Maka, Ngahau mo e Pulu Ngaohi mei he Sinoú

ʻOku ʻikai ko ha meʻa fakafiefia ʻa e lue lalo ki ʻapi he tuku ʻa e akó. ʻOku ou faʻa fakakaukau ki he fika ʻoku ou fai mei ʻapí, mo e meʻa ʻoku fai he kalasi fakamālohisinó, pea taimi ʻe niʻihi ʻoku ʻikai ha meʻa ia ʻe fai ki ai ha fakakaukau.

Ka naʻe kehe ʻa e ʻaho ia ko ʻení. Naʻe ʻikai nonga hoku ʻatamaí. Naʻá ku sio atu ki ha toko ua ne u faʻa vaʻinga mo ia—ko Siosi mo Mākisi—ʻokú na ngaohi e pulu mei he sinoú mo tuhu mai kiate au.

Naʻe kaila mai ʻa Siosi mo ʻene katá, “Tēvita, haʻu ki heni! ʻOkú ma fie fakaʻaliʻali atu ha meʻa.”

Naʻe kata foki mo Mākisi.

Naʻe lahi ʻaki ʻe Siosi mo Mākisi ha taʻu ʻe taha ʻiate au, pea ʻe toe fuʻu lalahi mo ʻena toló. Ne u ʻiloʻi ʻe taimi siʻi pē kuo kamata haʻana tolo ʻaki au e pulu sinoú. Neongo naʻá na faʻa angalelei mai pē kiate au, ka ne u ʻilo ne na faʻo ha ʻaisi he ngaahi foʻi pulu sinoú.

Ne u kamata fakakaukau ki ha ngaahi founga te u lava ke taʻofi ai kinaua.

Lele ʻo kolosi he halá ke ʻoua te na maʻu au? ʻIkai, te na manukiʻi au pea ui ʻaki au ha ngaahi hingoa fakaoli.

Lele ʻaki e oma tahá ke fakalaka ʻiate kinaua? ʻIkai, ʻokú na veʻe vave ange kinaua ʻiate au pea ʻe vave pē haʻana maʻu au.

Fēfē ke mau tautolo? ʻOku ʻikai ko ha fakakaukau lelei ia, he ʻokú na toko ua kau toko taha pē. Naʻá na toe tuʻu kinaua ʻi ha foʻi māʻolunga, pea ʻikai ha feituʻu ia ke u toi ai.

Ne u fakakaukau ke fai ʻa e meʻa ʻoku ngali fakapotopotó—lue lelei hake pē ʻo fakalaka ʻiate kinaua mo fakaongoongo ki hano tolo mai e ngaahi foʻi pulu sinoú.

ʻI heʻeku ofi ki he foʻi māʻolungá, ne haʻu ki hoku ʻatamaí ha foʻi fakakaukau. Ne u manatuʻi ʻa Samuela ko e tangata Leimaná, ʻa ia naʻá ne malangaʻi e ongoongoleleí mei he funga ʻaá. Naʻe tolomakaʻi pea fana ngahauʻi ia ʻe he kakaí ko e ʻikai ke nau saiʻia heʻene malangá.

Naʻá ku ʻilo naʻe maluʻi ʻe he ʻEikí ʻa Samuela mei he maká mo e ngahaú. Mahalo te Ne ʻai ke ʻoua naʻa tau e ngaahi foʻi pulu sinoú ʻiate au.

Naʻá ku lotu loto pē ʻo kole ki he Tamai Hēvaní ke ʻoua naʻa tau ha foʻi pulu sinou ʻiate au. Naʻá ku ʻiloʻi ʻoku fie maʻu ke u toʻa pea ʻoua ʻe veiveiua—hangē pē ko Samuelá. ʻI heʻeku aʻu ki he foʻi māʻolungá, ne u ʻiloʻi fakapapau he ʻikai ke u lavea.

Pea hangē ko e meʻa ne u ʻiloʻi ʻe hokó, naʻe kamata ke ʻuha mai e ngaahi foʻi pulu ne ngaohi mei he sinoú. Naʻe maʻali mai ha foʻi pulu ʻe ua ofi ki hoku ʻulú pea ne u ongoʻi ʻene maʻili haké. Naʻe ʻi ai ha ngaahi foʻi pulu sinou ne fakalaka hake ʻi hoku umá, pea tō ha niʻihi ʻi hoku vaʻé, ka naʻe ʻikai pē ke tau ia ʻiate au. Hala ke tau ha taha!

Naʻe kei hoko atu pē e tolo ʻa e ongo tamaiki tangatá kae ʻoua ke u mamaʻo ʻaupito, ka ne u ʻiloʻi kuó u hao. Naʻe ʻikai ke fuʻu fakafiefia fēfē hoko atu e fononga ki ʻapí—ka naʻe ʻi ai pē ha meʻa ne u fiefia ai. Naʻe maluʻi au hangē ko e tangata Leimana ko Samuelá. ʻOku ou ʻiloʻi naʻe tāpuekina au ʻe he lotú mo hono ngāue ʻaki e tui ki he ʻEikí.