ʻI he Ongoongó
Aʻu e ʻInitanetí ki he Ngaahi Falelotu he Funga ʻo e Māmaní
ʻOku palani e Siasí ke fakahoko ki he peseti ʻe 85 ʻo e ngaahi falelotú ʻi māmani kātoa ʻa e ʻInitanetí ʻa ia ʻe vave ʻaupito ʻene ngāué, pea ʻe lava ʻa e hū ki aí taʻe toe ngāue ʻaki ha uaea, ka ko e meʻa faʻiteliha pē.
ʻE lava ke hū ai e kāingalotú ki he saiti ʻo e kau ngāue ʻa e Siasí ʻo kau ki he ngāue ʻa e hisitōlia fakafāmilí mei honau ngaahi falelotú pē; ʻe malava ai ʻe he kau taki ʻo e Siasí ke tauhi e ngaahi lekōtí, fakahū e ngaahi pepa ngāue fakafaifekaú, mo kau ʻi he ngaahi fakamafola ako fakatakimuʻá; pea ʻe lava ke fakaʻaongaʻi ai ʻe he kau faiakó ʻa e ngaahi mītiá kuo faʻu ʻe he Siasí ko ha fakalahi ki heʻenau ngaahi lēsoní.
Tokoni ʻa e Siasí ki he Honge ʻi ʻAfilika Hahaké
ʻOku laka hake ʻi he kakai ʻe toko 11.5 miliona ʻi ʻAfilika Hahake ʻoku nau fie maʻu fakavavevave ha tokoni ʻi he tuʻunga ʻoku nau ʻi aí ʻi he ʻikai ha ʻuhá, ko ia ʻoku ngāue fakataha ai e Siasí mo ha ngaahi kautaha lahi ke fai ha tokoni ki he hongé ʻi he meʻakai, faitoʻo, ngaahi nāunau ki he moʻui leleí, mo e nofoʻangá.
Ko e kāingalotu ʻe fie tokoni ki he ngāué ni ʻe lava pē ke nau foaki ki he paʻanga tokoni ʻofa fakaetangatá.
Ako Foʻou ʻi he Malaʻe Ngāue Fakafaifekaú ko e Fakalahi ki he Ako he MTC
ʻOku ʻomi ʻe ha polokalama naʻe kamata ʻi ʻAokosi ʻo e 2011 ha toe uike kehe ʻe 12 ʻo hono akoʻi ʻo e kau faifekau ne nau toki mavahe mai mei he senitā akoʻanga fakafaifekaú.
Naʻe fakamatala ʻe Lisiate Hitoni, ko e talēkita ʻo e MTC ʻi Polovó ʻo pehē, ʻoku ʻikai ko ha polokalama foʻou e toe ako ko ʻeni ʻi he malaʻe ngāue fakafaifekaú, ka ko hano toe fakalahi atu pē ʻo e ako naʻe fai ʻe he kau faifekaú ʻi he MTC.
Naʻá ne pehē, “ʻoku fakahinohino ʻe he tohi lēsoni ko e ʻUluaki Uike ʻe 12 ki he kau faifekau hoa takí mo honau ngaahi hoa ngāue fakafaifekau foʻoú ʻa e ngaahi maʻuʻanga tokoni ʻi he Malangaʻaki ʻEku Ongoongoleleí te nau fie maʻu lahi taha ʻi honau ʻuluaki uike ʻe 12. Ko ha fakahinohino ia ki he founga te nau … hoko kakato ai ko ha kau tamaioʻeiki ʻa e ʻEikí ʻi he vave tahá.”
Naʻe meimei ke fakaʻaongaʻi ʻe he kau palesiteni fakamisioná ʻa e ngaahi nāunau ako maʻá e kau faifekau foʻoú ʻi he malaʻe ngāue fakafaifekaú—ʻa ia ʻoku kau ai ʻa e ngaahi tohi ako ʻe tolu mo e vitiō foʻou ki he ako mo e hoá—ʻi he taimi pē ko iá.