Dili ko Gusto nga Moserbisyo

Sa dihang 11 anyos pa ko, sa usa ka regional conference sa Johannesburg, South Africa, si President Howard W. Hunter (1907–95) milamano kanako ug miingon, “Magmisyon ka ug mahimong maayo nga misyonaryo sa umaabut.”

Kadaghanan sa batan-ong mga lalaki pagahambinon gayud kadto nga mga pulong. Dili ako. Sa sunod nga 10 ka tuig wala akoy tinguha nga mag-misyon. Mas nabalaka ko sa akong kalampusan sa sport ug sosyal nga kinabuhi. Naghunahuna ko nga ang pag-undang og duha ka tuig makapawala niining tanan. Atol sa akong mga interbyu sa akong mga presidente sa branch ug stake, mangatarungan ko nganong dili ko gusto nga moserbisyo.

Pagka-21 anyos, wala gihapoy tinguha nga mag-misyon, mibisita ko sa akong pamilya sa Estados Unidos, sa Iowa. Mibalhin sila didto sa miaging tuig. Samtang didto sa Iowa ako adunay kahigayunan sa pag-adto sa Templo sa Winter Quarters Nebraska uban sa mga dili minyo sa branch. Dili ko endowed, busa naghunahuna ko nga mohimo og mga bunyag alang sa patay.

Sa pag-abut sa templo, nahibaloan nako nga walay sesyon sa bunyag nga nakaeskedyul sa hapon. Naghunahuna ko, “Nan, unsa man ang akong buhaton sa sunod nga duha ug tunga sa oras?”

Midesisyon ko nga moadto sa Mormon Trail visitors’ center sa atbang. Human sa pagtan-aw sa 15 minuto nga salida kabahin sa mga pioneer, giabi-abi ko sa duha ka mga sister misyonaryo nga mismong maoy mo-tour nako. Human nga nasayud og gamay kabahin kanako, si Sister Cusick nangutana nganong wala ko mag-misyon. Ang sagad nga pagpangatarungan akong giingon. Si Sister Cusick mipamatuod dayon ngari kanako dili lang kabahin sa mga pioneer apan sa misyonaryo nga buhat usab.

Human sa tour naglingkod ko sa kwarto nga paabutanan sa templo, naghunahuna. Sa kalit lang, ang akong mga pagpangaturan sa dili pagserbisyo og misyon nahimong kasamok sa hunahuna. Ang Espiritu kusog nga nagpamatuod nga kinahanglan ko nga mag-misyon. Sukad niadtong higayona nga nakig-istorya ko sa mga sister missionary, ang tanan nausab. Ang Espiritu mipamatuod sa akong kasingkasing unsa ang kinahanglan nakong buhaton.

Mga pipila ka bulan ang milabay nahibaloan nako nga ang ligdong, hinay nga tingog nagdasig ni Sister Cusick nga ako mismo kinahanglang mag-tour. Wala siya masayud kon ngano, apan ang Ginoo adunay plano alang kanako.

Nagmisyon ko sa California Ventura Mission—ang pinakanindot nga misyon sa kalibutan—ug nakahimo og talagsaong panaghigalaay nga naglaum kong molungtad hangtud sa kahangturan. Wala ko motuo ni Presidente Hunter sulod sa 10 ka tuig, apan siya nasayud gayud unsa ang iyang gisulti.

Ang akong kinabuhi hingpit nga nausab, tungod sa usa ka sister missionary nga misunod sa mga aghat sa Espiritu Santo.