Si Elder Claudio D. Zivic sa Seventy ug si Elder Gary B. Doxey, Area Seventy sa Utah South, namulong sa usa ka gipasiugdahan sa Simbahan nga debosyonal alang sa mga miyembro sa Latin America nga giulohan og “En la luz de Su amor” (“Sa Kahayag sa Iyang Paghigugma”), nga gihimo niadtong Dominggo, Nobyembre 13, 2011.

Liboan ka mga miyembro sa Simbahan nga Spanish ug Portuguese ang pinulongan ug ilang mga higala nanambong sa debosyonal didto sa Conference Center ug sa mga meetinghouse sa North, Central, ug South America.

Sulod na sa walo ka tuig ang Simbahan mihatag sa tinuig nga inspirasyonal nga mga kalihokan nga mag-focus sa nagkadako nga komunidad sa mga Latino nga mga Santos, usa ka pagpasiugda nga naglakip sa mga konsyerto sa Pasko, mga debosyonal, ug mga dula sa entablado. Ang 2011 nga debosyonal nagtimaan sa unang higayon nga live [linawas] ang pagsibya sa tinuig nga programa ngadto sa mga meetinghouse sa gawas sa Estados Unidos.

Ang Unang Ginang sa Honduras, si Rosa Elena Bonilla de Lobo, nakighimamat nila ni Presidente Thomas S. Monson ug ni Presidente Henry B. Eyring, Unang Magtatambag sa Unang Kapangulohan, niadtong Martes, Nobyembre 8, 2011, usa ka miting nga ginganlan niya og “usa ka talagsaong pribilehiyo.”

Atol sa iyang pagbisita sa headquarter sa Simbahan, nag-tour usab siya sa Temple Square, sa Family History Library, sa Conference Center, sa Church Humanitarian Center, ug sa Welfare Square.

Mipasabut siya nga ang Simbahan matinabangon bag-ohay lang atol sa grabe nga pagbaha sa Honduras. “Mga duha pa lang ka semana ang milabay nag-deliver kamo og 90,000 ka toneladas [81,600 ka tonel] nga pagkaon alang sa mga tawo nga naapektohan sa pag-ulan ug pagbaha, ug usa kini sa daghang butang nga inyong gibuhat,” miingon siya. “Karon duna na koy pagtuo nga ang Simbahan walay kinutuban o limit sa pagkasarang niini [ug] sa commitment sa pagtabang sa mga nanginahanglan.”