Naʻe fakatapui e Temipale Seni Salavatoa ʻEla Salavatoa ʻi he ʻaho Sāpate, 21 ʻo ʻAokosi 2011, ʻe Palesiteni Henelī B. ʻAealingi, ko e Tokoni ʻUluaki ʻi he Kau Palesitenisī ʻUluakí. Ko e temipale ʻaki ia hono fā ʻo e Siasí ʻi ʻAmelika Lotolotó mo e fika 135 ʻi māmani kātoa.

Ne kau mai ha kakai ʻe toko 26,000 nai ki he ongo fakafiefia fakafonua he ʻaho Tokonaki, 20 ʻo ʻAokosí, ʻa ia ne toe fakamatalaʻi ai ʻa e hisitōlia fakafōnua fakaʻofoʻofa ʻo e feituʻú ʻi he hivá mo e ngaahi faivá.

Kuo fakaafeʻi ʻe he Siasí e kāingalotú ke nau fakahū mai ha ngaahi mūsika mo ha ngaahi faile kehe pē ke fai ki ai ha fanongo ki he create.lds.org ke fakaʻaongaʻi ʻi he Mormon Channel Radio pea ʻi he ngaahi mītia kehe ʻa e Siasí. ʻE lava foki ke lau ʻe he kāingalotú ʻa e fakaikiiki ʻo e fakaafé ʻi he news.lds.org (fekumi ʻo fakaʻaongaʻi ʻa e “create.lds.org”) pea ʻe lava pē ke fakahū e ʻū failé ʻi he create.lds.org.

Kuo ʻosi fakahā ʻe he kau palesitenisī lahi ʻo e Palaimelí ko e kaveinga ʻo e taimi feʻinasiʻakí ki he 2012 ko e “Fili ki he Totonú.” ʻE lava ke hū e kau palesitenisī ʻo e Palaimelí ki he “Primary” ʻi he konga ko e Serving in the Church ʻi he LDS.org.

ʻI he kuohilí, naʻe ʻave ki he ngaahi ʻiunití ʻi Siulai ʻo e taʻu takitaha ha tatau ʻe 10 ʻo e polokalamá, ka koeʻuhí ko e ʻikai maʻu e ʻInitanetí he ngaahi feituʻu ʻe niʻihi, ʻe taʻofi hono meili atu ʻi Siulaí kae ʻoatu ki he ʻiuniti takitaha ha tatau ʻe 3 ʻo fakatatau ki he fakahokohoko ʻo e polokalama fakataʻú.