Ang Akong Inadlaw nga Pagpamatuod

Samtang nagtubo ako, kanunay akong nangita og milagrusong kasinatian aron mapamatud-an sa akong kaugalingon nga ako dunay pagpamatuod. Kanunay kong makadungog og mga istorya mahitungod sa mga milagrusong kasinatian dihang ang mga tawo nakakat-on sa walay pagduha-duha nga ang ebanghelyo tinuod. Ang mga istorya managlahi gikan sa pagsagubang sa tintasyon o peligro, ngadto sa pagdala og gatusan ka mga tawo ngadto sa Simbahan pinaagi sa ginagmay ug yano nga mga buhat, ngadto sa mga panahon nga ang mga kasulatan direktang mapakli ngadto sa mga tudling nga motubag sa mga problema sa kinabuhi. Ang paborito nakong mga istorya mao ang mahitungod sa tawo nga padulong nga mouli usa ka gabii, nakalatas sa kakuyaw nga wala nila mahibaloi hangtud sa pagkasunod adlaw. Nakadungog ako og mga istorya mahitungod sa milagruso nga mga pagkaayo o mga anghel nga nanalipod sa mga tawo. Dili ko makahulat hangtud nga moabut kanako ang mao nga panghitabo. Nagpaabut kong makakita og mga anghel ug mga kahayag nga mosulti kanako nga ako adunay pagpamatuod sa Simbahan.

Gitudloan ko sa akong mga ginikanan sa pag-ampo, sa pagsimba, sa pagbasa sa mga kasulatan, pagsinina og tarung, pagpuyo og limpyo nga kinabuhi nga layo sa kalibutanong mga impluwensya, ug pagsalig sa Ginoo. May pagsalig ako nga mopuyo nga matarung. Gusto lang nakong mapamatud-an nga ako adunay pagpamatuod ug adunay makamatikod kanako tungod niini.

Sa mga family home evening o sa Sunday School, mag-andam kita og mga ikatubag nga makatabang kanato nga makasagubang sa pang-agni sa mga higala. Dili ko makahulat nga mogamit niini nga mga ikatubag. Sama pananglit, akong gi-imagine nga nakiglingaw-lingaw ko uban sa akong mga higala. Adunay modalit og alkohol ug ipasa kini palibut. Ang lata sa beer ihatag ngari kanako, ug ang tanan nagtan-aw punting kanako. Ang pag-agni nagkagrabe. Mobarug ko og moingon nga, “Dili! Ako usa ka Mormon, ug dili moinom!” Ang tanang bata matingala. Walay bisan unsa sa ilang pagpang-agni ang makakombinser kanako. Sa dili madugay mahuman na ang party, ug may espesyal nga tawo sa pundok moingon kanako nga ako nakadasig kaayo kaniya tungod sa lig-on nakong baruganan nga siya gustong makakat-on og dugang sa akong simbahan. Ang mga anghel manganta sa pagdayeg, ug mapuno ako sa kahayag.

Kini wala gayud mahitabo. Walay bisan usa nga mitintal kanako og ingon niana. Maingon og nahibalo na silang daan sa akong mga sumbanan pinaagi sa akong pagpakabuhi. Sa akong kasagmuyo, ang akong “panahon sa himaya” wala gayud mahinabo.

Apan nahibalo na ko karon nga ang pagkaangkon og pagpamatuod wala magkinahanglan sa pagpakita sa mga anghel. Ang akong pagpamatuod miabut gumikan sa akong matag adlaw nga pagsunod sa ebanghelyo, pagbati sa saksi sa Espiritu Santo, ug pagtagamtam sa mga panalangin nga moabut pinaagi sa pagkamasulundon.

Nakaila ako kon kinsa ako. Nahibalo ako nga ang Dios nahigugma kanako. Nahibalo ako nga ang Manluluwas miula sa akong mga sala. Mao kini ang akong pagpamatuod. Ang pagkahibalo niini nagdala ngari kanako og kalinaw sa hunahuna.

Dili ko makaingon nga dunay mga milagrusong hitabo kanako dihang akong nahibaloan nga ang Simbahan tinuod, apan nalipay akong masayud nga ako gayud adunay pagpamatuod. Busa, hangtud nianang higayona nga ang mga anghel mopakita kanako, igo na kanako ang pagpakabuhi sa usa ka normal kaayo nga kinabuhi uban sa yanong panalangin nga mahibalo sa tinuod nga ebanghelyo.