Kita Nagpaluyo sa Atong mga Lider

Ang mga Santos sa Ulahing mga Adlaw nagtuo nga si Jesukristo Mismo mao ang nangulo sa Ang Simbahan ni Jesukristo sa mga Santos sa Ulahing mga Adlaw. Siya nagtawag, pinaagi sa inspirasyon, og mga propeta ug mga apostoles sa paggiya sa Iyang Simbahan. Ang Ginoo naghatag niining mga lider og katungod sa pagtawag og uban pa nga moserbisyo sa Simbahan, sama sa mga sakop sa Seventy. Ang mga Apostoles ug Seventy mo-extend og mga calling sa mga presidente sa stake, kinsa nagtawag og mga bishop, kinsa nagtawag og mga miyembro nga moserbisyo sa lain-laing mga posisyon sa ilang ward. Sa ingon ang katungod sa priesthood ug ang pagpadayag naggiya sa mga calling sa Simbahan gikan sa tibuok kalibutan nga lebel sa Simbahan ngadto sa lokal nga mga kongregasyon.

Kita adunay kahigayunan sa pagpaluyo—pagsuporta, pagtabang, pag-ampo alang—niini nga mga tawo sa ilang calling. Atong gipakita ang atong kaandam sa pagtuman niini pinaagi sa pag-isa sa atong tuong kamot kon ang ilang ngalan basahon sa kinatibuk-ang komperensya, komperensya sa stake, komperensya sa ward, o miting sa sakrament. Ang pag-isa sa atong kamot usa ka timaan alang kanato, ngadto kanila, ug ngadto sa Ginoo nga kita mopaluyo kanila.

Ang pag-isa sa atong kamot sa pagpaluyo sa usa ka tawo dili pagbotar nianang tawhana sa katungdanan. Ang tawo gitawag na sa Ginoo sa pagserbisyo niana nga calling pinaagi sa usa ka tawo kinsa adunay katungod sa priesthood sa pag-extend niana nga calling. Ang atong pagpaluyo usa ka botar sa pagsalig niana nga tawo, tungod kay kita miila nga siya gitawag sa Dios pinaagi sa mga lider sa priesthood nga atong gipaluyohan.

Kita makapaluyo sa mga General Authority ug atong lokal nga mga lider ug mga opisyal sa daghang pamaagi:

• Pinaagi sa atong hugot nga pagtuo ug pag-ampo alang kanila.

• Pinaagi sa pagsunod sa ilang tambag.

• Pinaagi sa pagtabang kanila kon sila mohangyo kanato.

• Pinaagi sa pagdawat sa mga calling nga ilang gi-extend kanato.

Ang pagpaluyo sa atong mga lider usa ka ebidensya sa atong maayong buot, hugot nga pagtuo, ug pagpakigdait.

1. Kita nagpaluyo sa mga General Authority sa Simbahan.

2. Kita makapakita, pinaagi sa pagpataas sa atong kamot, nga kita mopaluyo sa atong lokal nga mga lider ug uban pa nga gitawag sa pagserbisyo kanato.

3. Kita nagpaluyo sa atong mga lider pinaagi sa pagsunod sa ilang tambag.

4. Kita nagpaluyo sa atong mga lider pinaagi sa pagdawat og mga calling, kay ang mga calling gihatag ngari kanato pinaagi “niadto kinsa adunay pagtugot” (Mga Artikulo sa Hugot nga Pagtuo 1:5).

5. Kita nagpaluyo sa atong mga lider pinaagi sa pag-ampo alang kanila (tan-awa sa D&P 107:22).