Pagdala sa Primary ngadto sa Panimalay
Mga Buhing Propeta Nagtudlo Kanako sa Pagpili sa Matarung
Inyong magamit kini nga leksyon ug kalihokan aron sa pagkat-on og dugang mahitungod sa tema sa Primary karong bulana.
Si Cristina nagtan-aw kang Presidente Thomas S. Monson sa screen sa ilang stake center atol sa kinatibuk-ang komperensya. Naghisgot siya mahitungod sa pagkamabination ngadto sa uban. Si Cristina dunay mainit nga pagbati samtang naminaw siya. Nahibalo siya nga si Presidente Monson propeta sa Dios. Naghunahuna siya mahitungod kang Leah, usa ka babaye sa eskwelahan kinsa dili mabination kaniya. Nakahukom siya nga magbinuotan kang Leah ug paningkamutan nga mahimo niyang higala. Si Cristina gustong mosunod sa mga gipangtudlo sa propeta.
Sa wala pa ilansang sa krus si Jesukristo, Iyang gitawag si Apostol Pedro sa pagpangulo sa Iyang Simbahan. Si Pedro nakadawat og pagpadayag alang sa Simbahan ug migiya sa katawhan ni Kristo sa husto nga mga dalan. Karon, si Presidente Thomas S. Monson nangulo sa Simbahan, sama kang Pedro.
Paminaw og maayo kon mamulong ang propeta. Ang iyang mga pagtulun-an makatabang kaninyo sa inyong mga problema ug mga hagit. Kanunay siyang mogiya kaninyo ngadto sa hustong mga dalan, ug kamo mapanalanginan kon kamo mosunod kaniya.
Mga paghulagway pinaagi ni Thomas S. Child