Ang Talagsaong Ehemplo ni Alex

Sa unsang paagi nga ang usa ka batan-ong lalaki magpabiling aktibo sa Simbahan nga walay suporta sa iyang pamilya? Si Mario Sayas, ang bishop sa dihang si Alex usa pa ka batan-on nga tighupot sa Aaronic Priesthood, miila nga tungod kini sa pagpamatuod ni Alex ug sa iyang mapahinunguron nga mga lider sa Young Men. Miuyon si Alex.

“Kon dili ko mosimba inigka Dominggo, pangitaon ko sa akong mga lider,” siya miingon. “Hinay-hinay nakakat-on ko kabahin sa ebanghelyo hangtud nga nakabaton ko og lig-on nga pagpamatuod. Laing rason nga kanunay kong mosimba mao nga nasayud ko nga pinaagi sa ebanghelyo ni Jesukristo mahimo kaming magmalipayon sa kahangturan isip usa ka pamilya.”

Ang pagkab-ot niana nga tumong nagpasabut nga magpabiling lig-on bisan kon ang pipila sa iyang mga higala sa Córdoba, Argentina, nagkahuyang.

“Adunay daghang tintasyon aron makasupak sa Pulong sa Kaalam ug balaod sa kaputli,” miingon si Alex, kinsa nagbaton og kalig-on gikan sa tambag nga iyang nadawat ni Bishop Sayas. “Siya miingon, ‘Ang bugtong paagi nga makasarang alang sa takus nga asawa mao ang mahimong takus mismo sa kaugalingon.’ Nakatabang kini og maayo kanako.”

Ang pagpamatuod ni Alex mas nalig-on sa dihang siya nagdamgo nga siya gitawag sa pagserbisyo og full-time nga misyon. Siya nagsugod sa pagpangandam apan wala magpaabut nga mag-19 anyos aron mopakigbahin sa ebanghelyo, iyang gisugdan sa iyang pamilya mismo.

“Si Alex kanunay nag-ampo ug nag-awhag sa iyang pamilya,” miingon si Bishop Sayas. “Ug kanunay niyang awhagon ang iyang mga magulang nga lalaki sa pagsimba. Ang paningkamot sa pagpasimba og balik sa iyang pamilya nagmalampuson tungod ni Alex.”

Kon ang amahan ni Alex, si René, mohinumdom sa 13 ka tuig nga iyang gigahin gawas sa Simbahan, siya nasubo tungod sa mga butang nga wala niya masinati.

“Kadto nga mga tuig lisud gyud kaayo,” siya miingon. “Usahay dili malikayan nga makahunahuna ko sa panahon nga nausik tungod kay wala nako matagamtam ang talagsaon kinabuhi nga anaa sa ebanghelyo.”

Ang pamilyang Escobar nagpamiyembro sa Simbahan didto sa Córdoba sa dihang bata pa si Alex. Nagpabilin silang aktibo hangtud sa ilang pagbalik sa ilang nasud nga natawhan sa Bolivia human gayud sa bunyag ni Alex. Samtang didto sa Bolivia, sila nakalimot kon “unsa ang kahulugan sa ebanghelyo sa ilang kinabuhi,” miingon si René.

Duha ka tuig ang milabay sila mibalik sa Córdoba, ang inahan ni Alex, si Carmen, magsimbahan panagsa uban sa ilang upat ka anak. Apan si René, ganahan kaayo nga modula og football, mopahulay matag Dominggo tungod sa mga dula pagka Sabado ug sa mga kalihokan nga may kalabutan niini—mga kalihokan nga sa kasagaran nagpasabut nga makalapas sa Pulong sa Kaalam.

“Gahi ang akong ulo,” siya miingon. “Usahay naghunahuna ko nga hingpit nakong nawala, nga among gihunahuna sa dihang wala na namo mabati ang pagpakig-uban sa Espiritu.”

Ang nakapausab gayud ni René mao ang iyang pagkaamgo nga ang iyang ehemplo nakapasakit sa mga anak. “Ang akong anak nga mga lalaki mora og mga ilo nga sila-sila nalang ang mosimba tungod kay ang ilang amahan dili aktibo,” siya mihinumdom.

“Gisugdan nako sa pag-eksamin ang akong kinabuhi ug ang epekto sa akong ehemplo ngadto sa akong mga anak,” miingon si René, kinsa mapasalamaton kaayo nga ang gahum sa Pag-ula ni Jesukristo nagtugot kaniya nga maghinulsol. “Nakaamgo ko nga wala nako buhata ang akong mga responsibilidad isip amahan. Kining mga butanga nagtabang kanako nga makahinumdon sa Ginoo, nagluhod, ug naghangyo Kaniya nga tabangan kong makabalik.”

Samtang ang pagkamatinud-anon ug pagpamatuod ni René mitubo, sunod-sunod nga mga calling ang miabut. Pipila ka tuig ang milabay human nga gidawat pagbalik ang ebanghelyo, siya nakadawat og impresyon nga ang Ginoo nag-andam kaniya alang sa usa ka importante bag-o nga calling.

“Ang resulta mao nga ang akong papa mao ang akong bishop,” miingon si Alex.

Samtang si Alex nagserbisyo sa Argentina Resistencia Mission, gimingaw ang tanan kaniya, apan sila mapasalamaton nga siya nagpakigbahin sa iyang ehemplo ngadto sa uban. Ug sila mapasalamaton nga sila nabugkos didto sa Templo sa Buenos Aires Argentina niadtong 2009.

“Si Alex mao ang nagpaaktibo kanamo og balik uban sa mga miyembro sa ward,” miingon si Carmen. “Sila miingon kanamo nga siya nag-ampo kanunay alang sa iyang mga ginikanan nga mobalik sa simbahan. Kami mapasalamaton nga miunong siya kanamo.”

Si Bishop Escobar malipayon nga si Alex mao ang unang misyonaryo nga iyang gipadala sa mission field sa dihang gitawag siya pagka bishop. “Nindot kaayo nga adunay anak nga moserbisyo,” siya miingon. “Kaming tanan gimingaw ni Alex, apan ako ang labing gimingaw kaniya. Siya mao ang nagsuporta kanako.”

Kon ang mga Santos sa Ulahing mga adlaw mga maayo og ehemplo, miingon si Alex, ang uban makamatikod niini. “Kon kita malipayon ug kontento sa Simbahan, ang uban gusto nga moambit sa atong kalipay. Kon kita molahutay ug mopadayon sa unahan, ang mga milagro mahitabo.”