Nganong Nagkinahanglan Kita og mga Propeta?

Tungod kay ang Langitnong Amahan nahigugma sa Iyang mga anak, wala Niya sila pasagdi nga maglakaw niining mortal nga kinabuhi nga walay direksyon ug giya. Ang mga pagtulun-an sa atong Langitnong Amahan dili ang ordinaryo, matag-an, wala tarunga nga klase nga inyong mapalit nga naka-paperback sa lokal nga tindahan og mga libro. Kini mga kaalam sa usa ka gamhanan sa tanan, nasayud sa tanang butang nga celestial nga Binuhat kinsa nahigugma sa Iyang mga anak. Nahilakip sa Iyang mga pulong mao ang sekreto sa kapanahunan—ang yawe sa kalipay niini nga kinabuhi ug sa umaabot nga kalibutan.

Ang Langitnong Amahan nagpadayag niini nga kaalam ngadto sa Iyang mga anak dinhi sa kalibutan pinaagi sa Iyang mga sulugoon nga mga propeta (tan-awa sa Amos 3:7). Sugod sa kapanahunan ni Adan, ang Dios nakigsulti ngadto sa Iyang mga anak pinaagi sa pinili nga mga manalagna kinsa gisangunan sa pagpadayag sa Iyang kabubut-on ug tambag alang sa uban. Ang mga propeta mao ang dinasig nga mga magtutudlo ug sa kanunay linain nga mga saksi ni Jesukristo (tan-awa sa D&P 107:23). Ang mga propeta wala lamang namulong ngadto sa katawhan sa ilang panahon, sila usab namulong sa katawhan sa tanang kapanahunan. Ang ilang mga pulong magpabilin hangtud karon isip tugon sa kabubut-on sa Dios ngadto sa Iyang mga anak.

Karon walay kalainan sa nangaging kapanahunan. Ang gugma sa Dios alang sa katawhan karon susama ra gihapon sa nangagi. Usa sa mahimayaong mensahe sa Pagpahiuli sa Simbahan ni Jesukristo mao nga ang Dios nagpadayon sa pagpadayag sa Iyang mga anak! Wala Siya motago sa kalangitan apan siya nagpadayag karon sama sa Iyang gibuhat sa karaang panahon.

Daghan sa mga gipadayag sa Ginoo ngadto sa Iyang mga propeta gituyo aron dili magmasulub-on ang mga indibidwal ug katilingban. Kon ang Dios mopadayag, Iyang kining buhaton aron sa pagtudlo, pagdasig, paghashas, ug pagpasidaan sa Iyang mga anak. Kon ang mga indibidwal ug katilingban dili mosunod sa mga instruksyon sa ilang Langitnong Amahan, ila kining buhaton nga may risgo sa pagsulay, kasakit, ug kabudlay.

Ang Dios nahigugma sa tanan Niyang mga anak. Mao kana nganong Siya naghangyo pag-ayo kanato pinaagi sa Iyang mga propeta. Sama nga gusto nato ang labing maayo alang sa atong mga hinigugma, ang Langitnong Amahan gusto ang labing maayo alang kanato. Mao kana nganong ang Iyang mga instruksyon hilabihan kaimportante ug usahay hilabihan kadinalian. Mao kana nganong kita wala Niya pasagdi karon ug nagpadayon sa pagpadayag sa Iyang kabubut-on kanato pinaagi sa Iyang mga propeta. Ang kapalaran nato ug sa atong kalibutan nag-agad sa atong pagpaminaw ug pagsunod sa gipadayag nga pulong sa Dios ngadto sa Iyang mga anak.

Ang bililhong mga instruksyon sa Dios ngadto sa katawhan makita sa Biblia, Basahon ni Mormon, Doktrina ug mga Pakigsaad, ug Perlas nga Labing Bililhon. Dugang pa, ang Ginoo nagpadayag ngari kanato pinaagi sa Iyang mga sulugoon, nga Iya kining buhaton og usab sa umaabut nga kinatibuk-ang komperensya.

Alang niadtong nagduha-duha kon kini ba posible—kinsa nangutana, “Posible ba nga ang Dios magpadayag kanato karon?”—uban sa tibuok kong kasingkasing dapiton ko kamo nga “umari ug tan-awa” (Juan 1:46). Basaha ang pulong sa Dios nga makita sa kasulatan. Paminaw og maayo sa kinatibuk-ang komperensya nga andam makadungog sa tingog sa Ginoo pinaagi sa Iyang mga propeta karon. Tambong, paminaw, ug tan-awa uban sa inyong kasingkasing! Kay kon kamo magtinguha nga “kinasingkasing, uban sa tinuod nga katuyoan, nga may hugot nga pagtuo kang Kristo, [ang Dios] mopakita sa kamatuoran niini nganha kaninyo, pinaagi sa gahum sa Espiritu Santo” (Moroni 10:4). Pinaagi niining gahum, nasayud ko nga si Jesukristo buhi ug nagdumala sa Iyang Simbahan pinaagi sa buhi nga propeta, gani si Presidente Thomas S. Monson.

Mga kaigsoonan, ang Dios nagpadayag kanato karon. Ug Siya nagtinguha nga ang tanan Niyang mga anak maminaw ug mosunod sa Iyang tingog. Samtang ato kining buhaton, ang Ginoo mopanalangin ug mosuporta pag-ayo kanato, sa kinabuhi dinhi ug sa umaabut nga mga kalibutan.