Naʻe fekau ʻe he ʻEikí ke tau tuʻu hake pea ulo atu.
5 Ko e moʻoni ʻoku ou pehē kiate kimoutolu kotoa pē: Tuʻu hake pea ulo atu, koeʻuhí ke hoko ʻa hoʻomou māmá ko ha fuka ki he ngaahi puleʻangá.
ʻOku ou Pehē Kiate Kimoutolu Kotoa pē
Naʻe fai ʻe he ʻEikí ha fakahinohino ʻi he fakahā ko ʻeni he 1838 ʻo kau ki hono langa ha temipale ʻi he Hihifo Mamaʻó, ʻi Mīsuli kae ʻumaʻā ha ngaahi fakakaukau kehe ki hono fokotuʻu ʻo Saioné. Naʻá Ne toe ʻomi foki mo e hingoa ʻo Hono Siasí ʻi he ngaahi ʻaho fakaʻosí: Ko e Siasi ʻo e Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Neongo naʻe fai ʻa e fakahā ko ʻení ki he kau taki ʻo e ʻaho ko iá, ka ko e fekau ke “tuʻu hake pea ulo atú” ʻoku ʻuhinga ia kiate kitautolu kotoa he ʻaho ní.
Tuʻu Hake pea Ulo Atu
ʻĪmisi
Palesiteni Dieter F. Uchtdorf
“ ʻOku ʻi ai ha ngāue mahuʻinga ʻa e ʻEikí maʻamoutolu takitaha ke mou fai. ‘Tuʻu hake pea ulo atu, koeʻuhí ke hoko ʻa hoʻomou māmá ko ha fuka ki he ngaahi puleʻangá’ (T&F 115:5).ʻOkú Ne falala atu kiate koe, pea ʻokú Ne ui mo falala te ke tuʻu ʻo māʻolunga ange pea ulo lahi ange ʻi he ngaahi ʻaho faingataʻa kae fakaofo ko ʻení.”
Palesiteni Dieter F. Uchtdorf, Tokoni Ua ʻi he Kau Palesitenisī ʻUluakí, “Your Right to Choose the Right,” New Era, Aug. 2005, 8.
Hoʻo Māmá
Te ke fakaulo fēfē atu hoʻo māmá? Fakakaukau ki he ngaahi fakakaukau ko ʻení pea hiki ʻi hoʻo tohinoá ha niʻihi hoʻo ngaahi fakakaukaú.
Angaʻofa, angalelei pea loto fakatōkilalo.
Tuʻumaʻu pea moʻuiʻaki e ngaahi tuʻunga moʻui ʻo e Siasí.
Malimali pea fakaʻaliʻali e fiefia ʻi hono moʻui ʻaki e ongoongoleleí.
Vahevahe e ongoongoleleí ki ho ngaahi kaungāmeʻá.
Fai hoʻo fakamoʻoni ki he moʻoní.
Fuka
Fakaʻilonga—ko ha meʻa, ko e angamahení ko ha fuka ʻoku haʻi ʻi ʻolunga ʻi ha fuʻu pou pea ngāue ʻaki ko ha feituʻu ke fakatahataha mai ki ai pe ko ha fakaʻilonga. Vakai, Tokāteline mo e Ngaahi Fuakava 45:9.
ʻĪmisi
ʻEletā Russell M. Nelson
[“ ʻOku laka e kau toʻo fuká ʻi he ʻotu muʻá koeʻuhí ko ha meʻa mahuʻinga. ʻOku nau fakafofongaʻi ʻa e meʻa ʻoku leleí mo fakaʻeiʻeikí. ʻOku nau toʻo maʻu pē ʻenau fuká pe ngaahi fakaʻilonga kehe ke fakahaaʻi ko hai kinautolu, ʻa e taumuʻá mo e uouangatahá. …
“ ʻI heʻetau hoko ko ʻEne kau toʻo fuká, te tau tokoni ki he niʻihi ʻoku loto angatonú ke ʻiloʻi ʻa Sīsū. ʻOku ʻikai ke tau taʻalo holo e ngaahi fuká. … Ka ʻi heʻetau hoko ko e kau toʻo fuka ʻa Sīsū Kalaisí, ʻoku tau loto mo houngaʻia ke ʻai Hono huafa toputapú kiate kitautolu. ʻOku tau kau ki Heʻene ngāué ʻaki hono fai ha fuakava.”]
ʻEletā Russell M. Nelson ʻo e Kōlomu ʻo e Kau ʻAposetolo ʻe Toko Hongofulu Mā Uá, “Standards of the Lord’s Standard Bearers,” Ensign, Aug. 1991, 7.
Ngaahi Puleʻangá
ʻĪmisi
ʻEletā D. Todd Christofferson
“Pea ʻi he ʻahó ni, ʻoku tānaki fakataha mai ʻa e kakai ʻo e ʻEikí ‘mei he ngaahi fonuá’ ʻi heʻenau tānaki fakataha ki he ngaahi feohiʻanga mo e ngaahi siteiki ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻa ia kuo mafola atu ʻi he ngaahi fonuá. … ʻOku ui mai ʻa e ʻEikí kiate kitautolu ke tau hoko ko ha ngaahi fuka ʻo e anga māʻoniʻoní, ke tataki mai ki ai ʻa kinautolu ʻoku fekumi ki he nofo malú mo e ngaahi tāpuaki ʻo Saioné.”
ʻEletā D. Todd Christofferson ʻo e Kōlomu ʻo e Kau ʻAposetolo ʻe Toko Hongofulu Mā Uá, “Haʻu ki Saione,” Liahona, Nōvema 2008, 37.