Loto-toʻa ke Matuʻuaki e Faingataʻá

Naʻe ʻuha lōvai pea tō mo ha ʻahiohio ʻi he pō hono ua ʻo e kemi fakasiteiki ʻemau Kau Finemuí. Naʻe meimei toko 24 e kau finemuí mo ha taki ʻe toko ua mei homau uōtí naʻe kau ki he kemí, pea mau fakaʻefihi pē ʻi ha kiʻi fale siʻisiʻi ke mau malu ai. Naʻe fakalalahi e ʻuhá, pea toe mālohi ange e matangí. Naʻá ku toutou manatu ki he lotu naʻe fai ki muʻa ʻe homau palesiteni fakasiteikí ke mau malú. Naʻe toe fai foki ʻe he kau kemi ʻi homau uōtí ha lotu, pea ne u toe fai pē mo haʻaku lotu fakatāutaha.

Naʻe tokolahi e fānau fefine naʻe ilifiá, pea naʻe mahinongofua pē hono ʻuhingá. Naʻe ʻikai ke fuʻu fefeka homau kiʻi falé, pea naʻe tuʻu tonu pē ia he veʻe vaitafé. ʻI ha miniti nai ʻe 20 naʻe toe kovi ange ʻa e matangí ʻo pau ke hola kotoa ai e siteikí mei honau fanga kiʻi fale fakauōtí ki he ngaahi fale ʻo e kau tokoní ʻa ia ne tuʻu hake ia ki he feituʻu naʻe māʻolunga angé. Ne toe fai ʻe heʻeku palesiteni fakasiteikí ha lotu, pea mau hivaʻi ha ngaahi himi, ngaahi hiva Palaimeli, mo ha ngaahi hiva nofo kemi ko e feinga pē ke mau ongoʻi fiemālie. ʻIo, naʻa mau ilifia, ka ne mau ongoʻi ʻe lelei e meʻa kotoa. Hili ha haafe houa naʻe sai ke mau foki ki homau ngaahi fale fakauōtí.

Ne mau toki ʻiloʻi kimui ʻa e meʻa ne hoko ki he ʻahiohió he pō ko iá. Ne mavaeua ia ʻo hoko ko ha ongo matangi mālohi. Naʻe takai e taha ʻiate kimautolu ʻo ʻalu ia ki he tafaʻaki toʻomataʻú pea takai hake e tahá ki he toʻohemá. Ne ʻikai tō mai kiate kimautolu e haʻahaʻa kovi taha ʻo e matangí!

ʻOku ou ʻilo naʻe fanongo mai e ʻOtuá ki heʻemau lotú he pō ko iá pea naʻá Ne maluʻi kimautolu mei he matangi mālohí. Ko e hā e ʻuhinga ʻe mavaeua ai ha ʻahiohio tuku kehe kapau ʻe finangalo e ʻOtuá ke pehē? ʻOku ou ʻiloʻi te tau lava ke lotu maʻu pē ki he Tamai Hēvaní koeʻuhi ko e afā ʻo e moʻuí, pea te Ne fanongo mo tali ʻetau lotú, pea ʻomi ha loto-toʻa mo e maluʻi ʻoku fie maʻu ke tau hao aí.