Pole ke Tuʻu Toko Taha

“ʻOku ou tui ne u fuofua taukapoʻi ʻeku ngaahi tuí heʻeku ngāue ʻi he Tautahi ʻa ʻAmeliká ʻi he fakaʻosinga ʻo e Tau Lahi Hono II ʻa Māmaní. …

“He ʻikai teitei ngalo ʻiate au e ʻuluaki Sāpaté [ʻi he ʻapiako fakakautaú]. Ne mau maʻu ha ongoongo fakafiefia mei he ʻōfisa pulé. Ne mau tuʻu laine ʻi he malaʻe fakamālohisinó [ʻi ha angi mokomoko ʻa e ʻea ʻo Kalefōniá] ʻo fanongo ki he angi ko ʻení: ‘ʻE ʻalu e tokotaha kotoa ʻo lotu he ʻahó ni—ʻa e taha kotoa, tuku kehe pē au. Te u maʻu ha mālōlo!’ Naʻá ne kaikaila leva, ‘Ko e kau Katolika kotoa pē, mou fakataha ki Kemi Tikeita (Camp Decatur)—pea ʻoua naʻa mou foki mai kae ʻoua kuo hoko e tolú. Mou laka atu!’ Naʻe mavahe atu ha tokolahi. Naʻá ne ui mai e angi hono hokó: ‘Ko kimoutolu kau Siú, mou fakataha ki Kemi Henelī (Camp Henry)—toki foki mai he hoko ʻa e tolú. Mou laka atu!’ Naʻe mavahe atu mo ha tokosiʻi ange ki ai. Peá ne pehē mai leva, ‘Toenga ʻo kimoutolu kau Palotisaní, ʻoku mou fakataha ʻi he ngaahi fale faiva ʻi Kemi Falakesi (Camp Farragut)—pea ʻoua naʻa mou foki mai kimuʻa he hoko ʻa e tolú. Mou laka atu!’

“Tuai-e-kemo ne u fakakaukau, ‘ʻE Monisoni, ʻoku ʻikai ko ha Katolika koe; ʻoku ʻikai ko ha Siu pe Palotisani koe. Ko e Māmonga koe, ko ia, tuʻu maʻu heni!’ Te u talaatu ne u ongoʻi lototoʻa mo lotoʻaki—ka naʻe ʻikai ko au toko taha pē.

“Ne u fanongo leva ki he kupuʻi lea lelei taha kuo lea ʻaki ʻe ha ʻōfisa pule. Naʻá ne sio mai peá ne fehuʻi, ‘Pea ko e hā leva kimoutolu?’ ʻI heʻene aʻu ki he mōmeniti ko iá, ne teʻeki ke u fakatokangaʻi ʻoku ʻi ai ha taha ʻe tuʻu hoku tafaʻakí pe ʻi mui ʻiate au ʻi he malaʻe ako laká. Ne mau tali fakataha hake, ‘Māmonga!’ ʻOku faingataʻa ke u fakamatalaʻi e fiefia ne u maʻu ʻi heʻeku tafoki hake ʻo vakai atu ki ha kau tautahi tokosiʻi kehe.

“Naʻe vaku ʻulu e ʻōfisá pea fifili hono fofongá pea faifai peá ne pehē mai, ‘Mou ō ʻo kumi ha feituʻu ke mou fakataha ai. Pea toki foki mai pē he hoko ʻa e tolú. Mou laka leva!’ …

“Neongo ne kehe e meʻa ne hoko aí mei he meʻa ne u ʻamanaki ki aí, ka ne u ʻosi loto fiemālie pē ke u tuʻu toko taha, ʻo kapau naʻe fie maʻu.

“Talu mei he ʻaho ko iá, kuo ʻi ai ha ngaahi taimi naʻe ʻikai tuʻu ai ha taha ʻi hoku tuʻá pea ne u tuʻu toko taha pē. ʻOku ou fakafetaʻi ne u fai fuoloa ha fili ke u loto-toʻa mo mateaki pea mateuteu maʻu pē ke taukapoʻi ʻeku tui fakalotú.”

Ngaahi Fehuʻi ke fakalaulauloto ki ai:

• Ko e hā ha tokoni ʻo ʻetau tuʻumaʻú ʻi he moʻui ʻa e niʻihi kehé?

• Te ke lava ʻo manatuʻi ha taimi ne siviʻi ai hoʻo loto-toʻá mo e loto fakapapaú? Naʻá ke tali fēfē ia?

• Ko e hā te tau lava ʻo fai ke tau mateuteu ai ke tuʻumaʻú?

Fakakaukau ke hiki hoʻo ngaahi fakakaukaú ʻi ha tohinoa pe aleaʻi ia mo ha niʻihi kehe.