Walay Kauban apan Wala Mag-inusara

Ang mga ginikanan ni Juan mitudlo kaniya sa bata pa sa pagsunod sa mga sumbanan nga makapanalangin sa iyang kinabuhi. Nakatabang kini kaniya nga motubo ug molambo sa iyang mga talento. “Sukad sa gamay pa ko, naghimo na ko og mga tumong sa Primary ug sa Young Men nga makakat-on og mga instrumento,” mipasabut siya. “Makatukar ako og violin, plahota, piano, ug karon gitara. Ganahan ko sa gitara labaw sa tanan.”

Si Juan mihimo usab og mga tumong sa pagpahimsog sa panglawas diha sa Pagtuman sa Akong mga Katungdanan sa Dios. Sa milabay nga mga tuig nagtuon siya og tae kwon do, langoy, ug gymnastics, ug gani apil siya sa team alang sa lumba sa dagan sa iyang eskwelahan.

“Ganahan kong makakat-on. Mao nga kanunay nakong dawaton ang hagit sa pagkat-on og bag-ong instrumento o sport, sa pagkat-on og dugang pa,” miingon siya.

Kini nga mga tumong miabag usab sa mas dako nga katuyoan. “Ang tanan nga akong gihimo, tanan nga akong gitun-an, tanan nga preparasyon sa pisikal, tanang tumong nga akong gihimo—tanan gayud gihimo uban sa tumong nga moadto og misyon,” mipasabut siya. “Ug ang pag-adto og misyon usa lamang ka bahin sa lain nga tumong: nga mabugkos sa templo ug mahimong maayo nga bana.”

Bisan pa sa ingon ka lawom nga pag-focus, si Juan nahibalo nga dili sayon ang pagpabilin sa mao nga tuyo. Pipila ka tuig ang milabay nakabaton siya og dakong kalig-on gikan sa mas magulang nga mga batan-ong lalaki sa iyang ward. Apan kadaghanan kanila namalhin na o tua na nagtambong sa elders quorum, mao nga diyutay na lang ang higala ni Juan sa Simbahan nga makasuporta kaniya kon magkalisud ang mga butang. Niadtong mga panahona, si Juan nakakuha og kalig-on gikan sa iyang mga ginikanan ug mga igsoon—ug gikan sa iyang Langitnong Amahan.

“Usahay mobati kamo nga medyo nag-inusara tungod kay magkalahi kamo og mga sumbanan, magkalahi ang pamaagi sa kinabuhi, sa pagtagad sa mga tawo, sa pagpangita og lainlaing mga butang sa kinabuhi. Apan ang tinuod mao,” dugang ni Juan nga masaligon, “wala gayud kamo mag-inusara. Mahimong mag-ampo kita kanunay, ug kanunay kitang makapaduol sa atong Langitnong Amahan. Kanunay akong nag-ampo nga makabaton og kalig-on sa paghimo unsay matarung, sa pag-angkon og kaisug sa pagsupak sa akong mga higala kon dili na maayo ang ilang mga gibuhat.

“Ug nahibalo ba kamo?” mipadayon siya. “May mga panahon nga gisultihan ko sa akong mga higala nga nakadayeg sila sa akong ehemplo ug kalig-on sa akong pagbalibad.”

Pipila ka mga tintasyon nga giatubang ni Juan dali rang mabuntog. Dali ra kaniya ang pagbalibad kon ang usa ka higala modapit kaniya sa pag-inom og alkohol. Usa kana ka klaro nga pagsupak sa mga sugo.

“Apan dunay mga panahon nga ang mga tintasyon malinglahon,” pasabut ni Juan. “Sigon sa giingon sa mga kasulatan, usahay magtakuban kini [tan-awa sa Mateo 7:15]. Ang mga tintasyon makapakita ingon nga dili dautan tungod kay dili kini makita nga supak sa usa ka piho nga sugo. Mao kanang higayona nga kinahanglan kamong mag-ampo aron makahibalo sa nanghitabo aron dili kamo malibug. Ang Espiritu mitabang kanako sa makadaghan nga makasabut niini kon may butang nga sayop o kon ang mga tawo mosulay sa pagpahimo kanako og dautan.”

Samtang si Juan nangandam alang sa misyon, may bag-o siyang mga higala sa Simbahan nga nagsuporta kaniya.

“Ehemplo na ako karon sa ubang kabatan-onan, ug usa kini ka panalangin alang kanako,” miingon siya. “Nakatabang kini kanako nga makasabut nga ang paningkamot nga magmalig-on, magmatinud-anon, may kapuslanan.”