Kau Finemui, Tuʻu Hake pea Ulo Atu!

Ko e kaveinga ʻo e Mutualé ki he taʻu ní ko ha ui ke ke hoko ko ha taki. Ko ha ui ia kiate koe ke ke takimuʻa ʻi he maʻá, tāú, mo e māʻoniʻoní. Ko ha ui ia ke liliu e māmaní!

ʻI hoʻo hoko ko e konga ʻo e kautaha ʻa e Kau Finemuí, naʻe foaki atu kiate koe ha kahoa ʻoku hā ai ha tūhulu koula mo hinehina ke tui ke fakamanatu atu ko e finemui koe ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, pea te ke tuʻumaʻu he moʻoní mo e angatonú pea tuʻu hake ʻo fakaulo atu hoʻo māmá ki he māmaní. ʻOku ʻuhinga ia te ke faitotonu ki ho tuʻunga fakalangi ko ha ʻofefine mahuʻinga ʻo e ʻOtuá. ʻOku ʻuhinga ia te ke tuʻu ko ha fakamoʻoni kiate Ia mo e Fakamoʻuí “ ʻi he taimi kotoa pē pea ʻi he meʻa kotoa pē, pea ʻi he feituʻu kotoa pē te mou ʻi aí” (Mōsaia 18:9).

ʻOku mau ʻamanaki te ke tui fakalaulaukau he taʻú ni ho kahoa ko e foʻi tūhulú ke fakamanatu ko e faʻifaʻitakiʻanga koe maʻanautolu ʻi ho tafaʻakí. Te ke “ulo atu” ʻi hoʻo lotu fakaʻahó, lau e Tohi ʻa Molomoná, talangofua ki he ngaahi tuʻunga moʻui ʻi he Ki Hono Fakamālohia ʻo e Toʻu Tupú, pea malimali. ʻOku mau ʻiloʻi ko hoʻo tauhi ko ia e ngaahi fekaú mo moʻui ʻaki e ngaahi tuʻunga moʻui ʻoku ʻi he Ki Hono Fakamālohia ʻo e Toʻu Tupú, ʻe hā atu meiate koe ʻa e fiefiá peá ke feʻunga ke tataki koe ʻe he Laumālie Māʻoniʻoní. ʻE lava ʻe he tataki ko ʻení ʻo tokoniʻi koe ke fai e ngaahi fili te ke feʻunga ai ke maʻu ha lekomeni temipalé.

ʻOku mau fakamoʻoni ʻi heʻemau hoko ko e kau palesitenisī lahi ʻo e Kau Finemuí, ʻi hoʻo fai e ngaahi meʻá ni, ʻe ʻi ai e Fakamoʻuí ke fakamaama ho halá. Naʻá Ne talaʻofa mai kiate koe, “Pea te u hoko foki ko hoʻomou maama … ; pea te u tofa ʻa e hala kimuʻa ʻiate kimoutolú, ʻo kapau te mou tauhi ʻeku ngaahi fekaú; … pea te mou ʻilo ai ko au ʻoku tataki ʻa kimoutolú” (1 Nīfai 17:13).