Ke Ke Faivelenga

ʻI hoku taʻu 20, naʻe pau ke u fai ha sivi mamafa ʻaupito kae lava ke tali au ki ha ʻapiako pisinisi ʻiloa ʻi Falanisē. Ne u ako ʻi ha ngaahi houa lahi he ʻaho kotoa pē he taʻu ʻe ua. Pea ne u kei ʻalu maʻu pē ki he lotú mo e ʻinisititiutí pea fakahoko hoku ngaahi fatongia ʻi he Siasí.

Ko e konga mahuʻinga taha ʻo e siví ʻa e ʻinitaviú. Ne u ʻosi ʻinitaviu foki mo ha ʻapiako ʻe taha, pea naʻe ʻikai ke ola lelei koeʻuhi ko ʻenau ʻilo ko ha mēmipa au ʻo e Siasí.

Ne u sivi leva ki he ʻapiako ne u fie ako moʻoni aí. Hili e kamata ʻa e ʻinitaviú, naʻe kamata ke ʻeke mai ʻe he kau fai ʻinitaviú ha ngaahi fehuʻi kau ki he meʻa ʻoku ou fai he tuku e akó. Naʻá ku ʻiloʻi ko e fehuʻi ʻeni ʻe makatuʻunga ai hono tali pe taʻetali au ki he akó. Ka naʻá ku fakakaukau pē ʻo pehē te u tuʻu faivelenga ʻi heʻeku ngaahi tefitoʻi moʻoní.

Naʻá ku talaange, “Ko ha mēmipa au ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní,” pea ne u fakamoleki e miniti ʻe 15 ʻi hono fakamatalaʻi e meʻa ʻoku ou fai ʻi he Siasí.

Naʻe pehē mai ʻe he talēkita ʻo e akó, “ ʻOkú ke ʻilo, ʻoku ou fiefia ʻi hoʻo lea ʻaki ʻení. ʻI heʻeku kei akó, naʻá ku ako ʻi he ʻIunaiteti Siteití, pea ko e taha hoku kaungāmeʻá ko ha tangata Māmonga. Ko ha tangata lelei ia pea angaʻofa. ʻOku ou pehē ko e kakai lelei ʻaupito e kau Māmongá.”

He toki meʻa fakafiefia ia! Ko e taha au ʻo e kau fuofua kanititeiti ʻo e taʻu ko iá naʻe tali ke hū ki he ʻapiakó ni.

ʻOku ʻi ai ha lēsoni ʻe ua mei he talanoá ni. ʻUluakí, ʻoku ʻikai totonu ke tau taʻe tokaʻi e ivi tākiekina ʻoku tau maʻu ki he niʻihi kehé. Uá, ʻoku totonu ke tau tuʻu faivelenga maʻu pē ʻi heʻetau ngaahi tefitoʻi moʻoní. Fai ho lelei tahá, pea ʻe tokoniʻi koe ʻe he ʻEikí he meʻa ʻoku toé.