Doudou ni Digitaka na Bula Rakorako

Na bula rakorako e sa dua na ivakavuvuli soli ni Kalou ka rawa ni vukei keda meda vulica na vakayagataki vakamatau ni yagoda ena vuravura oqo. Na ivakamacala ni Bula Rakorako ena Tudei ena Vakabauta e sa “Dua na ivakarau ni yaloraramusumusu kei na maqosa ni isulusulu, sausauni, ivosavosa, kei na itovo.”¹ Na bula rakorako e sega ni tawayaga se dokadokaikoya. O ira na tamata bula rakorako era sega ni vakayagataka na yagodra se na nodra itovo mera qara veivakadonui kina mai na vuravura se mera vakaraitaka na ivukivuki ni nodra rawaka se ivalavala dau gadrevi.

Yalovinaka mo nanuma ni ivakavuvuli ni bula rakorako e wasei eke e sa baleta ruarua na turaga kei na marama, gonetagane kei na goneyalewa, ka nanuma ni da sa vakatavulica ka vakaraitaka na bula rakorako, eda sega ni vakacacani ira era digitaka na liku leleka se “ulu duiroka kei na mama wararasa e vuqa.”² Eda dau vakaraitaka tikoga na veikauwaitaki kei na loloma va-Karisito me baleta na tamata yadua ni da yalodei toka ki na ituvatuva sa vakarautaka tu na Turaga.

Au vakadinadinataka ni digidigi eda cakava me rairai ka itovo bula rakorako e vakauta e dua na itukutuku qaqaco vinaka ni noda sa kila deivaki na keda ivakatakilakila vaka luvena tagane kei na yalewa na Kalou ka da sa digitaka meda duri ena veiyasana tabu.

Au taleitaka na ivolanikalou oqo: “Dou sa sega beka ni kila ni dou sa vale ni Kalou, ka sa tiko vei kemudou na Yalo ni Kalou? “Ni sa savasava na vale ni Kalou, sai kemudou oqo” (1 Korinica 3:16–17). Na yagoda sa vale ni yaloda. E sa ki na vale vakayago oqo sa da sureta kina na veitokani ni Yalo Tabu. Au vakabauta ni gauna eda digitaka kina ni daramaka na isulu rakorako ka vakaraitaka e dua na ivalavala ni bula rakorako, eda tokara ka da bulataka na noda ivakadinadina me baleta na Kalou na Tamada Tawamudu kei na Luvena, o Jisu Karisito. Eda ivakadinadina mai na keda irairai vakayago ni da sa tisaipeli i Karisito ka da sa bulataka na Nona kosipeli.

Eda bula ena dua na vuravura ni vinaka kei na ca, ka sa rawa ni vakayagataki na yagoda me baleta e dua vei rau na inaki dodonu se tawadodonu. Ia eda sa kila na vakasakiti ni yagoda e sa dua na isolisoli mai vua na Kalou kivei keda yadua. Era sa ka tabu. A vakatavulica o Elder David A. Bednar ena Kuoramu ni iApositolo Le Tinikarua, “Kivei ira era nanuma ka kila deivaki na yavu ni veivakabulai, na vakacacani ni yago e sa dua na ivakaraitaki ni talaidredre [raica na Mosaia 2:36–37] ka na cakitaka na keda ivakatakilakila dina vaka luvena tagane kei na yalewa na Kalou.”³ Eda digitaka meda qarauna ka taqomaka na yagoda me rawa ni da iyaya ni cakacaka ena liga ni Kalou ni vakayacora na Nona inaki lagilagi (raica na Alma 26:3). Kevaka eda gadreva meda tutaka na iVakabula ka cakava na Nona cakacaka, meda na tarogi keda, Kevaka a duri tu e yasada na iVakabula, eda na lomavinaka li ena isulu eda tokara?

