“Nakabuhat ba Ako og Maayo Karon?” pahina 14: Ikonsiderar ang pagsugod pinaagi sa pagpanganta sa “Salamat O Dios, sa Propeta” (Mga Himno ug mga Awit sa mga Bata, nu. 36). Magdungan sa pagbasa sa artikulo o mopili daan sa paborito ninyo nga mga seksyon nga basahon. Pangutan-a ang mga sakop sa pamilya kon unsay ilang nakat-unan mahitungod ni Presidente Thomas S. Monson. Ihatag ang mga lapis ug papel aron ang tanan makasulat sa iyang pagpamatuod kabahin ni Presidente Monson isip buhi nga propeta. Dapita ang mga sakop sa pamilya sa paglig-on niini nga pagpamatuod pinaagi sa sinsero nga pag-ampo. Ikonsiderar ang pagtapos pinaagi sa pagpanganta sa “Nakabuhat ba Ako og Bisan Unsang Maayo Karon?” Hymns, nu. 223.

“Usa ka Panawagan og mga Tig-indeks sa Tibuok Kalibutan,” pahina 34: Basaha daan ang artikulo. Atol sa family home evening, ipasabut ngano nga ang FamilySearch indexing usa man ka importante nga bahin sa buhat sa family history ug kon nganong adunay panginahanglan alang sa dugang nga mga tig-indeks. Kon duna kamoy computer ug Internet sa panimalay, mo-log on kamo sa indexing.familysearch.org. Paghimo og account alang sa mga sakop sa pamilya kinsa wala pa kasulay sa pag-indeks ug gahini og panahon ang pagdungan og indeks.

“Sunda ang Propeta,” pahina 42: I-summarize ang artikulo alang sa inyong pamilya. Mahimo ninyong basahon og dungan ang katapusang seksyon sa artikulo, “Pagkat-on sa Pagpaminaw sa Propetikanhong mga Pulong.” Ribyuha ang hugpong sa mga pulong nga gisulti ni Elder Bennett nga makatabang kanato sa pag-ila sa direksyon nga gihatag kanato sa mga propeta. Dapita ang mga sakop sa pamilya sa pagpaminaw niini nga hugpong sa mga pulong sa kinatibuk-ang komperensya sa mosunod nga bulan. Ikonsiderar ang pagtapos sa inyong pagpamatuod kabahin sa pagsunod sa propeta.

“Walay Kauban apan Wala Mag-inusara,” pahina 54: Sugdi pinaagi sa pagpangutana kon ang mga sakop sa pamilya nakasulay ba nga mibati nga nag-inusara samtang naningkamot sila sa pagsunod sa mga sumbanan sa Ginoo. Giunsa nila sa pagpakigbatok niini nga mga pagbati? Ipakigbahin ang istorya ni Juan Cabrera. Ikonsiderar ang pagdapit og tawo nga mopakigbahin kon giunsa niya sa pagsunod ang mga sugo dihang ang uban wala mosunod ug sa unsang paagi siya napanalanginan tungod sa pagsunod.

“Desisyuni Karon Dayon,” pahina 66: Human mabasa ang artikulo, tubaga ang mga pangutana diha sa ubos sa “Oo o Dili?” uban sa inyong mga anak. Dayon paghunahuna og mas dugang pang mga sitwasyon nga nanginahanglan sa pagpili tali sa husto ug sayop ug pangutan-a unsay ilang buhaton sa matag sitwasyon.