Ko Hono Tokoniʻi e Fānaú ke nau ʻOfa he Tohi ʻa Molomoná

Koeʻuhí ko e lea ʻo e folofolá ʻoku kiʻi foʻou pea fakangatangata pē mo e ngaahi foʻi lea ʻoku ʻilo ʻe he fānaú, ʻe lava ke faingataʻa ai hono akoʻi e fānaú ke nau ʻofa he Tohi ʻa Molomoná. ʻI he taimi naʻe kei iiki ai ʻema fānaú, naʻe taimi nounou pē tuku ʻenau tokangá ʻi ha meʻa pea faʻa nounou ai pē ʻemau taimi ako folofolá. Naʻa mau faʻa fakaʻaongaʻi ʻa e ngaahi folofola ʻoku ʻi ai e fakatātaá ki heʻemau ako folofola fakafāmilí.

Ne u faʻa fakaʻaongaʻi e ngaahi talanoa mei he folofolá ʻi he taimi mohe ʻema fānaú, ke fakamālohia e ngaahi tefitoʻi moʻoni ʻoku lau mo nau ako ʻi he ako folofolá. Naʻe vahevahe mai ʻe hoku ʻofefiné ʻi he ngaahi taʻu ki muí ʻa e ivi lahi ʻo e meʻá ni. Naʻá ne pehē, “ ʻOku ou tui ko e ngaahi talanoa ʻoku toutou talanoaʻí naʻe hoko ia ko e meʻa ne mau manako ai. Naʻá ke faʻa tangutu ʻi homau veʻe mohengá ʻo vahevahe mai ha ngaahi talanoa mei he folofolá. Naʻá mau manako ai pea toutou kole atu ke fai ia koeʻuhí ʻi he toʻu ko iá ʻoku mau lava ke ongoʻi ʻa e laumālie ʻo e pōpoaki pea mau ʻiloʻi ko e kakai lototoʻa mo faivelenga naʻá ke talanoaʻi mai kiate kimautolú. Naʻa mau loto ke hangē ko kinautolú.”

Ko hono moʻoní, ʻi he matuʻotuʻa ʻema fānaú, ne mau lau hangatonu pē mei he Tohi ʻa Molomoná pea mo e ngaahi folofola kehé. Naʻá mau feinga faivelenga ke lau e folofolá he pongipongi kotoa pē, neongo naʻe ʻi ai e ngaahi taimi naʻe kei pulupulu mai pē ʻe he fānaú honau sipí pea kei kuikui pē honau matá. Ka neongo iá, ʻoku nau talamai naʻa nau fanongo pē, manatuʻi, mo tō e ngaahi tenga ki he kahaʻú.

Naʻá ma toe fakamamafaʻi foki e folofolá ʻi heʻemau efiafi fakafāmili ʻi ʻapí. Hangē ko ʻení, naʻá ma fakakau maʻu pē ha ngaahi ʻekitivitī hangē ko hono fakatātaaʻi ʻo e folofolá: ʻe fakatātaaʻi ʻe he kau mēmipa ʻo e fāmilí ha talanoa mei he folofolá, pea feinga leva e toengá ke mateʻi e foʻi talanoá. Naʻe manako ʻema fānaú he vaʻinga ko e “Ko Hai Au?”—ko ha foʻi vaʻinga ʻoku mau ʻoatu ai ha ngaahi fakahinohino lahi kae ʻoua leva kuo nau mateʻi mai e tokotaha mei he Tohi ʻa Molomoná ʻoku mau feinga ke nau ʻiloʻí. ʻI he kamata ke matuʻotuʻa ange ʻema fānaú, naʻa nau kau ʻi hono teuteuʻi mo fakahoko e ngaahi lēsoní.

ʻI heʻema fakafeʻungaʻi e efiafi fakafāmilí ki he ngaahi fie maʻu lolotonga ʻa e fāmilí, naʻá ma ngāue ʻaki e ngaahi talanoa mo e fakakaukau mei he Tohi ʻa Molomoná ke tokoni ki hono akoʻi e ngaahi tefitoʻi moʻoní. Hangē ko ʻení, naʻá ma fakatefito ha lēsoni ʻi he angamaʻá mo e fakaʻehiʻehi mei he ponokalafí mei he faleʻi ne fai ʻe ʻAlamā ki hono foha ko Kolianitoní ʻi he ʻAlamā 39. Ko ha lēsoni lelei ki he fakaʻehiʻehi mei hono fakaʻilongaʻi hotau sinó ʻaki e tātataú naʻe maʻu ia mei he talanoa ʻo e kau ʻAmelikaí ʻi he ʻAlamā 3.