Na bula rakorako ni isulusulu, irairai, vakanananu, kei na itovo e sa ivakadinadina ni da sa kila deivaki na veiyalayalati eda sa cakava ka vakalougatataki keda, taqomaki keda, ka vakaukauwataki keda ena noda vakavakarau ni lesu tale ki na Nona iserau. Ni da a papitaiso, eda a butu tani mai na vuravura ka curu ki na matanitu ni Kalou. Sa dodonu me duatani vei keda na ka kecega. A vakatavulica o Elder Robert D. Hales ena Kuoramu ni iApositolo Le Tinikarua: “Ena digitaki ni noda tiko ena Nona matanitu, eda wase—sega ni yawaki—keda mai na vuravura. Na noda isulusulu ena rakorako, makare na noda vakanananu, savasava na noda vosa.”⁴

Na bula rakorako e sa dua na ivakavuvuli ena veivuke ni taqomaki keda ena salatu ni veiyalayalati ni da toro yani ki na iserau ni Kalou. Na bula rakorako ni isulusulu kei na irairai kei na vakanananu kei na itovo ena veivuke ni vakarautaki keda meda vakayacora ka na maroroya na veiyalayalati tabu ni valetabu. Me vakalougatataki ka taqomaki Atama kei Ivi, a solia na Kalou vei rau na kote kuli ni manumanu me rau vakaisulu kina ni bera ni vakatalai rau tani mai na were. Ena ivalavala vataga, e sa solia na Kalou kivei keda e dua na iubi ni veiyalayalati ni bula vakayago, ka vakatakilakilataki mai na noda qameni tabu ni valetabu.

Na cava eda rawa ni vakatavulici ira kina na luveda tagane kei na yalewa me vukei ira mera doudou ni digitaka na bula rakorako ena dua na vuravura ka na vakalialiai ira ka vakacudrui ira me baleta na nodra digidigi matau? Era raici keda li nida vakayagataka tiko na yagoda me dreta na vakasama se ena vakalagilagia na Kalou?

iVakatakilakila

A smiling family standing on a lawn. Shot in Australia.

Na bula rakorako ni vakanananu, vosa, irairai, kei na itovo e vukei keda me da rawata e tolu na veivakalougatataki kaukauwa ka vakaturaga.

1. Na bula rakorako e sureta na veitokani tudei ni Yalo Tabu. E vakatavulica o Elder Hales, “Sa yaga na bula rakorako meda bula kilikili ena Yalotabu.”⁵

Meda sa vukei ira na luveda mera kila deivaki ni ra na sega ni vinakata ni cakava e dua na ka me cakitaka vei ira “na isolisoli ni Yalo Tabu e sega ni vakamacalataki rawa” (V&V 121:26). Vukei ira mera kila ni isolisoli vakayalo kaukauwa ka vakasakiti e salamuria na Nona veitokani tabu. Sa yalataka na Kalou, “Au sa solia vei iko na noqu Yalo Tabu, ia ena vakavukui iko ko Koya, ka vakasinaiti iko ena marau; … A ka oqo ko na kila kina, ni na soli vei iko na veika vinaka kecega, ko sa kerea ena vakabauta” (V&V 11:13–14). Na kilaka, yalomatua, kei na ivakadinadina; reki, vakacegu, kei na marau—sa so na veivakalougatataki levu sa rawa ni da yalataka kivei ira na luveda ni da sureti ira mera bula rakorako ka bula kilikili ena Yalo Tabu.

Dua na bolebole ni isulusulu rakorako oya ni ra veisau vakawasoma na ivukivuki kei na itovo vakadonui vakaveimaliwai. Na ituvatuva ni Turaga e sega ni veisau. Vakatavulici ira na cauravou kei na goneyalewa mera na dau vakila matua na Yalotabu ni ra caka digidigi me baleta na ka mera tokara, tukuna, ka cakava. Ni ra bula volekata na Yalotabu, e sega ni gadrevi mera na vakataka na vuravura.

Era sa ciqoma na luveda na isolisoli ni Yalo Tabu, ka ra sa muria voli na salatu ni veiyalayalati e muataki ki na valetabu ka na vakalesui ira ki na iserau ni Kalou. Era gadrevi keda meda vakadeitaka vei ira ka vakaraitaka vei ira ni ra na tuberi, taqomaki, vakacegui, ka vakasavasavataki ni ra bula kilikili ena Yalo Tabu.

