— Tuva Kawa — Au sa Cakava Tiko
E rawa ni rawarawa ka lasa na kena itekivu. O ira na itabagone e vuravura era sa tuva kawa ka cakava tiko na veisau.
Me tekivu e vei? O nanuma beka ni ra sa cakava na wekamu na cakacaka kece e dodonu me caka. Se o se vulagi beka ena tuvakawa ka sa rui cakacaka vakaitamera vei iko. Se o tekivu ena nomu vakalewena tiko e dua na ivolaniveisiga, vakarautaka na yaca ki na valetabu, se vuli mai vei ira na wekamu era bula tiko, e rawa mo vakaitavi ena tuvakawa ena veisala lasa ka vakaibalebale.
Vakalewena e dua Nomu iVolaniveisiga: Nanuma Noda Veivakalougatataki
E sega ni rawarawa na kena maroroi e dua na ivolaniveisiga. E wasoma noda dau tukuna ni da sa rui osooso se sa rui oca se sega soti ni taleitaki noda bula me volai. Au qai kila ena vica na yabaki sa oti ni sega ni kena inaki me dredre na vakalewena na ivolaniveisiga ka rawa ni yaco meu taleitaka.
Au tekivu ena noqu vola e dua na ka e veisiga. E sega soti ni dua na ka kevaka e balavu ka taleitaki; au vola ga na veika e tiko ena noqu vakasama se cava ga e yaco ena siga oya. Sa vakalougatataka oti na noqu bula.
Ena dua na siga e sotava tiko na dredre e dua na lewe ni noqu matavuvale kau sega ni kila na ka meu tukuna vua, ia au qai vakauqeti meu wilika vua e dua na ka au vola tu ena noqu ivolaniveisiga. A rawa niu wasea e dua na ka baleti au kau vola tu ena ivolaniveisiga lailai loaloa, kau raica na sala e veivuke kina ena kena vakamamadataki na yalona.
Au vakadeitaka kevaka o na tekivu ena nomu vola e dua na ka ena dua na siga, ena vakalougatataka na nomu bula. Veitalia na kena lailai se na kena levu, ni o vola na veivakalougatataki ena nomu bula ena vukea mo nanuma tiko.
Gentry W., Utah, Amerika
Kune Marau ena Tuvakawa: Vakasaqarai Ira na Tubuda
Niu papitaiso, au dau rogoca e vuqa na ka baleta na tuvakawa, ia au sega ni kila na kena icakacaka se kevaka au na rawata. Au mani nanuma meu masulaka, kau vakila ni dodonu meu sa tekivu cakacakataka sara ga. Au vakila ni ra sa nanamaki tu na tubuqu meu tekivuna ka ra na vukei au meu kunea na itukutuku e gadrevi me rawa ni caka kina na cakacaka vakalotu.
Au tekivu ena noqu taura e dua na vuli ni tuvakawa, ena dua ga na gauna lekaleka au sa kacivi meu daunivakasala ni tuvakawa. Au lomaleqa baleta niu sega soti ni kila vakavinaka, ia au ciqoma ga na veikacivi.
Ena dua na siga au veisiko vei taci buqu, ka tu vua eso na itukutuku me baleta na buqu vakarua. A sega ni via wasea vakalevu na itukutuku baleta na nodra ivalavala ni ra sega ni dau veitalanoataka na ka e baleti ira na wekadra era sa takali. E kaya ni ena siga ka tarava ena ivakananumi ni nona sa mate na buqu vakarua, ka sa na vakama tiko kina na ivolatukutuku. Au kerea kevaka e rawa niu taura mada mai kina eso na itukutuku, qai vakadonuya vei au. Au qai kila ena gauna oya ni na vukei au na Tamada Vakalomalagi meu tomana na noqu vakadidike.
Niu veiqaravi ena vale ni tuvakawa volekata na valetabu, sa toso tikoga na noqu raica eso tale na ka me baleta na noqu matavuvale. Au kila ni rua vei rau na tubui buqu vakarua erau lako mai Itali ka dua na nodrau iteitei volekati São Paulo e Brazil. Sa mai cavuka na veitaratara ni noqu matavuvale vei ira na wekai keitou ena iteitei, ia au a kunea e dua na tavalequ ka vola tiko e dua na ivola me baleta na ituvatuva ni kawa ni neitou matavuvale. A solia vei au na ivola, ka a taura tu mai e ciwa na yabaki nona vola. E kaya o koya ni a sega ni kila na vuna e vola kina ia e vakila ni na vukea e dua ena dua na gauna mai muri. Au kila ni yaloi Ilaija a vakauqeti koya tiko.
Sa vakavulica vei au na veika au sa sotava ni da sa cakava tiko e dua na cakacaka tabu. Era sa waraka tu na tubuda na noda veivuke ka ra sa tu e yasada me ra vukei keda.
