Bwaai aika Tikiraoi n Taai Aika Imwaaira

“Iai temanna ae uti?” Te moan tai ae I titiraki, I karekei uoua kaeka n te wirikiriki ae kangai ngaia. Ngkai, ngke I a manga titiraki riki uoua te aua imwina, te kainabwaabu bon te kanikina bwa Ngai te kabanea n te ruu are aki kona ni matu.

Bon au moan tairiki n te Mission–ary Training Center (MTC). N te bong arei, I a tia ni kabo nakoia au karo, ni kaitibo ma toau ao tabeman riki mitinare ake a boou ake a na nako Italy, ao n tia n iri moan rinanin kiraati. I a bon kua, ma e korakora te ingainga n nano ao I aaki kona ni motirawa. “Tera te kangaanga ae I a mwane iai?” I okioki n titirakinai. I aki ataia ngkana I kona n reireinaki ma n riki bwa te mitinare. E kona n reke irou te ninikoria ni kiba nakon aaba itinaniku ma n taetae nakon te ianena taekan te euangkerio? Tao I bon aki riai ni mena ikai. A moanna ni waanako ranin matau nako aon tabau.

Imwina I a uringa te bwai teuana ae a tia tinau n tuangai n taekan mwaanena ae Larry. Ai tamau Larry e beku n ana mition i Uruguay ao Paraguay n te 1970 tabun. N te moan e a tia ni kabanei tairiki n aki mamatu, ma n nakon te roki, ao ni katorobubua ni bubutia Tamara are i Karawa ibukin te rau. N te anga teuana, man ana ibuobuoki te Uea, Ai tamau Larry e a tia n rinanona mani beku ni kakaonimaki n te mition.

I namakina teutana te kantaninga n te iango aei ao I a karaurau n toua te kawai nakon te roki. Inanon te ota ae uarereke, I katorobubua iaon taeran te burooa ae mwaitoro ma n tang. I bubutia Tamara are i Karawa n anganai te namakin ae rau bwa I aonga ni karekea te ninikoria ni waakirake.

I tataninga. Akea te bwai ae riki. I tataninga riki teutana, n ongo ti tangiu. N tokina, akea te bwai ae na karaoaki ma ai te oki ni matu.

Inanon te tai imwain ae I matu, e a roko te kaeka. E a kaona au iango te Tamnei ma te ota, namakinan te tangira ibukin te tabo ae tikiraoi. I a waekoa n ataia bwa e ngae ngke korakora te maaku mai moana, ma ngkana I waakirake, N na roko ike e kantaningaai te Uea ni mena iai.

E a tia ni kaaningia te Tamnei taekan bwaai aika tikiraoi n taai imwaaira. Inanon taai aika matoatoa n tiku n te MTC, I kaini matau ma n ururinga te bwai are I a tia n namakinna. Ma n te tataro ao te mwakuri korakora, I a katoki nako taian maaku.

E bon aki maan imwain ae I a roko i Genoa, Italy, ma toau ae boou. Inanon te umwanikuuka n ara auti bon te mataroa te kiraati nakon te baranta. I tei iaon te baranta ma n tara aon te kawa ae bubura. I a kaman ataa ma n tangira te kaawa ae bubura aei. Aei bon te tabo are I a tia n nooria n au iango n te tairiki n te MTC. I ataia ae te Uea e a tia ni kairai ni karokoa te tai aei, ao I bon eti n aron ae N na mena iai.