ʻOku ʻi ai nai ha kau ʻāngelo leʻo? ʻOku ʻi ai ha ʻāngelo kuo vahe mai kiate au?

ʻOku ʻikai ke ngāue ʻaki ʻe he folofolá ʻa e lea ko ia ko e “ ʻāngelo leʻo;” ka ʻoku lau e kau ʻāngeló ia ʻoku “nau tauhi mai” (vakai, ʻAmenai 1:25; Molonai 7:22–29). “ ʻOku lea ʻa e kau ʻāngeló ʻi he mālohi ʻo e Laumālie Māʻoniʻoní” (2 Nīfai 32:3) pea faʻa kau ʻi he ngāue ʻa e Laumālie Māʻoniʻoní ke fakanonga, fakahinohinoʻi maluʻi e angatonú, mo fakahā pe fakamoʻoniʻi e moʻoní. Ko ia ai, ʻe lava ke lau e Laumālie Māʻoniʻoní ko ha ʻāngelo leʻo.

Naʻe ako ʻaki ʻe ʻEletā Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē: “Talu mei he kamataʻangá ʻo fai mai ʻi he ngaahi kuonga fakakosipelí mo hono ngāue ʻaki ʻe he ʻOtuá ha kau ʻāngelo … ke fakahā ki Heʻene fānaú ʻa ʻEne ʻofá mo e tokangá. … Ka neongo pe ʻoku fai pe taʻefai ha mamata kiate kinautolu, ka ʻoku nau ofi maʻu pē” (“Ko e Tauhi Mai ʻa e Kau ʻĀngeló,” Liahona, Nōvema 2008, 29).

Naʻe teʻeki fakahā mai ʻe he ʻEikí ia pe ʻoku vahe mai ha ʻāngelo pau ke tokangaʻi e taha kotoa pē, ka te ke lava ke fakapapauʻi ʻoku ʻi ai e maluʻi mo e fiemālie fakalangi ʻoku lava ke maʻu. Kapau te ke fakaʻaongaʻi e tuí, te ke maʻu leva e tokoni ʻa e ʻOtuá, kau ai hono ʻomi e kau ʻāngeló ke fakamālohia mo fakafiemāleiʻi koe pea foaki atu mo e loto-toʻa ke fai ʻa ia ʻoku totonú.