Aduna bay limit ang paghinulsol? Kon balik-balik ang akong pagpangayo og pasaylo sa samang butang, moabot ba ako sa limit niini?

Dunay duha ka butang nga hinumduman dinhi: (1) ang kalooy sa Dios sa tinuod walay kinutuban, ug (2) ang tinud-anay nga paghinulsol nagpasabut nga biyaan ang inyong mga sala.

Sa laing bahin, tungod sa walay kinutuban nga Pag-ula ni Jesukristo, ang paghinulsol anaa alang sa tanan, bisan niadtong nakahimo sa makadaghang higayon sa sama gihapon nga mga sala. Sama sa giingon sa propeta nga si Alma, “Tan-awa, [ang Ginoong Dios] nagpadala og usa ka pagdapit ngadto sa tanan nga mga tawo, kay ang mga bukton sa kalooy gitunol ngadto kanila, ug siya miingon: Paghinulsol, ug Ako modawat kaninyo” (Alma 5:33).

Sa laing bahin, si Propeta Joseph Smith mitudlo, “Ang paghinulsol usa ka butang nga dili kayama-yamaan sa matag adlaw. Ang matag adlaw nga kalapasan ug matag adlaw nga paghinulsol dili maoy makapahimuot sa panan-aw sa Dios” (Mga Pagtulun-an sa mga Presidente sa Simbahan: Joseph Smith [2007], 86).

Busa unsa man diay ang yawe sa paghinulsol? Sama sa gipadayag sa Ginoo ngadto kang Propeta Joseph Smith, “Pinaagi niini kamo masayud kon ang usa ka tawo naghinulsol sa iyang mga sala—tan-awa, siya mokumpisal kanila ug mobiya kanila.” (D&P 58:43). Ug sama sa gitudlo ni Alma, “Si bisan kinsa ang maghinulsol makakaplag og kalooy; ug siya nga makakaplag sa kalooy ug molahutay sa katapusan ang mao maluwas” (Alma 32:13; empasis gidugang)

Sa laing pagkasulti, kinahanglan nga kamo mokumpisal ug mobiya sa inyong mga sala ug maningkamot nga magmatinud-anon hangtud sa katapusan sa inyong kinabuhi. Kon naglisud man kamo sa pagbuntog sa usa ka partikular nga sala, ayaw og hunong tungod sa sayop nga pagtuo nga adunay limit ang sinsero nga paghinulsol. Pangayo og tabang sa inyong ginikanan ug sa inyong bishop o presidente sa branch. Ang ilang gugma, suporta, ug tambag makatabang kaninyo samtang naningkamot kamo nga mawagtang ang mga sala sa inyong kinabuhi ug magpaduol sa Langitnong Amahan ug kang Jesukristo.