Wala Ko Magpakabana Kanila

Samtang bag-ohay nga nagbasa sa Basahon ni Mormon, nakasugat ko sa mosunod nga tambag: “Ngano nga kamo … motugot sa mga gigutom, sa mga timawa, sa mga hubo, ug sa mga masakiton ug sa mga sinakit nga molabay kaninyo, ug wala magpakabana kanila?” (Mormon 8:39).

Imbis nga mobati og kalinaw ug kahupay nga kasagaran nakong mabati sa kasulatan, nabati nako ang tumang kaguol. Dugay na nakong giila nga dili gyud ko tawo nga daling makabantay. Nagkapuliki ko alang sa akong kaugalingon, sa akong calling, ug sa akong pamilya nga wala ko makamatikod sa mga hagit nga giatubang sa ubang mga tawo.

Nasayud ko nga wala pa nako mahimo ang tanan kutob sa akong mahimo sa “pagtambayayong sa usag usa nga mga alantuson, nga sila mahimo nga magaan; … sa pagbangutan uban niadto nga nagbangutan; oo, ug sa paghupay niadto nga nagkinahanglan sa kahupayan” (Mosiah 18:8–9). Gusto kong mag-usab; gusto kong mahimong mas maayo. Wala lang ko kahibalo kon unsaon. Nag-ampo ko nga ang Ginoo motabang kanako.

Ang tubag miabut sa wala damha ug sa dili gusto nga paagi sa dihang nagkasakit ko. Kini hinayhinay nga nakapawala sa tanang mga buluhaton nga nakapapuliki kanako. Samtang nagkagrabe ang sakit, kihananglang moundang ko sa akong mga kalihokan sa gawas, akong calling, ug sa pagsimba. Kinahanglang naa ra ko sa balay, gimingaw, ug mibati nga walay nagpakabana.

Nag-ampo ko nga moabut ang adlaw ang Ginoo moayo kanako. Kon Iya kining buhaton, nagsaad ko sa akong kaugalingon nga dili nako magpakabuta-buta. Kon mosimba ko, pangitaon nako kon si kinsa kadtong nag-inusara og lingkod ug si kinsa ang wala mosimba nianang adlawa. Mogahin ko og panahon matag semana sa pagbuntog sa akong pagkamaulawon ug mobisita og usa ka tawo nga nasakit o nagkalisud o nanginahanglan lang og higala. Higugmaon nako ang akong mga kaigsoonan matag adlaw—dili lang ma-Dominggo o atol sa mga kalihokan sa Simbahan.

Hinumduman nako ug, ako naglaum, mahimong takus sa pagpaminaw sa pagtugot sa Ginoo: “Maingon nga gibuhat ninyo kini ngadto sa usa sa mga labing gagmay niining akong mga igsoon, gibuhat usab ninyo kini kanako” (Mateo 25:40).