Gabriel D., Brazil
Cakava na Cakacaka ni Valetabu: Cakacaka Tabu Vakalou
Au saumaki mai kau lewe ni Lotu duadua ena noqu matavuvale. Au sa vulica ni dua vei ira na cakacaka tabu vakalotu na nodra papitaiso na mate. Au a lako vakasarasara ki na valetabu, niu vakarorogo vei koya e veivakasarasarataki ni vosa tiko me baleta na cakacaka vakalotu, au vakila e dua na domo malumu, lailai ni tukuna meu lako ki na vale ni tuvakawa ka solia kina e dua na kerekere ni cakacaka vakalotu ena valetabu me baleti tinaqu, ka sa takali yani. Sa dua na ka noqu marau ni qai vakadeitaka mai na akaude ni FamilySearch ni sa caka oti na nona cakacaka ni valetabu E vaqaqacotaka na noqu ivakadinadina, kau kila ni dua na vuna eda tiko kina e vuravura oqo me da vukei ira na tubuda me ra ciqoma na kosipeli dina i Jisu Karisito.
Marvin S., Yatu Filipaini
Muria na Veivakauqeti: Vuli Mai vei Ira na Wekada Era Bula Tiko
Niu taurivola mai na vuli torocake, au vakauqeti meu sikovi iratou vava na tubuqu. Au galala tiko ena so na gauna, kau nanuma ni na rawa ni sega tale ni yaco mai na madigi oqo, au mani toka macawa dua tiko kina vei ira vakayadua na veiwatini tubuqu oqo.
Au vakayagataka noqu gauna ena noqu vaqiqisi ena veikateni makawa, wili ivola makawa, ka raica na iyaloyalo makawa. Au vola na italanoa ni nodra bula na tubuqu, lako ena veibulubulu, ka veisiko ena veivanua era a vakaitikotiko ka cakacaka voli kina na tubuqu. E lasa! Au vulica e levu na ka me baleti ira na tubuqu, tukaqu kei buqu, noqu itubutubu, kei au. Au qai kila ni na sega na noqu bula kevaka a sega o ira na tubuqu.
Ni oti mai na noqu ilakolako, au lesu mai kei na rauta ni 1,000 na yaca ni tubuqu ka sa rawa meu cakava na nodra cakacaka ni valetabu e vuqa vei ira. Na vakamuri ni veivakauqeti ni Yalo Tabu ka veisiko vei iratou na tukaqu kei na buqu e dua na vakatulewa vinaka duadua au sa bau cakava.
Shenley P., California, Amerika
Logaloga Vinaka: Kau Yaca ki na Valetabu
Niu tarogi tamaqu me baleta na vakasama eso ni tuvakawa me rawa niu vakacavara kina na noqu Torocake Yadudua, e vakamacalataka ni a raica eso na yaca ni matavuvale ena vica na yabaki sa oti ia mani sega ni rawa ni vakarautaki ira vakataki koya me ra kau ki na valetabu baleta ni sega nona gauna. Na noqu veivuke e rawa kina vei ira na lewe ni matavuvale oqo me ra ciqoma na veivakalougatataki ni valetabu.
Ena vica na vula ka tarava, au dau vakacuru yaca ki na kompiuta ka vulica na italanoa eso ni matavuvale mai vei tamaqu ena veiyakavi kei na bogi ni Sigatabu. Keirau dau otataka na maikorofiji me keirau kunea kina eso tale na itukutuku. Ena so na gauna ni dau dredre me wiliki na filimu makawa, au na dau cavuta e dua na masu lo ka taura eso na pepa me lavetaki eso na itukutuku. Era sa basika mai na yaca era a sega tu ni laurai.
Au mani kumuna rawa kina e dua na ibinibini yaca levu ni matavuvale, ka ra veivuke na itabagone ena neitou tabanalevu me caka na kedra papitaiso. Oti era qai kauta oi rau na noqu itubutubu kei ira eso tale na lewe ni tabanalevu na kadi ni yaca me caka na kedra veicakacaka vakalotu tale eso ni valetabu.
E vaka ni sivi e dua ga na gauna lekaleka walega ni bera niu sa vakavakarau meu lako ki na valetabu me baleta na noqu edaumeni. Au a nanamaki ka lomaleqa talega.
Ni keitou lako yani ki na valetabu, e vakamacalataka o tamaqu ni sa kunea eso na kadi ni yaca ni matavuvale au a vakarautaka me baleta na noqu cakacaka ni Torocake Yadudua. E vica sa yali, sa mani kauta tiko mai na kadi ni yaca me keitou vakacavara, o na, noqu itau, kei koya. E wasea vata kei au na yacadra, kau nanumi ira rawa mai na noqu cakacaka.
Niu cakava na veiyalayalati tabu ena valetabu, au vakila niu vakavolivoliti mai vei ira na noqu daulomani ena yasa ruarua ni ilati. Au vakila e dua na vakacegu levu ena noqu kila ni rawa niu duavata me tawamudu kei na noqu matavuvale.
Holly P., Idaho, Amerika