E Lomani Iko

Au dabe toka ena tutu ni rumu vakasilesitieli ena yasa ni oqani ena kena vakatabui na Valetabu mai Memphis Tennessee. E lako mai o Peresitedi James E. Faust (1920–2007), e dua na lewe ni Mataveiliutaki Taumada mai na 1995 ki na 2007, me vakatabuya na valetabu. A dabe tiko o koya ena ruku ni gusunivosa kei ira e vica tale na veiliutaki. E curu mai e dua na matasere mai kea ka mai tu e dakudra.

E lewe ni matasere tiko e dua na goneyalewa au dau sikova ka vakavulica. Ena gauna taucoko ni soqoni, au masuta tiko me ciqoma na ka e vinakata mai. A wasea lo vei au ni lako mai ki na vakatabui ni valetabu ena siga oya me kila na kena ituvaki ena mata ni Turaga. A cakava eso na ivalavala ca lelevu e liu, e dina ni sa veivutuni, se dredre tikoga na nona lomavinaka me baleti koya se me vinaka na yalona ena nona sa lagasere tiko ena matasere.

Au a vakaraici Peresitedi Faust, kau nanuma ni o koya, me vaka ni matataka na Turaga ena Mataveiliutaki Taumada, e rawa ni cakava e dua na ka. Ia ena rawa vakacava meu tukuna vua, ka na rawa vakacava vua me cakava e dua na ka? Ni oti na soqoni, sa na curu tale yani ki tautuba me vaka ga na nona a curu mai, ena sega na veivakilaitaki, sega na lululu, ka sega na veivosaki. Au kila ni osooso o koya ka sa tu na ituvatuva ni nona veitosoyaki, ia au masu tikoga.

Ni vakasama tiko vakatitobu o Peresitedi Faust, a raici au mai vakalailai—e sokidi vata na masela ni vacu ni matana. Ni oti na soqoni, a serau e matana na rarama ni marau.

A raici au tale ka qai tucake vakasauri, vuki mai, ka dodoka vakabalavu mai liu na ligana. A dusi vakadodonu mai vei noqu itokani. Qai kaya vakamatata ena domolevu, “E lomani iko na Turaga!”

E lailai ka rawarawa na ka e cakava o Peresitedi Faust ia na kena mana e kilai kina ni rawa duadua ga ena cakacaka ni Yalo Tabu ka tukuna vua na veika au sega ni rawa ni tukuna o au. Na vica na malanivosa oqori e vakalougatataka na noqu itokani ka tokona tiko na noqu vakabauta ni dau nanuma vakavinaka tiko na Turaga na veika matailalai ni noda bula ka ni “[vei]ka lalai ka beci, sa tubu mai kina na ka levu” (Alama 37:6).