Fakakaungāmeʻa he Pasifikí

ʻI he taimi naʻe teuteu ai e fānau ako neesi mei he ʻUnivēsiti Pilikihami ʻIongí ke nau folau ki Tongá, naʻa nau fakakaukau ko e meʻa lelei ki he fānau mei ʻIutaá ke nau fakakaungāmeʻa ki he fānau ʻi Tongá.

Ko ia naʻe kole ai e fānau akó ki he fānau Palaimeli ʻo e Uooti ʻOke Hila Hiva ʻo Polovo ʻi ʻIutaá ke nau tā ha ngaahi fakatātā maʻá e fānau ʻi Tongá. Naʻa nau toe faitaaʻi foki mo e fānaú.

ʻI heʻenau aʻu ki Tongá, naʻe tokoni e fānau ako nēsí ʻi he taimi feʻinasiʻaki ʻa e Uooti Neiafu Tolú. Naʻá nau ʻave ki he fānau takitaha ha fakatātā mo ha laʻitā ʻo e fānau mei ʻIutaá. Naʻe fiefia e fānaú ke ako kau ki honau ngaahi kaungāmeʻa mei ʻIutaá.

Naʻe tā leva ʻe he fānaú ha ngaahi fakatātā maʻá e fānau ʻi ʻIutaá. Ne ʻi ai ha niʻihi naʻa nau tohi ha ngaahi fakamatala kau kiate kinautolu mo e anga e moʻui ʻi Tongá. Naʻe ʻi ai ha ngaahi pōpoaki naʻe tohi ʻi he lea faka-Pilitāniá pea niʻihi ʻi he lea faka-Tongá. Naʻe hanga leva ʻe heʻenau palesiteni Palaimelí ʻo liliu ki he lea faka-Pilitāniá e ngaahi pōpoaki naʻe lea faka-Tongá. Naʻe faitaaʻi leva ʻe he fānau ako nēsí ʻa e fānaú.

Naʻe tohi ʻe ha tamasiʻi ʻe taha, “ʻOku ou vaʻinga ʻakapulu, pea ʻoku fuʻu ʻafu ʻaupito ʻa Tonga.” Naʻe tohi ʻe ha kiʻi taʻahine, “ʻOku ou saiʻia ho laʻitaá. ʻOkú ke fakaʻofoʻofa ʻaupito. ʻOku ou manako he hivá, hangē pē ko koé.” Naʻe tohi ha taha ʻo kau ki he Palaimelí mo fakahaaʻi ʻene ʻofá: “Ko ʻeku lēsoni he ʻaho ní naʻe fekauʻaki ia mo e kau palōfitá. ʻOku ou ʻofa lahi atu kiate kimoutolu!”