Ko ha Koloa Mahuʻinga

Ne u faʻa ngāue ʻi ha senitā talitali kakai ʻa ia naʻe faingataʻa ke feohi ai e kau ngāué. Naʻe fakakaukau homau pulé ke fai ha kai hoʻatā maʻá e kau ngāué kotoa ʻi ha ʻaho Tokonaki ke lava ke mau maheni. Naʻá ne talamai ke mau ʻomi ha meʻa ʻoku mahuʻinga kiate kimautolú pea fakamatalaʻi ʻa e ʻuhinga ʻoku mahuʻinga aí.

ʻI heʻeku fakakaukau ki he meʻa naʻá ne kole maí, ne u ʻilo ko e faingamālie ʻeni ke akoʻi ai e ongoongoleleí ki hoku kaungā ngāué. Koeʻuhí ko e lotú ko ha kaveinga pelepelengesi, naʻá ku ʻilo ʻoku totonu ke u tokanga ki he meʻa ko iá pea mo e anga hono fakamatalaʻi ʻene mahuʻinga kiate aú.

ʻI he ʻaho ne fai ai e maʻu meʻatokoni hoʻataá, ne mau fiefia ke toe maheni ange mo e taha kotoa. Hili e maʻu meʻatokoni hoʻataá naʻe kamata leva ʻe homau pulé hono fakahā mai ʻene meʻa mahuʻingá—ko ha tohi tā ʻo hono fāmilí. Naʻá ne fakamatalaʻi e ngaahi faingataʻa naʻe fou ai ʻi he vete mo hono husepānití, pea hoko ko e faʻē ʻikai ha mali, pea mo ʻene kamataʻi ha moʻui foʻou.

Hili ha ngaahi fakaʻaliʻali lahi naʻe hoko mai leva kiate au. Ne u fakahā ange ki hoku kaungā ngāué ʻoku ou haʻu maʻu pē mo e meʻa ʻoku ou mahuʻingaʻia aí he ʻaho kotoa; ʻa ia ko hoku foʻi mama FKT. Naʻá ku talaange ʻoku ʻuhinga e mataʻitohí ki he “Fili Ki he Totonú” pea ʻoku fakamanatu mai ʻe he foʻi mamá ke u tauhi maʻu pē ʻa e ngaahi fekau ʻa e ʻOtuá. Naʻe lahi e kakai ne nau ʻeke ha ngaahi fehuʻi kau ki he Siasí mo e tui ʻa e Kāingalotú, pea ne u maʻu ai ha faingamālie ke tala kiate kinautolu ʻa e mahuʻinga ʻo e ngaahi fāmilí ʻi he palani ʻa ʻetau Tamai Hēvaní maʻa ʻEne fānaú, ʻe lava ke taʻengata ʻa e fāmilí, pea ʻoku ʻi ai ha Fakamoʻui naʻe foaki ʻEne moʻuí maʻatautolu. Naʻá ku toe vahevahe foki ha ngaahi meʻa ʻe niʻihi ne u aʻusia heʻeku ngāue fakafaifekaú. Ne u ongoʻi ʻa e Laumālié ʻi heʻeku leá, pea pehē foki ki hoku kaungā ngāué.

Hili e ʻaho ko iá ne ʻi ai mo ha niʻihi ne nau toe fai ha ngaahi fehuʻi kau ki he ongoongoleleí, peá u fakaafeʻi hanau tokolahi ke haʻu ki he lotú. Ne fetongi ʻeku ngāué ki mui pea ʻoku ʻikai ke u ʻʻilo pe naʻe toe fie ʻilo lahi ange ha niʻihi ʻiate kinautolu, ka ne u ongoʻi fiefia he naʻá ku fakamatala kiate kinautolu kuo ʻi māmani ʻa e Siasi moʻoni ʻo Sīsū Kalaisí pea ʻoku ʻi ai e palani ʻa e Tamai Hēvaní ki he fiefia ʻa ʻEne fānaú.

ʻOku ʻi ai hotau fatongia ke vahevahe ʻa e ongoongoleleí, ʻi heʻetau hoko ko e kāingalotu ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Te tau lava ke akoʻi ha ngaahi lēsoni mahuʻinga ʻaki ha fanga kiʻi meʻa iiki mo faingofua hangē ko e foʻi mama FKT, ʻa ia ʻe lava ke fakamoʻui ai hotau kāingá.