ngkoe n aki ata temanna, e bon aki tangiria.

E aki tangira naba te ongongora n aia kakarabakau ataei ake tabeman ma aroia ni bootaki ni ngare ngkai akea naba ae kan tabe irouna man taraia. Irouna, e namakinna bwa akea ae kan tabe bwa e roko ke aki. Ti tebo ma Julia—te irua ae aki kona n noraki, te irua ae kamimi ae aki noraki!

E kaminominoa kabaean irana ae mainaina Julia ao nanona e kan oki nakoni mweengana ao nakon ana tia reirei n te Moanrinan, ae Titita Johansson, ma raoraona ae tatangiria, ae Hanna. “Tao ana iai te bitaki n te tai aei,” e bon tuangnga irouna ngke kaeta ana kirati ni wareware ao e katika ririna teuana riki te tai. “Ngkana I boni keiaki mwaaka, I kona ni karaoia bwa e na kaokoro.”

E kibarake ngke e kaukaki te mataroa. Teniman ataeinaine a rin inanon te ru, ma bwanaia ni kukurei. A rimwiaki irouia uoman ataeinimwaane. E waetata ni karekea ikena Julia ao e kairoroa wiina bwa e na wingare.

“Mauri!” e kanakoa mairouna. N te tai naba ae waetata ao mataia kain te ru a rairaki naba nakoina. E namakina te kabuebue ni moana Julia.

“M, Mauri,” e ngure temanna te teinnaine.

“Ko boou ikai?” temanna riki te teinnaine e titiraki.

E beko ni kauaka buana ao e taku: “I aki, I ti roko ni kawara tibu te unnaine.”

“O.”

A bane n rinei aia kaintekateka. E toki wingaren Julia ngke ataia bwa a bane ni kaainaki kaintekateka ma ti are teuana are i rarikina. Akea ae kataetaea. E tarai baina ao e iango inanona, “te irua ae kamimi ae akea ae noria e a manga kaoti naba.” E tim rannimatana man tabana.

Teuana te wiki imwina ao nanon Julia e onrake n te kukurei ngke kawaetata iaan te bwaranta are iakuun te umwantabu. Moan te kakukurei te oki rikaaki ao ngke rin inanon ana umwanreirei, e mena imwaina raona are Hanna.

“Mauri, Julia! I rangi ni kukurei ngkai ko oki!” e taku Hanna.

E tekateka Julia irarikin Hanna. Imwina ao a ngarengare man taetae ni kukurei. E a tibwa moana ana karaki Julia n taekan ana wiki ni motirawa irarikin tibuna te unnaine ngke a kaoti naba te teinnaine ae abwabwaki, ae tamaroa rabwatana ao irana e uraura ni koora n te mataroa. E karekea taraana Julia ngke nako n tekateka n te kaintekateka ae raroa ma te mataroa n ti ngaia.

“Tao te irua,” e iango irouna Julia. “Aa, I aki kukurei bwa ai tiaki ngai ngkai n te tai aei!” Te teinnaine arei e tabeki matana man taraia kain te ru ao imwina e kabaraka atuna mani karekei taraan tabonibaina. E namakina te aki rau Julia inanoni bwabwana ngke noria bwa bon akea naba temanna ae kan taetae ma te irua arei. “E bia aki riki n rawawata te uota nakon ae te irua,” e iango inanona. “E riai ni bitaki!” E kaoti tamnein te Taabati ae nako n ana iango ao e uringa arona n riki bwa te irua ae kawa, ae aki noraki. E karuberubei matana. Taninga teutana—e kona ni bitia n te tai aei!

E teirake. “Mauri,” e kaitara te teinnaine arei ao e wingare. E rinukan te ru ao e tekateka n te kaintekateka are i rarikina. “Ko boou ikai n te bong aei?”

E tararake te teinnaine arei ma matana ae bane urena, ao moamoana e ota. “Eng, I kawara tarin tinau. Ko boou naba ikai ngkoe?”

E ioioa atuna Julia. “Iaki, ma I ata arona,” e kabwarabwara. “Arau Julia. Antai aram?”

“Ella.”

“Ko kukurei n tekateka irarikin Hanna ao ngai ikekei?”

E wingare Ella ao e katoua atuna. Ngke a waki ni kaei aia kaintekateka atainnaine aikai ao Julia e namakina te rau inanona. “Ti na aki kariaia irua bwa ana aki noraki ikai!” e iango inanona. “N na taraia bwa e na aki kona n riki.”