2. Sa rawa ni da vakatavulici ira na luveda ni irairai kei na itovo rakorako e veivuke ni taqomaki keda mai na veivakayarayarataki veivakacacani ni vuravura. E dua na iyaragi veivakalaboci duadua ka vakayagataki vei keda taucoko oya ni na ivalavala vakadonui vakaveimaliwai ni bula dodonu e sa ka makawa. Na bula rakorako e sa dua na tataqomaki mai na veivakayarayarataki tawadodonu vakaoya ka sa dua na itatarovi ni tiko savasava kei na buladodonu. Vakarorogo ki na vosa oqo ena Me iSakisaki ni iTabagone: “Ni bera na vakamau, … kakua ni cakava e dua tale na ka … e vakavuna na garo.”⁶ Na irairai kei na itovo tawarakorako ena vakavuna vakawasoma na garo ka na voroka sobu na ilati ka sureta na veitemaki levu me voroka na lawa ni tiko savasava.

A vakatavulica o Elder Hales: “Na bula rakorako e sa koto ena loma ni savasava kei na dodonu, ruarua ena vakanananu kei na cakacaka. Ia, baleta ni dau tubera ka vakayarayarataka na noda vakasama, itovo, kei na digidigi, na bula rakorako e sa koto ena lomadonu ni noda ivalavala⁷ Vakatavulica ka vakaraitaka na bula rakorako me vukei ira na noda cauravou kei na goneyalewa mera vakavakarau ni vorata ka taqomaka na kaukauwa ni vakatubukawa e tiko vei ira. Vukei ira mera vakatatabutaka ka taura deivaki na ivakaraitaki ni loloma mai vua e dua na turaga kei na marama vakawati me baleta na vakamau.

3. Na bula rakorako e vakatarai keda meda “vakadinadinataka na Kalou ena veigauna kecega” (Mosaia 18:9). E kaya kina na iVakabula: “Ia mo dou dulaka cake na nomudou rarama me cilavi vuravura. Raica sai au ga na rarama mo dou dulaka cake.” (3 Nifai 18:24). Sa noda na ivakaro vakalou meda bikeni ki na vuravura, meda vakaraitaka na reki ena bulataki ni kosipeli, me vakatavulici na buladodonu, ka me tarai na matanitu ni Kalou ena vuravura. O keda yadua eda vakacaudreva na Rarama i Karisito ni da sa bula rakorako ka savasava ka muria na ivakaro. Na bula rakorako e sa dua na ivakadinadina ni noda dinata na iVakabula kei na kosipeli i Jisu Karisito.

Sa ka totoka ka kalougata o ira ka ra tuberi mai na Yalo Tabu, ka ra taqomaki ira mai na veika vakavuravura, ka ra duri mera ivakadinadina ni Kalou ki na vuravura. Sa kalougata o ira era ivakaraitaki ka vakatavulica na ivunau ni bula rakorako me baleti ira taucoko na tagane kei na yalewa ni Saioni.

Ni da sa mai veiyalayalati me da muria na iVakabula ka gadreva me ciqoma na taucoko ni veivakalougatataki ni Nona Veisorovaki ena noda bula, sa dua bau dina ga na isulu ena manata. A volaitukutukutaka o Moronai, “Yadra mai, ceburaka tani vei iko na kuvunisoso, … io, mo vakaisulutaki iko ena nomu isulu vakaiukuuku, Saioni; … me vakayacori kina na veiyalayalati ka cakava na Tamada Tawamudu … vei kemudou” (Moronai 10:31; vakamatatataki).

Na qameni totoka era sa isulu ni yalododonu, ka daramaka o ira era sa maroroya na nodra veiyalayalati. Eda sa vakarautaki ira tiko li na luveda mera daramaka na qameni totoka oqo?

Au vakadinadinataka ni sa vu mai vei Karisito na veivakabulai kei ira ka maroroya na nodra veiyalayalati era na “kila vinaka na nodra marau, kei na nodra ivalavala dodonu, ni ra sa vakaisulu tu ena yalosavasava, io na isulu ni yalododonu” (2 Nifai 9:14).