Kuó u teuteu ha ngaahi lēsoni kau ki he founga totonu hono fakaleleiʻi e kē ʻa e fānaú mei he moʻui ʻa Nīfaí (vakai, 1 Nīfai 7:20–21; 16:4–5), Sēkope (vakai, 2 Nīfai 2:1–3), mo Kolianitoni (vakai, ʻAlamā 39:1, 10). Ko e fakamatala ki he ngāue fakamātoato ʻa ʻAlamā mo ʻAmuleki ʻi he ʻAlamā 14:12–28 ʻoku akoʻi ai e faʻa kātaki ʻi he faingataʻá. Ko e taha e tefitoʻi moʻoni mahuʻinga ne mau ako mei he ngaahi meʻá ni mo e ngaahi kaveinga kehé ko hono fakapapauʻi ʻokú ma akoʻi ia ki heʻema fānaú ki muʻa pea nau fehangahangai mo e meʻa ko iá pe hoko ia ko ha palopalema ki heʻenau moʻuí.

Naʻá ma fakatokangaʻi ʻoku mahuʻinga ke fai ha ngaahi fehuʻi ʻe lava ke tokoniʻi ai ʻema fānaú ke nau sio ki he mahuʻinga e meʻa ʻoku nau laú, ʻo fakalahi atu ki hono lau e folofolá. Naʻe kehekehe pē e faingataʻa ʻo e ngaahi fehuʻí ni ʻo makatuʻunga pē ʻi honau taʻú, ka ko e meʻa mahuʻingá ke akoʻi kinautolu ke fekumi ki he ngaahi fakakaukau mo e anga hono fakaʻaongaʻí ʻe tokoni ke nau ʻiloʻi ai e lahi ʻo e meʻa ke ako mei he Tohi ʻa Molomoná.

Hangē ko ʻení, ne u ʻeke ange pe ko e hā e ʻuhinga ʻoku nau fakakaukau naʻe pehē ai ʻe Nīfai naʻá ne “sio ki ha ngaahi faingataʻa lahi lolotonga ʻa [hono] ngaahi ʻahó” pea ʻi he laine hokó pē kuó ne lea ʻaki ʻe ia ha meʻa ne hangē ʻoku tuʻu fehangahangaí: ʻa ia kuó ne “ ʻofeina lahi ʻe he ʻEikí” (1 Nīfai 1:1). ʻI heʻemau fealeaʻakí, naʻe ʻiloʻi ʻe heʻema fānaú neongo naʻe fakahaofi ʻe he ʻEikí ʻa Nīfai mei heʻene ngaahi faingataʻá, ka naʻá Ne toe ʻoange foki kia Nīfai ha mahino lahi ange ki Heʻene ngaahi meʻa liló (vakai, 1 Nīfai 1:1, 20).

ʻOku ako lelei ʻaupito e fānaú mo e toʻu tupú ʻi he taimi ʻoku tau tokoni ai ke nau ako ke ʻiloʻi pē ʻe kinautolu ʻa e moʻoní. ʻI heʻenau fai iá, te nau ongoʻi ʻoku ueʻi kinautolu ke nau ʻofa mo fakaʻaongaʻi e Tohi ʻa Molomoná he kotoa ʻenau moʻuí pea ongoʻi mateuteu ke tokoniʻi e niʻihi kehé ke fai mo e meʻa tatau.

Naʻe ʻiloʻi ʻe heʻema fānaú ʻokú ma ʻiloʻi ʻoku ʻi ai ha ngaahi talanoa moʻoni ʻo ha kakai moʻoni ʻi he Tohi ʻa Molomoná. Naʻa nau sio ki he meʻa naʻá ma sio ki aí, ʻilo e meʻa naʻá ma ʻiló, pea ongoʻi e anga ʻema ongo kau ki he Tohi ʻa Molomoná. Naʻe hanga ʻe he meʻá ni ʻo fakamālohia ʻenau fakamoʻoní, pea tokoniʻi kinautolu ke nau ʻofa he Tohi ʻa Molomoná, pea tataki ai kinautolu ke fai mo e meʻa tatau ki heʻenau fānaú.