Hoko ko ha Sīpinga Haohaoa
Kau talavou ʻo e Siasí—tīkoni, akonaki, mo e kau taulaʻeiki fakaʻeiʻeiki ʻo e Lakanga Taulaʻeiki Faka-ʻĒloné—kuo mou toʻo kiate kimoutolu ʻa e huafa ʻo e Fakamoʻuí; ʻoku mou maʻu Hono lakanga fakataulaʻeiki toputapú; kuo ui kimoutolu ke fai ʻEne ngāué pea tāpuekina kotoa kinautolu ʻoku mou mahení. Ko e taimi ʻeni ke fakahoko ai ho ngaahi fatongia ʻi he lakanga fakataulaʻeikí pea “ulo atu” ko ha “fuka ki he ngaahi puleʻangá” (T&F 115:5).
Ko e taimi ʻeni ke “tuku ke ulo pehē hoʻomou māmá ʻi he ʻao ʻo e kakaí, koeʻuhí ke nau mamata ki hoʻomou ngaahi ngāue leleí, pea fakamālōʻia ʻa hoʻomou Tamai ʻa ia ʻoku ʻi he langí” (Mātiu 5:16). Ko Sīsū Kalaisi ʻa e sīpinga haohaoá. Feinga ke ʻiloʻi Ia, muimui ʻiate Ia, pea hoko ʻo tatau ange mo Ia ʻaki e talangofua ki Heʻene ngaahi fekaú pea tauhi e ngaahi tuʻunga moʻui ʻa e Siasí ʻi hono fakamatalaʻi ʻi he Ki Hono Fakamālohi ʻo e Toʻu Tupú. ʻI hoʻo fai iá, te ke hoko ai ko ha maama lahi ʻo e mālohi fakalaumālie kiate kinautolu ʻoku mou feohí.
Naʻe folofola ʻa e ʻEikí, “Ke maʻa ʻa kimoutolu ʻoku fua e ngaahi ipu ʻa e ʻEikí” (T&F 133:5). ʻE hanga ʻe he maʻa ho ʻulungāangá ʻo ʻai ke ke ulo atu ʻaki ha maama makehe ki he kau mēmipa ho uōtí pe koló ʻi hoʻo fakafofongaʻi taau e Fakamoʻuí ʻi hono fakahoko e sākalamēniti toputapú maʻanautolu he Sāpate kotoa.
Tokanga pea fakaʻaongaʻi e faingamālie he ʻaho kotoa pē ke tokoni ki ho fāmilí, kaungāmeʻá, kau mēmipa ʻo e kōlomú, mo e niʻihi kehé. Te ke hoko ko ha tokotaha fiefia ʻi hono foaki e māmá maʻanautolu pea mo kinautolu ʻoku nau siofi fakalongolongo pē koé.
Ulo atu ʻaki e fakakaungāmeʻa mo e angaʻofa moʻoní ki he taha kotoa pē. Vahevahe ki ho ngaahi kaungāmeʻá e ngaahi tāpuaki fakaofo ʻo e ngaahi ngāue ʻa e Siasí mo e ngaahi akonaki ʻo e ongoongoleleí. Ke ke loto-toʻa pea fakaafeʻi kinautolu ke haʻu ki he Maama mo e Moʻui ʻo e Māmaní—ʻa ia ko Sīsū Kalaisi.
ʻOku mau ʻofa atu kiate kimoutolu. ʻOku mau lotua kimoutolu. ʻOku mau fakamoʻoni atu ʻoku ʻofa ʻa e ʻEikí ʻiate kimoutolu pea fie maʻu kimoutolu ke tokoni ke langa Hono puleʻangá. Ko e taimi ʻeni ke mou “tuʻu hake pea ulo atu” ʻi hoʻo maʻu e lakanga fakataulaʻeiki māʻoniʻoní. ʻI hoʻo faivelenga ʻi he lakanga fakataulaʻeikí ni mo fakahoko ho fatongia ki he ʻOtuá, ʻe hoko hoʻo māmá “ko ha fuka ki he ngaahi puleʻangá.”