Puha ʻUhilá mo e Matangi Momokó

ʻI ha ʻaho ʻe taha he ʻosi ʻeku ngāue he Temipale ʻAitahō Folo, ʻi ʻAitahoó, ne u fie tokoni ke ʻave ha ongo tangata ki heʻena kaá, ʻa ia naʻe mate he hala lahí ʻi he fakatonga ʻo ʻAitahō Folo, ʻi ʻAitahō, USA. Naʻe ʻi ai foki ha ongomātuʻa angaʻofa naʻá na ʻomai ʻa Misa Tomisoni mo Misa Kalake ki he temipalé he ʻaho momoko ko ʻeni ʻo Tīsemá.

Naʻe ʻiloʻi fakapapau ʻe Misa Tomisoni ʻoku fie maʻu ha puha ʻuhila foʻou ki heʻene kaá. Naʻá ku ʻave ia ʻo fakatau mai ha puha ʻuhila ʻi he falekoloa kongokonga meʻalelé, pea koeʻuhí ne ʻi ai pē ha meʻangāue ʻi heʻeku kaá ne u loto ke fai hono fetongi ʻene puha ʻuhilá.

Ko e meʻa mālié he naʻá ku ʻomi hoku kofunima foʻou mo hoku vala māfana. Ne u fakaava hake e kaá, mo teuteu ke toʻo e puha ʻuhila motuʻa kuo mahá pea fetongi ʻaki ia e puha foʻoú.

Ke fetongi e puha ʻuhilá, ne pau ke u vete ha ngaahi konga lahi ʻo e kaá kau ai e uaipá. Ne u fakatokangaʻi hake ʻoku ʻikai lava ke hao kotoa ʻeku ʻū meʻangāué ʻi he ngaahi polotá mo e sikalú. Ne u feinga ke fakaʻaongaʻi ha meʻangāue kehekehe ʻi he ngaahi feituʻu kehekehe ka naʻe ʻikai pē ke homo e sikalú ia. Naʻe tikilī Faulenihaiti ʻe 5 ʻa e ʻea ʻi tuʻá (-15°C), pea naʻe toe havili momoko ange e ʻeá mei he ngaahi fuʻu loli ne lele hake he halá. Kuo aʻu ʻeni ki ha tuʻunga kuo ʻikai ke u toe ʻilo e meʻa ke faí.

Ne u tafoki hake ki he maʻuʻanga tokoni ofi tahá. Ne u lotu fakamātoato ʻo fakamatalaʻi ki he Tamai Hēvaní ʻeku fie maʻú pea kole ke Ne fakahomohomo e polotá mo e sikalú pe ko e fakahaaʻi mai ha founga ʻe lava ʻo fakahoko aí. ʻI he ʻosi ʻeku lotú, ne u toe toʻo mai e palaeá ke vete e sikalu ʻoku fiu feingaʻi ke homó. Ka naʻe ʻosi homo pē ia! Naʻá ku fakamālō fakamātoato mo fakalongolongo pē mo toʻo e sikalú mo hoko atu e ngāué.

Ne vave pē haʻaku ʻilo mo ha foʻi polota ki loto he kaá naʻe faingataʻa ke vete. Naʻá ku toe ongoʻi lōmekina pea lotu fakamātoato ange ke maʻu ha tokoni, pea toe lahi ange mo ʻeku falalá. Naʻá ku ongoʻi mālohi ke ʻuluaki vete ha ngaahi fuʻu foʻi polota ki loto atu pea mioʻi e meʻa fakamaʻu ʻo e puha ʻuhilá. Naʻe faingofua pē e homo ʻa e polota ne maʻú. Ne taimi siʻi mei ai kuó u toʻo ki tuʻa e puha motuʻá.

Ne u tui leva e puha ʻuhila foʻoú pea fokotuʻu e ngaahi konga naʻe veté ʻaki hoku nima kuo kamata ke mate ngūnguú. Ne u fakafehokotaki leva e ngaahi uaea hoko ki he puha ʻuhilá. Naʻe taaʻi ʻe Misa Tomisoni e kií mo malimali ʻi he moʻui ʻa e mīsiní. Naʻá ku tāpuniʻi leva e kaá mo e loto houngaʻia. Ne u ʻi tuʻa he meimei haafe houa pea heka ki heʻeku kaá kuo mamate hoku vaʻé.

Ne u muimui pē ʻia Misa Tomisoni mo Misa Kalake ke fakapapauʻi ʻokú na aʻu lelei ki hona ʻapí. ʻI heʻeku lele atu he halá, naʻe māfana lelei e meʻa fakamāfana ʻi heʻeku kaá pea kamata ke māfana hoku vaʻé. Naʻá ku fakamālō fiefia ki he Tamai Hēvaní ʻi Heʻene tokoní. Ne u ongoʻi ʻa e fiefia ke ʻiloʻi naʻá Ne tali e lotu ʻa e ongo tangatá ni ʻaki ʻEne fekauʻi mai au, ko ʻene tamioʻeikí, ke tokoni. ʻI Heʻene founga fakaofó naʻá Ne feau ai ʻena fie maʻú pea toe fakamālohia ai mo ʻeku tuí.