Desisyuni Karon Dayon

Mapasalamaton kaayo ko sa mahigugmaong Langitnong Amahan tungod sa Iyang gasa sa kabubut-on, o sa katungod sa pagpili. Ang matag usa kanato mianhi dinhi sa yuta uban sa tanang himan nga gikinahanglan sa paghimo og sakto nga mga pagpili. Si propeta Mormon nag-ingon kanato, “Ang Espiritu ni Kristo gihatag ngadto sa matag tawo, siya masayud sa maayo gikan sa dautan” (Moroni 7:16).

Gilibutan kita sa mga mensahe sa kaaway: “Walay problema kon kausa lang kini.” “Ayaw kabalaka; walay bisan usa nga masayud.” Ang mga pagdesisyon kanunay nga anaa. Aron maalamon ang paghimo niini, ang kaisug gikinahanglan—ang kaisug sa pag-ingon nga dili, ang kaisug sa pag-ingon nga oo. Ang mga desisyon mao gayud ang motino sa atong padulngan.

Akong ipakigbahin kaninyo ang usa ka ehemplo ni Brother Clayton M. Christensen, miyembro sa Simbahan kinsa usa ka professor sa Harvard University.

Sa nag-edad siya og 16, si Brother Christensen nakadesisyon nga dili siya modula og sports sa adlawng Dominggo. Paglabay sa katuigan, dihang mitambong siya sa Oxford University sa England, siya ang sentro sa team sa basketball. Nianang tuiga wala pa silay pildi ug nakadula sila sa championship tournament.

Sayon ra nilang gidaog ang ilang mga dula sa tournament, nga nagdala nila ngadto sa finals. Dayon gitan-aw ni Brother Christensen ang iskedyul ug nakita nga ang final game dulaon sa Dominggo. Miadto siya sa iyang coach sa iyang problema. Ang iyang coach miingon kang Brother Christensen nga naglaum siya nga siya modula.

Si Brother Christensen miadto sa kwarto sa iyang hotel. Miluhod siya. Nangutana siya sa Langitnong Amahan kon mahimo ra ba kini, kini lang kausa, nga modula siya inig ka Dominggo. Miingon siya nga sa wala pa mahuman ang pag-ampo, nadawat na niya ang tubag: “Clayton, para unsa man nga nangutana pa ka nako? Nahibalo ka na sa tubag.”

Miadto siya sa iyang coach, misulti kaniya nga nasubo siya nga dili siya modula sa final game. Dayon miadto siya sa iyang mga miting sa Dominggo.

Si Brother Christensen nakakat-on nga mas sayon ang pagsunod sa mga sugo 100 ka porsyento sa panahon kay sa 98 ka porsyento sa panahon.

Mohangyo ako kaninyo sa paghimo og determinasyon karon dayon sa dili pagtipas sa dalan nga magdala kaninyo ngadto sa atong tumong: kinabuhing dayon uban sa atong Langitnong Amahan.