Gigiyahan sa usa ka Buhi nga Propeta

Sa dihang 16 anyos pa ako, aduna koy oportunidad nga mismong motambong sa kinatibuk-ang komperensya sa unang higayon. Ang akong pamilya nagpuyo sa kasadpang Oregon, USA, ug kami nagdrayb paingon sa Utah aron sa pagtambong sa komperensya ug paghatud sa akong magulang nga lalaki sa missionary training center.

Mitambong ko sa komperensya uban sa tinguha nga matudloan sa Espiritu Santo. Isip resulta, nakadawat ko og pagpamatuod gikan sa Espiritu nga tingali dili nako madawat kon wala pa nako andama ang akong kaugalingon.

Atol sa usa sa mga sesyon, ang tanan mibarug ug mikanta sa himno alang sa kongregasyon, “Guide Us, O Thou Great Jehovah.” Samtang nanganta mi, ako mibati og klarong impresyon nga molantaw sa palibut sa Conference Center. Gibuhat ko kini ug nasanapan sa gahum sa panaghiusa sa liboan ka mga tawo didto samtang kami nanganta sa pagdayeg sa Dios.

Dayon aduna akoy kasinatian diin mibati ko nga sama ni Nephi sa dihang iyang nakita ang panan-awon sa kahoy sa kinabuhi, kay ang Espiritu midasig kanako, “Tan-awa” (tan-awa sa 1 Nephi 11–14). Mitan-aw ko ni Presidente Thomas S. Monson ug mibati nga anaa ang panaghiusa sa Simbahan tungod kay kita gigiyahan sa usa ka buhing propeta. Pinaagi sa saksi sa Espiritu Santo, nasayud ko nga si Presidente Monson tinuod nga propeta sa atong panahon, ug nasayud ko nga si Jesukristo naggiya sa Simbahan pinaagi kaniya.