ʻOkú Ne ʻI ai

Naʻe ʻā hake ha taha homa ngaahi fohá ʻa ia naʻe taʻu 11, ne langa hono ʻulú. Ne u fakakaukau ko haʻane ʻāmio pē ke ʻoua naʻa ʻalu ki he akó, ka ne u fakatokangaʻi naʻe fuʻu mofi ʻaupito. Ne u ʻave ia ki he toketaá, pea tuai-e-kemo kuo mau leleakiʻi ia ki falemahaki. Naʻe siviʻi ia ʻo ʻilo ʻokú ne puke he mofiʻutó ʻo uesia hono filosilivá, ko ha mahaki mātuʻaki fakatuʻutāmaki.

ʻI he fakaʻau ke kovi ange e tuʻunga naʻe ʻi aí, naʻe kamata leva ke hamu. Naʻe kole mai e toketaá ke u hū kituʻa mei he lokí. ʻI heʻeku lue atu he loto falé naʻá ku manavasiʻi pea kamata ke u tangi. Naʻe ala mai ha fefine ne ʻikai ke ma maheni ʻo ne puke atu au. Naʻá ku lotu leʻolahi ki he Tamai Hēvaní ke ne tokoniʻi ʻeku tamá pea ke lelei ʻa e meʻa hono kotoa. Naʻá ku manatuʻi ʻeku ongoʻi nonga ʻaupito.

Naʻe fai ha tafa ki heʻeku tamá pea fakaakeake ʻi ha ngaahi uike lahi. ʻOkú ne moʻui lelei he ʻahó ni, ʻosi mali pea ko e tamai ia ki ha ongo tamaiki fefine fakaʻofoʻofa. Naʻe hoko e meʻa ko ʻení ko ha sīpinga lelei ia kiate au ki he mālohi ʻo e lotú.

ʻOku ʻi ai ha hiva ʻa e Palaimelí ʻoku ui ko e “Lotu ʻa ha Kiʻi Tamasiʻi.” ʻOkú ne fai e fehuʻi, “Tamai Hēvani ʻokú ke ʻi ai? ʻOkú ke ongoʻi nai siʻeku lotú?” (Tohi Hiva ʻa e Fānaú, 6).

Pea ko e talí: ko e ʻio, ʻokú Ne ʻi ai.

Kapau ʻokú ke faʻa fifili pe ʻoku moʻui ʻa e Tamai Hēvaní, pea ʻoku taimi leva ke ke tūʻulutui ʻo ʻeke hake, “Tamai Hēvani, ʻokú Ke moʻui? Naʻá ku nofo moʻoni mo Koe ki muʻa peá u toki haʻu ki he māmaní? ʻE lava ke u toe foki hake ʻo nofo fakataha mo Koe?”

Te Ne tali hoʻo lotú. Te Ne ʻai ke ke ʻiloʻi ʻokú Ne ʻi ai. ʻOku ʻikai te ke teitei tuēnoa. ʻOku tau fie maʻu Ia he houa kotoa pē, pea ʻokú Ne ʻi ai maʻu pē maʻatautolu.